YƐSÃÃ 77:1-19

¹Bɛdèmbɛ̀ kóo kótì Yedutunni tĩ̀nnì dìèmmɛ̀ Asɑfu yɛ̀nfɛ̀.

²N kuɔ̀mmu kɛ yu Kuyie, n yu Kuyie nku kɛ̀ kù yo n dɑbònnì.

³N tɑ mɛyɛǹcɑɑ̀rìmɛ̀ miɛkɛ nkɛ kɛ wɑɑ̀ n Yiɛ̀ nKuyie, nh ɔ̃ nyié nkɛ yuo nnɔu nsi kù bíɛ́kɛ̀ bɑ́ mbɑ́ɑ́ ɔu, kɛ yetírí bɛ̀ bo m bɑ́ntɛ̀mɛ̀.

⁴Nh ɔ̃ nkɛ̀ n dèntɛní Kuyie nkpɛ́í nní nkuɔ̀mmu, kɛ̀ n sìɛ n yɛ̀mmɛ̀ mɛ̀ ɔ̃ɔ̃ cɑɑ̀rɛ̀mu.

⁵Nɛ̀ ɑ kpɛ́í n nɔ̀nfɛ̀ ɔ̃ɔ̃ í nhũ̀ṹ, dɛ̀ n kɔɔ́nnɛ̀mu n yí nɔ nkɛ nɑ́ɑ́.

⁶N kpɑɑ́ yɛ̃́ dɛ̀ do dòmmɛ̀ mmɛ, n kpɑɑ́ kɛ denniní nyɛbie yɛ̀ɛ̀ pɛ̃ɛ̃tɛ́ yɛ̀nyɛ.

⁷N do ɔ̃ ndiè nyìì yìɛ̀ nyiì ɔ̃ nyié nkɛ bo n yɛ̀mmɛ̀, kɛ̀ n wentí kɛ totí n yɛ̀mmɛ̀, kɛ siɛmu kɛ bo tì bɑntɛ́.

⁸N Yiɛ̀ nKuyie, ɑ ti dootóomu kɛ̀ dɛ̀ dèèɑ̀? A bɑ́ɑ́ wɛ̃tɛ kɛ́dentɛní ti kpɛ́ínnɑ́ɑ̀?

⁹A sɑ̀ɑ̀ ndèèmu sɑ̃́ɑ̃̀? A nɑ̀kɛ́ tì í kpɑɑ́ bo dɔɔ̀ dibenni mɑrɑ̀ɑ̀?

¹⁰Kuyie nhɑ tɛ̃́nkɛ í mɔkɛ mɛsémmɑ̀ɑ̀? Kɛmiɛkɛ kɛɛ̀ te kɑ̀ɑ í ti kuɔ̀ mɛsémmɑ̀ɑ̀?

¹¹Kɛ̀ m bɛ́i kɛ dɔ̀: Dɛ̀ɛ̀ n yóù dɛɛ̀ tu Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku nɔ̀ùtɛ̀ tɛ̃́nkɛ í bomɛ̀ n yĩ́nkɛ̀.

¹²N Yiɛ̀ nKuyie n yí yóó yɛ̃̀ nhɑ pĩ́ mùù tɔ̃mmú, m mɔ́mmuɔ n kpɑɑ́ wúómmu tidiɛtì ɑ do dɔ̀ɔ̀ tì.

¹³N totimu n yɛ̀mmɛ̀ mutɔ̃mmú mumɔu ɑ do pĩ mmù ĩ́nkɛ̀, n siɛmumu mutɔ̃ndiɛmù ɑ do dɔ̀ɔ̀ mù kpɛ́í.

¹⁴Kuyie nhɑ kó kucɛ sɑ̀mu. Kuyie, kɛ̀ dɛ̀ í tú fɔ̃́ nkutɛkù mɑkù í bo kɛ dɑ mɑ̀nnɛ̀.

¹⁵Kuyie, fɔ̃́ɔ̃̀ dɔ̀ɔ̀ri tidiɛtì, fɔ̃́ɔ̃̀ bɛnkɛ ɑ wɛ̃rímú yɛbotɛ̀.

¹⁶Nɛ̀ ɑ wɛ̃rímú mmu ɑ dɛɛtɛ́mɛ̀ ɑ nìtìbɛ̀, Sɑkɔbu yɑɑ̀bí nɛ̀ Sosɛfu kpɛyi.

¹⁷Kuyie, mɛniɛ ndo yɑ̀ fɔ̃́ nwe, mɛ̀ do dɑ yɑ̀mu kɛ́fɑ̃ntɛ, kɛ̀ dɑ̀mɛ́ɛ̀rì fũ̀ɔ̃̀ kó mɛniɛ nkutìrɛ̀.

¹⁸Kɛ̀ yɛwɛtɛ̀ɛ cóúnní mɛniɛ, nkɛ̀ itɑpíɛ nyiɛ̀ní, kɛ̀ itɑpíɛ ntú níɛ́ɛ́ tipíìtì timɔu.

¹⁹Kɛ̀ fɛtɑɑfɛ̀ mpɛ́ú kɛ̀ kuyɑɑkù fĩ, kɛ̀ fɛtɑɑfɛ̀ mìí kɛ̀ dɛ̀ɛ wenkɛ kɛtenkɛ̀ kɛmɔu, kɛ̀ kɛtenkɛ̀ɛ ɑɑ́ kɛ́sɑ̃ntɛ̀.