Miti Mânec 135:2-17

²Wofuŋte ufuŋko domaŋgopieŋ ŋoŋe, Anutu‐nâŋec ufuŋ‐ticnere hae ʒoŋao domaŋgopieŋ ŋoŋe!

³Wofuŋ mumbiaŋkeniŋ, Wofuŋ e uruc jauŋhec. Ʒâŋe‐ticne gae hecneniŋ, e miriŋ biaŋhec.

⁴Wofuŋ e Jakobo sakarewec hâcne, Israezi ere eocte bâwosâewec.

⁵No manakopac, Wofuŋ e kâcɋene; Wofuŋ‐nâŋeczi nemu sasawa siric‐jopakac.

⁶Wofuŋ e wiac maname sâckeme sâc eekac, sambâŋko â mâreŋko, hâwecko â ʒâkâŋ ʒorao.

⁷Eki hâcne mâreŋ qaŋeŋnaonec karorac ejareme fahareeŋgopieŋ, erâ hoere ɋuŋ bâbâric bâfuaekac, â rowaŋ‐ticnaonec mâŋâŋ soreme wareekac.

⁸Eki hâcne Aigita ŋic mârâc fufuafâc‐jeŋic jopawec, ŋic mecne, qowi mecne.

⁹E Aigita mâreŋ gorao mâsi qâreŋ bâfuahuc Farao â ŋicfâcne imac‐jopawec.

¹⁰E ŋicguru bocjaha qâtâtiec‐jopawec, â ŋicwofuŋ tâpirihec qâhâmoc‐jopawec:

¹¹Sihoŋ, Amori ŋic jaŋere ŋicwofuŋ, Ogo, Basaŋ mâreŋte ŋicwofuŋ, â Kanaaŋ mâreŋte ŋicne ŋicne.

¹²Erâ mâreŋ‐jeŋic merâfâc muhuc Israe ŋicfâcne jarewec.

¹³O Wofuŋ, gore ʒâŋe tofamâc foraʒiocmu, Wofuŋ, go ʒâŋe biŋege mimiŋzi ɋâric foocmu.

¹⁴Wofuŋ e ŋicfâcne jaŋere dâŋ dopeckeocmu, â kiŋaŋ qaqafâcne busâqoc mana‐jareocmu.

¹⁵Ŋicne ŋicne jaŋere nemuɋâŋ i siliwa â gol, ŋicmezi ba akic ekicne.

¹⁶Mic fojareha dâŋ mi mueŋgopieŋ; ʒâŋe fojareha wiac moc mi honeeŋgopieŋ.

¹⁷Hazec fojareha sifu dâŋ mi manaeŋgopieŋ; erâ micjeŋicko nokafe moc mi fokac.