1Ʒâhec dameŋko wiac kecʒiŋuc fuaocmu: Wofuŋte ufuŋ irec tikizi qiŋ herâ ŋehuc tiki sasawa jaŋere micne eocmu; ehuc mâreŋ facne qâhuc‐jopa‐fâreocmu, eme ŋic gurune gurune jaŋe heâckerâ ira fisiniŋmu.
2Eme ŋicguru bocjaha jaŋe fisirâ muniŋmu: “Warepie Wofuŋte tikio fenaŋ, Jakobore Anutu ere ufuŋko hâcne. Eme eki hata‐ticne nâzâ nâwotuc eme âtehuc junʒepeneŋ.” Zioŋkonec sâcmutâc dâŋ mu râwiŋneniŋmu, â Jerusalemkonec Wofuŋte dâŋ haŋ baocmu hâcne.
3Eme Wofuŋzi ŋicguru bocjaha ŋondeŋ‐jeŋicko mumutiŋ gie baocmu, ehuc ŋicne ŋicne dâŋ mutiŋne‐jareocmu. Eme jaŋe ʒika‐jeŋic bâtikiepie kinoŋ fuaocmu, â damu‐jeŋiczi gie sâqe eocmu; guru moczi guru moctao râsi moc mi fisiocmu, â ʒikare ʒaʒawie gie i omaeocmu.
4Jaŋe ru sâc waiŋ â jâmbo gie‐jeŋicko ŋec juc efâreniŋmu, ehame moczi moc hâhâwic mi hejareocmu. Anutu Tâpiri Ɋuŋɋasaŋ Wofuŋ ere micdâŋ iŋuc.
5Ŋic gurune gurune jaŋe ru sâc nemufâc‐jeŋic jaŋere ʒâŋeo roweckehuc jueŋgopieŋ, nâŋe ine Wofuŋ Anutu‐nâŋec ere ʒâŋeo roweckehuc junaŋmu sanaŋ.
6Wofuŋzi ʒiŋuc mukac: No dameŋ ira ŋic puriŋne jaŋe hetumaŋ‐jopapemu, ehuc qa bâtâtiec ejarekicne, erâ qa bâʒâic ejarepo jaŋe henusuc‐jopapemu.
7Puriŋne jaŋe ukicne juniŋte rocjopapemu, â taicko bacjopa rakicne jaŋe ŋicguru sâko bacjopapemu, eme Wofuŋ no Zioŋ tikio dameŋ ʒiŋuczia fuŋkerâ wofuŋ ejare rahuc jupemu sanaŋ.
8O lama soŋaŋ jaŋere ficsanaŋ, Zioŋ otâ‐ticnere tiki go, mârâc jaha gorao ŋicwofuŋ juju fowec, Jerusalem haere uucmaŋ hâcne, i mocwâc fua‐garezejec.
9Go wemocte kio owa sâko ekomec? Go ŋicwofuŋ moc mi jugarekac me? Me dâŋte babaficge sipirickewecte ŋokac gozi kicjopame ʒâic manaeŋgopieŋ irec sâc ekomec me?
10O Zioŋte otâ, go ŋokac jaŋe gozi kicjopame foc fotikic ehuc kio huse eeŋgopieŋ irec sâc ejâmbâŋkezemec. Go miŋecnea hae ʒi beherâ tomao ju fofo raku Babe haeo fisizemec. Ira juhaŋtec Wofuŋzi firuecguhuc râsifâcge jaŋere meonec bataracguocmu.
11Ʒi ine ŋicguru bocjahazi qâturerâ râsi egarehuc ʒiŋuc mueŋgopieŋ: “Zioŋ e ro waha âte ecnezo, eme wiac hâhâwicne fuacneme hone ʒiziwenʒepeneŋ.”
12Jaŋe Wofuŋzi wiac manaekac i mi mana taraeŋgopieŋ, â mamana biri‐ticnere kâuc baeŋgopieŋ. Eki hâcne padi iŋucne dâtâc‐joparâ bâbâmârâŋ tomao râe guruc ejarewec.
13O Zioŋte otâ, go faharerâ bâbâmârâŋ gie bac, eme no ʒuŋege aeŋzi bagarepemu, â kike sârâge aeŋ bâbâroŋzi râe‐garepemu, eme go ŋicguru bocjaha henʒaŋ qanʒaŋ‐joparâ wiac‐jeŋic hure hemârec embiŋ i Wofuŋte biŋe qazemec, â mafa mâriri wiac‐jeŋic i mâreŋ sâko mâreŋ irec Wofuŋ ere biŋe râezemec.
