Miti Mânec 61:1-8

¹O Anutu, go wiwira‐nane manac, nunumu‐nanere hazec râec.

²Hâhâwicte hobu‐nane taŋtaŋ âeckekac; mâreŋ qaŋeŋnao domahuc wira‐garekopac. Qânâ ʒorao, nahac fefenere sâc mi ekac, ira jowacnu fezemec.

³Go hâcne sâsâoc‐nane, râsire maio huec sanaŋ enarekic.

⁴Dameŋ sâc gore qoruc bozeo ŋec juc ezapo! Fakecgere rurumaŋko soŋkerâ juzapo me!

⁵O Anutu, go mumupaŋ‐nane manameŋ, ehuc ʒâŋege araŋ bacneeŋgopieŋ, jaŋehec merâfâc qikiŋne‐naremeŋ.

⁶Ŋicwofuŋ juju‐ticne bâʒorazemec, eme jara bocjaha jurahuc juzejec.

⁷E Anutu gore maio ŋeŋe‐ticnao ŋesanaŋkezejec, mutecne aki anonoc â jauŋ fârizi hone maiŋ ecnehuc juzejec.

⁸Eme no mumupaŋ‐nanere fârine ʒoaŋ sâc bâfuahuc, ʒâŋege mumumbiaŋ gae hecnehuc jaha juzepac.