Pisalem 61:1-8

¹Meenei God, hagalongo mai gi dagu gahigahi. Hagalongo mai gi dagu dalodalo!

²I lodo hua dogu manawa gee mo dogu mogowaa i dogu guongo, gei au e gahigahi Goe! Lahia au gi di gowaa dela e noho iei au humalia,

³idimaa Goe go dogu abaaba, dogu Dangada daa maaloo dela e hai baahi gi ogu hagadaumee.

⁴Heia au gii noho i lodo doo hale dabu i di waalooloo o dogu mouli, mo di noho humalia i lala di malu o bakau.

⁵Meenei God, Goe gu longono agu hagababa, gei Goe gu gaamai gi di au nia mee o digau ala e hagalaamua Goe.

⁶Haga waalooloo ina di mouli o di king. Heia a mee gi mouli hua beelaa!

⁷Meenei God, heia a mee gi dagi hua beelaa i oo mua gaa hana hua beelaa, dono hagaodi ai. Abaaba ina a mee gi do aloho dee modu mo do manawa dahi.

⁸Gei au ga dadaahili laa i nia madagoaa huogodoo e hagaamu Goe, i dogu madagoaa ma gaa hai agu tigidaumaha i nia laangi huogodoo adu gi di Goe i agu mee ala ne hagababa.