Psalms 78:2-67

²Bay gu welthin u fithik’ e fanathin; ngug weliy e pin’en ni kakrom nda un nangfan,

³bogi ban’en ni ud rung’aged kadnanged ni bogi ban’en ni yog e pi chitamangidad ngodad.

⁴Dab da mithaged rok pifakdad, nga dogned ko bin migid e mfen murung’agen SOMOL nib gel nge gafarig rok ni bfel’ nge pi maang’ang ni i rin’.

⁵Ke pi’ e motochiyel ngak e girdi’ nu Israel me motochiyel ngak e pi’in owchen Jakob. Me ta’chiylen ngak e pi ga’ rodad ni ngar machib niged e motochiyel rok ngak pifakrad,

⁶ya nge yag ni nang e bin migid e mfen ngar chelgad ngar filed ngak pifakrad.

⁷Ni aray rogon ma aram e bay ra ted e pagan’ rorad nga daken Got ma dab ra paged talin e n’en ke rin’, ma gubin ngiyal’ ni bay ra ted u gil’ e tin ke ta’chiylen.

⁸Dab ra boded e pi chitamangirad kakrom, ni bogi girdi’ ni yad ba tatogopluw ma darir folgad, ni de muyluy e pagan’ rorad ngak Got, ma darir pired ni yad ba yul’yul’ ngak.

⁹Pi Efraimite, e ra feked e gat’ing nge gan e gat’ing, miyad mil e rofen ni ngan mael.

¹⁰Dar ayweged fare m’ag u thilrad nge Got; mra siyegned ni ngar folgad ko motochiyel rok.

¹¹Kar paged talin e n’en ke rin’, fapi maang’ang nra guyed ni rin’.

¹²I rin’ Got fapi maang’ang u p’eowchen e pi chitamangirad u lan e tafelfel’ u Zoan ko nam nu Egypt.

¹³I sey e day nge fekrad nga barba’; i suweg e day ngalang ni bod ruraba’ i rungrung.

¹⁴Me rran me pow’iyrad nga bang i manileng mra nep’ ma ram’en ba nifiy.

¹⁵I sey e war u lan e ted ni desert nge pi’ e ran riy ngorad.

¹⁶Me k’aring e ran nge map’ ko fare war me gagiyegnag nge thang’el nga but ni bod ba lul’.

¹⁷Machane dartalgad ko denen nib togopluw ngak Got, mu daken e ted ni desert e ra togopluwgad riy ngak e en ni Th’abi Tolang.

¹⁸Nri lanin’rad ni ngar sikeng niged Got ko ggan ni yad ba’adag ni yad be ning.

¹⁹Ur nonod nib togopluw ngak Got, ni be lungurad, “Rayag rok Got ni nge yagnag e ggan u daken e ted ni desert?

²⁰Riyul’ ni pirdi’iy fare war nge po’ e ran riy, machane gur, rayag rok ni ngki pi’ e flowa ngodad me pi’ e ufin ngak e girdi’ rok?”

²¹Ma aram e nap’an ni rung’ag SOMOL e n’en ni yad be yog mri damumuw; me cham ko girdi’ rok ko nifiy, mri gel e damumuw rok ngorad,

²²ya dariy e michan’ rorad ngak ma de mich u wan’rad nra ayuwegrad.

²³Ma aram me non ngalan e lang nge yog ko pi mab riy ni nge mab;

²⁴i pi’ e grain u tharmiy ngorad, me pu’og e manna nga but’ ni ngar ked.

²⁵Ere ra ked gan e pi engel, me pi’ Got ngorad urngin ni yad ba’adag.

²⁶Miki gagiyegnag e nifeng nge thow ko ngek, ma gelngin e k’aring e nifeng ko yimuch;

²⁷me pi’ e arche’ nga but’ ko girdi’ rok, ni bod feni yo’or e yan’ u p’el’ay;

²⁸me mul mul fapi arche nga lulukngun fa gin ka ra pired riy ni liyeg e pi tent rorad.

²⁹Ma aram me abich fapi girdi’ ngar fosgad; ya ke pi’ Got ngorad e tin yad ba’adag.

³⁰Machane ka dawori gaman u wan’rad ma nap’an ni ku yad be abich,

³¹me damumuw Got ngorad nge thang e fan rok e pi’in nib gel u fithik’rad, ni tin th’abi cheag e pagel nu Israel.

³²Yug aray rogon urngin e pin’ey ma fapi girdi’ e dartalgad ko denen; dariyfan e pi maang’ang ya de pagan’rad ngak.

³³Aram me museg e rran rorad ni gowa bbuwchuth i nifeng ngarm’ad nib tomgin.

³⁴N’apan nra li’ bochiyad, me cheal e tin kabay ngar sulod ngak; miyad pi’ keru’rad ko denen rorad miyad parnag e meybil.

³⁵Me yib ngan’rad ni Got e i yoror rorad, ni en ni Gubin ma Rayag Rok e i yibnag e ayuw ngorad.

³⁶Machane u rogned e thin ni fel’faen; dariy ban’en nrogned nib riyul’.

³⁷Dar yul’yul’gad ngak; ma ku dar yul’yul’gad ko fare m’ag ni bay u thilrad.

³⁸Machane Got e ma runguy e girdi’ rok. I n’agfan u wan’ e denen rorad made thang owcharad. Ba yo’or yay ni i k’adan’ ko damumuw ngi i par nga daken gelngin e damumuw rok.

³⁹Me yib ngan’ ni yad e kemus ni yad e girdi’, ni yad bod e nifeng ni thow me m’ay.

⁴⁰Rib yo’or yay nra togopluwgad ngak u lan e ted ni desert; bo’or yay nra kireb niged lanyan’!

⁴¹Ur sikeng niged Got u bayay nge bayay, ngu’ur amith niged lanyan’ fare Got nib Thothup rok yu Israel.

⁴²Ra paged talin gelngin nib gel nge fa rofen ni chuwegrad u pa’ e to’ogor rorad

⁴³me ngongliy bogi ban’en u fithik’ e sorok nge maang’ang u lan e tafelfel’ u Zoan u lan yu Egypt.

⁴⁴I pilyeg e yupa i lul’ nge ngal’ ni racha’, nge par piyu Egypt ndakriy e ran ni ngar unumed.

⁴⁵Me pi’ e lal nge yib nga fithik’rad nge gafgow nagrad nge kayru ni gathay taferad.

⁴⁶Me pi’ Got e asmen’ing ni lokust nge longuy e woldug rorad me kirebnag e yungi flang rorad.

⁴⁷Me thang owchen e woldug rorad ni grape ko ayis nma mul mul ni bod e malang me li’ e gek’iy ni fig rorad ko ayis nike el.

⁴⁸Me li’ e pi garbaw rorad ko ayis nike el ni bod e malang me li’ e yuran’ i gamanman rorad ko uluch.

⁴⁹I k’aring e tagnan’ ngorad nib gel u mirin e damumuw rok ni pu’og, ni yib ni bogi tamal’oeg ni nge mogothgoth.

⁵⁰Da ki luf bang ko damumuw rok ara ayweg e pogofan rorad, i li’rad ko gechig ni pag ngorad.

⁵¹Me thang owchen e tin nganni’ i fakay ni pumo’on u gubin e tabnaw nu Egypt.

⁵²Ma aram me gafaliy e girdi’ rok nga wuru’ yu Egypt ni bod ba tagafaliy e saf ni pow’iyrad u daken e ted ni desert.

⁵³Dar rusgad ya i pow’iyrad ni dabi buch ban’en rorad; machane, day e yib nge tharey e pi to’ogor rorad.

⁵⁴Me fekrad i yib ko nam rok nib thothup, ko pi burey ni Ir e kol.

⁵⁵I tuluf e girdi’ riy nnap’an ni be yib e tirok e girdi’ i yib; me f’oth e binaw rorad u pa’ e ganong nu Israel me pi’ taferad ko tirok e girdi.

⁵⁶Machane kur pired ni yad be togopluw ngak Got ni Gubin ma Rayag Rok ma yad be sikengnag. Tin ni i yog e darir folgad riy,

⁵⁷ya ur togopluwgad ma kuyad bod e pi chitamangirad kakrom nde ryul’yul’gad, ni gowa ba gan e gat’ing nib bugbug ni dabyag i pagan’uy ngay.

⁵⁸Ra k’aringed e damumuw ngak ko yungi n’en ni yad be tayfan boch e got riy, nge pi liyos rorad ni kari gelnag e damumuw ngak.

⁵⁹Ri damumuw Got nnap’an ni guy e ran’ey, ma aram mri n’ag e girdi’ rok.

⁶⁰Me n’ag e tent rok nu Shiloh, ni aram e gin ni tafen ni i par riy u fithik’mad.

⁶¹Me pag e pi to’ogor romad ngar koled fare Kahol ko M’ag, ni aram e pow u gelngin nge felngin.

⁶²I damumuw ngak e tirok e girdi’ me pagrad nge li’rad e pi to’ogor rorad.

⁶³Pi’in pagel e nli’rad u fithik’ e mael, me par e pi’in rugod ni dakriy be’ ni ngar figirngiyed.

⁶⁴Prist e nli’rad ko saydon, ma pi le’engirad e dan pagrad ni ngar mowawgad.

⁶⁵Me tomur, me od SOMOL ni gowe ki i mol; bod be’ nib mo’on nib gel nike taf daken ni bochan e wayin.

⁶⁶Me tuluf e pi to’ogor rok ngar sulod ni ka ra waergad ma ka ra tamra’gad.

⁶⁷Machane me n’ag e pi’in owchen Josef; ma de mel’eg fare ganong rok Efraim.