Text copied!
CopyCompare
Kâte Bible - Miti Mânec - Miti Mânec 22

Miti Mânec 22:5-26

Help us?
Click on verse(s) to share them!
5Wira wâwâsic egarepie asao rocjopameŋ; gorao roweckembiŋte mi qurutuambiŋ.
6No ine ɋâsu, no ŋic mâcne; ŋiczi nifepupu enareŋgopieŋ, ŋic ŋokac jaŋe mana wahacnuŋgopieŋ.
7Honecnueŋgopieŋ jaŋe mururuc enare‐fâreeŋgopieŋ, mecpiroc enarehuc qizec fofotaric enarerâ mueŋgopieŋ:
8“E mamanasiŋ‐ticne Wofuŋtao râeme fowecte eki bataraoc, â ere ecnekacte asa feferaŋko rooc me!”
9Goki hâcne neŋgoc bumaŋkonec enaretec fuapo, goki moŋ nâhuc fohape ŋezicnumeŋ.
10Fuapoonecteaŋ gorao fosiŋnerâ foekopac, neŋgoczi rocnuweckonecteaŋ Anutu‐nane erâ juekic.
11Irec ʒi ʒârâ ʒâpâzi bâmbeŋnukacko, â babafic‐nane moc mi jume honekopacko, goki taicko mi mac junarec.
12Râsi bocjahazi bulimakao iŋucne somâcnuŋgopieŋ, Basaŋkonec bulimakao momori jaŋe orâŋnuŋgopieŋ;
13no maicnuhuc micjeŋic aŋkeŋgopieŋ, laioŋ wânʒâŋ iŋucnezi owacke‐nareŋgopieŋ.
14Opâ iŋucne hoŋnupie ŋeratierâ fokopac, me kike bibiric‐nane ŋetara‐fârejec; buhândâŋ‐nane sâfâ iŋucne ejec, bumaŋ‐naneo oopâne fuahuctecne.
15Tâpiri‐nanezi hahaŋkerâ kuʒi dâkâ iŋucne ejec, nameŋ‐nanezi ŋaŋarac‐naneo bohotakac, hâmocte meo râecnukomec hâcne.
16Ojai, sâqocne bapa guruzi orâŋnuŋgopieŋ, qâto iŋucne rârec bârârec doma raŋgopieŋ, me kike‐nane âke mârâŋkembieŋ.
17Siec‐nane tâtâc fuame sâcne wowosene ekac, râsifâc‐nane jaŋe fipie wareme honecnuhuc kiwaeŋgopieŋ.
18Jaŋe ŋaqi‐nane ɋâsâi qahuc rusâc eŋgopieŋ, â rurufa‐nane rune âke fuaocte ɋâsâi qaŋgopieŋ.
19Erâ Wofuŋ go ine taicko mi juc! Tâpiri‐nane, go ʒocnehec ware baficnuc!
20Juju‐nane ʒikaonec batarac, mocjaha‐mae qâto jaŋere meonec batarac.
21Laioŋ jaŋere michaweckonec rocnuc, kâte bulimakao jaŋere ʒuŋeonec bataracnuc.
22No ʒâŋe biŋege qomâfâc‐nane mutaniŋke‐jarepe, kikefuŋ guruo ʒeri mumuteŋ egarepe:
23“Wofuŋ araŋ bacneeŋgopieŋ ŋoŋe e mumbiaŋkeniŋ, Jakobore ɋâricfâc sasawa, ŋoŋe e sâseniŋ, Israere gurufâc sasawa, ŋoŋe dapecneniŋ.
24Ŋic qarâ suriŋne e ʒârâ hâriŋ fuacneme, mi mana wahacnewec â ere mi takickewec. Erâ ʒâŋe maine mi bâsoŋkecnehuc, ki owa ecneme manawec.”
25Tutumaŋ sâkoo eebapagere mumbiaŋgupemu, go araŋ bagareeŋgopieŋ jaŋere maio mumupaŋ‐nanere tofa bazupemu.
26Qarâ suriŋne jaŋe nâku gapec‐jopazejec; wira basac ecneeŋgopieŋ jaŋe Wofuŋ muteŋkenʒepieŋ; maŋŋeŋic firieha jurahuc junʒepieŋ!

Read Miti Mânec 22Miti Mânec 22
Compare Miti Mânec 22:5-26Miti Mânec 22:5-26