14Opâ iŋucne hoŋnupie ŋeratierâ fokopac, me kike bibiric‐nane ŋetara‐fârejec; buhândâŋ‐nane sâfâ iŋucne ejec, bumaŋ‐naneo oopâne fuahuctecne.
15Tâpiri‐nanezi hahaŋkerâ kuʒi dâkâ iŋucne ejec, nameŋ‐nanezi ŋaŋarac‐naneo bohotakac, hâmocte meo râecnukomec hâcne.
16Ojai, sâqocne bapa guruzi orâŋnuŋgopieŋ, qâto iŋucne rârec bârârec doma raŋgopieŋ, me kike‐nane âke mârâŋkembieŋ.
17Siec‐nane tâtâc fuame sâcne wowosene ekac, râsifâc‐nane jaŋe fipie wareme honecnuhuc kiwaeŋgopieŋ.
18Jaŋe ŋaqi‐nane ɋâsâi qahuc rusâc eŋgopieŋ, â rurufa‐nane rune âke fuaocte ɋâsâi qaŋgopieŋ.
19Erâ Wofuŋ go ine taicko mi juc! Tâpiri‐nane, go ʒocnehec ware baficnuc!
20Juju‐nane ʒikaonec batarac, mocjaha‐mae qâto jaŋere meonec batarac.
21Laioŋ jaŋere michaweckonec rocnuc, kâte bulimakao jaŋere ʒuŋeonec bataracnuc.
22No ʒâŋe biŋege qomâfâc‐nane mutaniŋke‐jarepe, kikefuŋ guruo ʒeri mumuteŋ egarepe:
23“Wofuŋ araŋ bacneeŋgopieŋ ŋoŋe e mumbiaŋkeniŋ, Jakobore ɋâricfâc sasawa, ŋoŋe e sâseniŋ, Israere gurufâc sasawa, ŋoŋe dapecneniŋ.
24Ŋic qarâ suriŋne e ʒârâ hâriŋ fuacneme, mi mana wahacnewec â ere mi takickewec. Erâ ʒâŋe maine mi bâsoŋkecnehuc, ki owa ecneme manawec.”
25Tutumaŋ sâkoo eebapagere mumbiaŋgupemu, go araŋ bagareeŋgopieŋ jaŋere maio mumupaŋ‐nanere tofa bazupemu.
26Qarâ suriŋne jaŋe nâku gapec‐jopazejec; wira basac ecneeŋgopieŋ jaŋe Wofuŋ muteŋkenʒepieŋ; maŋŋeŋic firieha jurahuc junʒepieŋ!
27Ŋicne ŋicne jaŋe Wofuŋte manasurâ mâreŋ qaŋeŋnaonec erao fisiniŋmu, qâpuc gurune gurune jaŋe mai‐ticnao fodapeniŋmu.
Miti Mânec 22
Miti Mânec 22:14-27