Miti Mânec 77:1-19

¹No owa ruruckerâ Anutu wiracnekopac, wiracnehuc mukopac, “Wâwâsic‐nane manac!”

²No ʒârâ hâriŋ dameŋko Wofuŋ wira basac ecneekopac; ŋafeo docke betaŋ tâmiric menane bafahareekopac, maŋ qâqâtâc‐nanezi bâbâmiriŋ qikiŋneekac.

³No Anuture manasurâ husehuc foekopac, manatâc qâtâc ezo mupe maŋnane gâckeekac.

⁴Ʒâŋe‐nane tâpâune bârâŋgeŋketec guŋ tâmiric foekopac, maŋnanezi mezackekume dâŋezo eipieekopac.

⁵Dameŋ esecne juwefukicne i bâjâpehuc wiac fuawec i manasu‐fâreekopac.

⁶No ŋafeo maŋnanezi mana wosâc eekopac â mâro‐nanezi mana gufuc erâ ʒiŋuc wioekopac:

⁷Wofuŋ e bebehe sanaŋ behec‐nâpokac me? Âgo jauŋ mocwâc mi enâreocmu?

⁸Aki anonoc‐ticne ʒicke sanaŋkewec me? Mumupaŋ‐ticnere fârine omatac fuawec me?

⁹Anutu e buuruc enâreocte nikeckewec? Kimbeŋ‐ticnezi miriŋ‐ticne fitec qawec me?

¹⁰Eme mupo, “Femicne mefâre‐ticne hetikiejec, irec erâ bunane qâoriŋkekac.”

¹¹Wofuŋ goki mârâc gie bameŋ i manasupe, jâmbomac, esecne mâsi bameŋ i honehuc ŋepe.

¹²Giege baekic sasawa i mana biric epe, wiac tâpirihec i mana wosâehuc jupe.

¹³O Anutu, gore hata i tiri moc. Anutu sâko‐nâŋec go iŋucne moc wena jukac?

¹⁴Anutu go hâcne mâsi bapa Anutu, ŋicne ŋicne jaŋere ŋondeŋko tâpirige bataniŋkemeŋ.

¹⁵Tâpiri megezi ŋicfâcge firuec‐jopameŋ, Jakobo â Josefe ŋokâfâc‐jekic jaŋe hâcne.

¹⁶O Anutu, opâ jaŋe go honecgurâ fâfârembiŋ, â ʒâkâŋ jaŋe honecgurâ ɋarac ɋarac qambiŋ.

¹⁷Karorac jaŋe opâ hoŋkepie wahawec, sambâŋzi ɋuŋ parandaŋ hewec, tepe motecgezi ŋifec â ŋifec bâricnehuc wahambiŋ.

¹⁸Mâŋâŋ ʒâkiriŋkeme ɋuŋgere fânâŋ fuawec, bâbâriczi hae mâreŋ batamaewec, mâreŋzi fâfârerâ ɋiɋiteckewec.

¹⁹Hatage hâwec fofotâc âte rameŋ, kikegezi ʒâkâŋ sâko fotâcnemeŋ, eme sifu kike hatage mi honekicne.