Miti Mânec 35:12-25

¹²Jaŋe wiac biaŋnere okacne sâqocne bâtikie‐nareeŋgopieŋ, enarekupie bekâ mâsiŋ iŋucne jukopac.

¹³No ine huc bacjopame busâqoc ŋaqi rojupo, sowa juhuc sahac‐nane qapo, qizeczi dunduŋ hurâ numuhuc jupo.

¹⁴Âgo qomâ moc hâmome eeŋgopieŋ irec sâc epo, me neŋgoc‐nane hâmome ezapo, irec sâc dunduŋ dadape rac warec jupo.

¹⁵No dâŋzi fâfâcnume ine aŋac‐jopaha tureŋgopieŋ, no wiac enareniŋte manasuhuc tumaŋneŋgopieŋ; ŋic pâpârâcne, ʒâŋe furu‐nane, iŋucnezi musoriŋnuhuc domaŋgopieŋ.

¹⁶Jaŋe sâke kiki dâŋ muhuc muhuc, noraopec mic kikiaric kiŋgopieŋ.

¹⁷Wofuŋ, go hone qâoma eku mo dameŋko behecmu? Ʒika‐jeŋickonec bataracnuc, juju‐nane laioŋ mickonec batarac.

¹⁸Eme no tutumaŋ sâkoo daŋge gazapemu, ŋic guru dindiŋko mumbiaŋgupemu.

¹⁹Maŋgâŋ râsi enareeŋgopieŋ jaŋe mana‐jaretec, sowine wiac fuacnekac muhuc mi aŋac‐jopazejec; â fuŋne tâmiric qaisocnueŋgopieŋ jaŋe ʒâŋe bazuc mi enarenʒepieŋ.

²⁰Jaŋe wamadâŋ mi mueŋgopieŋ; erâ ŋic wamane juraŋgopieŋ jaŋe ine eatuc‐jopaniŋte mamanasu gie baeŋgopieŋ.

²¹Jaŋe noraopec mâretec aŋkehuc ʒiŋuc muŋgopieŋ: “Jei, ʒâŋe fâri‐nâŋeczi qame honembeneŋ i!”

²²Wofuŋ, go i honemec i! Irec dâŋemâc mi juc! O Wofuŋ, behecnurâ taicko mi juc!

²³O Anutu, Wofuŋ‐nane, qiriŋ qarâ ɋârec, erâ dâŋnane dopeckehuc mutiŋnec.

²⁴Wofuŋ, Anutu‐nane, tiŋnegere sâcko ŋezicnuc, jaŋe nore erâ aŋac mananʒipiŋte.

²⁵Jaŋe maŋzi ʒiŋuc mi munʒepieŋ: “Sowine, iŋuc hâcne fuacneocte mueŋgopeneŋ, nâŋâc sanaŋkekupene juju‐ticne omaekac.”