Miti Mânec 33:11-21

¹¹Wofuŋte mumupaŋ i fofo sanaŋ, maŋticnere mamana biri, i ŋic gaŋne gaŋne jaŋerao fârio qaekac.

¹²Ŋicguru Wofuŋzi Anutu ejarekac jaŋere manape ʒerine ekac, eki rauc‐jopaocte bâwosâec‐jopawec jaŋe hâcne.

¹³Wofuŋ e sambâŋkonec fime wahame, mâreŋŋic sasawa honec‐nâpoekac.

¹⁴Eri ŋeŋe‐ticnao ŋeha ʒâŋenezi mâreŋte ŋecjucfâc qâuc‐jopa‐fâreekac.

¹⁵Eki hâcne maŋjeŋic ba akic efârewec, erâ wâc eebapa‐jeŋic hone râwiŋne‐fâreekac.

¹⁶Ŋicwofuŋ moc e momori gurufâcne jaŋe sâcne mi ŋezickeniŋmu; â momori moc e tâpiri sâko‐ticnezi sâcne mi baficke‐hâmoocmu.

¹⁷Ʒikare becâsic ere erâ râsi sâcne mi sanaŋke‐jarezo, e tâpiri sâko‐ticnezi rune sâcne mi bafickeocmu.

¹⁸Manaŋgopieŋ, Wofuŋ araŋ bacneeŋgopieŋ, â aki anonoc‐ticnere mamanac jueŋgopieŋ, jaŋe ʒâŋe‐ticnezi hone maiŋ ejareekac,

¹⁹juju‐jeŋic hâmockonec bataraocte, eme roroc dameŋko ɋâricne juniŋte iŋuc eekac.

²⁰Maŋ qâqâtâc‐nâŋeczi Wofuŋte woŋec juekac, e babafic‐nâŋec â maro‐nâŋec.

²¹Jâmbomac, nâŋe tiri ʒâŋe‐ticnao roweckeeŋgopeneŋte ere bubiaŋ manaeŋgopeneŋ.