Miti Mânec 78:2-67

²Qâqiŋdâŋ micnaneonec wahazo ekac, kesaic dâŋ raŋɋane mufuazo ekopac.

³Mimiŋe jaŋe binaŋ banârehuc jupie mana maŋ embeŋ, mamana‐nâŋecko fokac,

⁴i hâcne ɋâricfâc‐nâŋec mi hesoŋke‐jarehuc, jufeniŋmu jaŋe mufua‐jarezo: Wofuŋzi gie sâko bawec, â tâpiri‐ticne, â mâsi bawec irec binaŋne hâcne.

⁵Dâŋsanaŋ Jakobo erao âkendâŋnewec, Israe guru sâcmutâc biricke‐jarewec, i wâc ɋiefâc‐jeŋic jazahuc juniŋte, Wofuŋzi apafâc‐nâŋec mupaŋke‐jarewec.

⁶Ʒâhec‐guru hazec‐jeŋicko huocte muwec, ɋâricfâc‐jeŋic, mi fuakicne hâcne.

⁷Eme jaŋe wâc fahare ɋiefâc‐jeŋic binaŋ bajarepie, maŋjeŋic Anuturao siŋkerâ foha, eki wiac ewec irec mi nikec‐jopazejec, â mumupaŋ‐ticne reŋkehuc junʒepieŋ.

⁸Mimiŋnefâc‐jeŋic jaŋere sâc mi junʒepieŋ, jaŋe ŋic maŋrâŋgeŋ â qaqaharicne jumbiŋ; maŋjeŋic biric borocne fohuc juwec, mâro‐jeŋic Anuturao mi qohotawec.

⁹Eferaimte ɋâricfâc, tepe babaju, jaŋe ʒika dameŋko hâwic‐jopame wisembiŋ.

¹⁰Jaŋe Anuture ʒâʒâfic mi soŋaŋkembiŋ, â sâcmutâc bâjâpezo takic‐jopawec.

¹¹Eki juwicnao gie sâko bawec, â mâsi jowatuwec, irec nikec‐jopawec.

¹²Mimiŋne jaŋere maio wiac bipinehec ewec, Aigita mâreŋko, Zoaŋ wâneŋko.

¹³E hâwec bâfâucke‐jareme fotâcnembiŋ, ŋifec â ŋifec tufa iŋucne domawec.

¹⁴Ʒoaŋ domaha karoracko bânie‐jarewec, â ŋafeo ʒoczi batamae‐jarewec.

¹⁵E mâreŋ tuhuo qânâ hefâucke‐jareme opâ ɋârâŋnea, ʒâkâŋkonec tinac nâmbiŋ.

¹⁶Qânâonec opâ fifisine wahawec, erâ fusi‐ticnehec rahuc domawec.

¹⁷Eme sifu ʒuhuckerâ sâqocne bahuc Anutu bunao bambiŋ, Femicne sâko tuhuo pepecne ecnembiŋ.

¹⁸Anutu maŋjeŋiczi esâickehuc andac‐jeŋicte sâcko nânâre mumbiŋ.

¹⁹Anutu pepec ecnehuc mumbiŋ, “Tuhuo nânâ sâcne bâmocke‐nâreocmu me?

²⁰E qânâ i jâmbomac qâfâuckeme opâ ɋârâŋne wahahuc domawec; eme nânâ wâc sâcne tahac‐nâpoocmu, â ŋicfâcne qowi bâfua‐jareocmu me?”

²¹Wofuŋ e dâŋ i manarâ maŋne faharewec; maŋʒoc‐ticnezi Jakobo bâruŋkecnewec, kimbeŋ‐ticnezi Israe fahac fisicnewec,

²²jaŋe Anutu mi manasiŋkembiŋte, â bafic‐ticnere mamanac mi jumbiŋte.

²³Ehame sifu karorac wira‐jareme sambâŋ motâcne motâcne aŋkewec.

²⁴Eme manazi hoe iŋucne wahawec, nânâ i sambâŋkonec jareme nâmbiŋ.

²⁵Aŋelo nânâ i mâreŋŋiczi nâmbiŋ, ehuc hata nâsiŋ‐jeŋic mi basambiŋ.

²⁶Eme ʒoaŋ wewefunaonec mâŋâŋ soreme rawec, ra juwic mâreŋkonec mâŋâŋ jâpeme wefuwec.

²⁷Ehuc qowi beheme hoe tinac wahawec, sawa wipe ɋârâŋne, hâwec moŋgeŋ iŋucne.

²⁸Hae toma‐jeŋicko behec‐jopame boze sâc rârec rârec waharâ fombiŋ.

²⁹Andac‐jeŋicte jarewecte afecne mi nâmbiŋ, nâku nâku gapec‐jopawec.

³⁰Eme aŋac‐jeŋic mi taraha, â qowi micjeŋicko foha,

³¹Anuture kimbeŋzi fahare‐jarerâ, ŋicfâc‐jeŋic tâpiri wânʒâŋ qâhâmoc‐jopawec, Israe ŋicʒeŋoŋ ɋiɋicne qâfiec‐jopawec.

³²Eme jaŋe sifu ʒuhuckerâ sâqocne bambiŋ, mâsi‐ticne mana suahuc e mi manasiŋkembiŋ.

³³Irec mume ʒoaŋ‐jeŋic nokafe iŋucne hesackewec, â jara‐jeŋic ʒâic fâro maŋko bazumbiŋ.

³⁴Jopame sâc e wâsickembiŋ, ehuc maŋ bârisierâ Anutu wira basac ecnembiŋ.

³⁵Jaŋe Anutuzi qânâ sanaŋ‐jeŋic domawec, â Femicne sâko Anutuzi fifirue‐jeŋic juwec, irec mocwâc manasumbiŋ.

³⁶Erâ micbipic‐jeŋiczi âkeac ecnehuc nameŋ‐jeŋiczi burecdâŋ âzâcnembiŋ.

³⁷Maŋjeŋiczi ine erao sanaŋne mi qohotawec, â ʒâʒâfic‐ticne mi basanaŋkembiŋ.

³⁸Eki ine busâqoc mana‐jarehuc kiŋjeŋic behewec, ehuc mi bâsirowec‐jopawec. E dameŋ sâc kimbeŋ‐ticne bâuruŋkewec, â aaric‐ticne manacneme mi ʒâseŋ‐jopawec.

³⁹Jaŋe mâreŋŋic sawa jumbiŋ irec manasuwec, nokafe iŋucne, rarâ mi ririsiene.

⁴⁰Opopo, jaŋe dameŋne dameŋne mâreŋ sawao pepecne ecnembiŋ, â mâreŋ tuhuo buʒâic bâfuacnembiŋ.

⁴¹Jaŋe e esâickerâ esâicke ecnehuc jumbiŋ, ehuc Israere Tiri juju maŋbâiŋ ecnembiŋ.

⁴²Jaŋe tâpiri sanaŋ‐ticnere mi manasuhuc jumbiŋ, â râsiraonec batarac‐jopawec irec nikec‐jopawec.

⁴³E Aigita mâreŋko fuŋne‐ticne bataniŋkewec, â Zoaŋ wâneŋko mâsi‐ticne bâfuawec.

⁴⁴E opâne opâne bâtikie‐jareme soc ewec, eme nâniŋte quŋke sâqorembiŋ.

⁴⁵E nusuc neŋgec râe‐jareme kicjopambiŋ, â qaqec bâfua‐jareme imac‐jopambiŋ.

⁴⁶E mâriri‐jeŋic qokic biŋe qajarewec, â gie‐jeŋicte fârine ɋirikiŋ qikiŋne‐jarewec.

⁴⁷E waiŋ gie‐jeŋic hoe sanaŋzi qanʒaŋnewec, â jâchândâŋ‐jeŋic aisizi sipirickewec.

⁴⁸E lama bulimakao gurufâc‐jeŋic huc repicne bâfua‐jareme hâmo miziec embiŋ.

⁴⁹E kimbeŋ‐ticnere ʒocbâruŋ tuŋke‐jarewec, aaric, mamana sâqoc, â bâbâʒâic, â sisipiricte aŋelo guruhec.

⁵⁰E ima qaqa‐ticne aka mi hecnehuc, â juju‐jeŋic hâmoc mi sakarecnehuc huc sâqocnere micko râec‐jopawec.

⁵¹E Aigita ŋic mârâc ŋokâ‐jeŋic, Hamte ɋâricfâc tâpiri‐jeŋicte hozine, i hae sâc qâhâmoc‐jopa‐fârewec.

⁵²Erâ ŋicfâcne bânie‐jareme faharembiŋ, eme tuhuo lama guru iŋucne jowac‐jopawec.

⁵³Aimuŋ hone maiŋ ejareme hâwicmâc jumbiŋ, râsifâc‐jeŋic ine hâweczi qâuruc‐jopawec.

⁵⁴Izi tiri mâreŋ‐ticnao bacjopa fisiwec, mefâre‐ticnezi tiki ruckewec ira hâcne.

⁵⁵Erâ mai‐jeŋicko qâpuc guru jâpec‐joparâ mâreŋ‐jeŋic kâdoc qahuctecne ŋeŋetac‐jeŋicko Israe guru râec‐jopawec.

⁵⁶Jaŋe ine sifu Anutu Femicne sâko esâickehuc pepec ecnembiŋ, â mumutaniŋ dâŋticne mi bâjâpembiŋ.

⁵⁷Jaŋe mimiŋnefâc‐jeŋic jaŋere hata âtehuc Anutu râpeckerâ bunao bambiŋ, ehuc tepe neŋgocne hehesicne iŋucne embiŋ.

⁵⁸Jaŋe tiki sâc alata bahuc maŋbâiŋ ecnembiŋ, â nemuɋâŋ bajupie bune heâriŋkewec.

⁵⁹Anutu e i manarâ maŋnao aaric fusucmame Israe guru behec‐jopa sanaŋkewec.

⁶⁰E Silo haeo ŋeŋe juju‐ticne râpeckewec, ŋicŋondeŋko qoruc boze fârecnekicne i behewec.

⁶¹E tâpiri‐ticnere ma â eri‐ticne i qikiŋneme râsi jaŋe rombiŋ.

⁶²Ŋicfâcne ʒikare micko râec‐jopawec, â fuŋfuŋfâcne kimbeŋ qajarewec.

⁶³Eme ŋicmotecfâc‐jeŋic ʒoczi ʒacjopawec, â naru ŋokacfâc‐jeŋic ŋic tâmiric jumbiŋ.

⁶⁴Taha bapafâc‐jeŋic ʒikare nânâ embiŋ, eme hozecfâc‐jeŋic jaŋe ki soŋgâŋ mi embiŋ.

⁶⁵Eme Wofuŋ e guŋkonec tinac mana ɋâɋârewec, momori moczi waiŋ nâhuc owackeekac iŋuc ewec.

⁶⁶Erâ râsifâcne hetapaic‐jopame wisembiŋ, mimi tatara tâmiric bâfua‐jarewec.

⁶⁷Josefere ɋâricfâc ine qikiŋ‐jopawec, â Eferaimte guru mi rowosâewec.