1Jei, wiac hehesicne eniŋte fofo‐jeŋicko fohuc manasu biric eeŋgopieŋ, eme tâpiri fojarekacte hae fureme fârine bâfuaeŋgopieŋ.
2Jaŋe giegaŋte andac ehuc kâŋgâc jowac roeŋgopieŋ, me ficte andac ehuc ro rauc eeŋgopieŋ; jaŋe ŋic moc â wiacfâcne ro waha âte ejarehuc mâreŋ wiac‐jeŋic jowac roeŋgopieŋ.
3Irec Wofuŋzi kecʒiŋuc mukac: Manaŋgopieŋ, ŋic iŋucne wiac hâhâwicnezi kidapec‐jopaocte manasu biric ekopac, i fua‐ŋareme sâcne mi hetaraniŋmu, erâ wemocko mocwâc qâhâŋnerâ sâke fific eniŋmu, i dameŋ hâhâwicne fuaocmu hâcne.
4Dameŋ ira âke sisic gae moc heŋareniŋmu, ehuc ki busâqoc erâ ʒiŋuc muniŋmu: “Nâŋe sipirickeŋgopeneŋ; jei, mâreŋ‐nâŋec i ŋic jabane jaŋere meo râeme fekac, e jâmbomac gie wiac‐nâŋec nâwoc rorâ kâpâcwâru bacnâpoŋgopieŋ jaŋe bâtâc bajarekac i!”
5Iŋuc fuame Wofuŋte kikefuŋko ŋic moczi giegaŋ rukec mocwâc mi qanâreocmu.
6Ŋoŋe mueŋgopieŋ: “Miti muhuc dâŋ wiac iŋucne mi muzo, mimi i wemocko fai‐nâŋecko feocmu.”
7Jakobore kikefuŋ i sâweckekicne me? Me Wofuŋ e maŋʒârâ‐ticnehec me? Eki wiac iŋuc moc eekac me? Tiŋne hatao jueŋgopieŋ jaŋe dâŋticnezi mi jauŋ‐jopaekac me?
8Ŋoŋe hâcne ŋicfâc‐nane râsi ejareeŋgopieŋ, â ŋic wawahane ŋaqi hetara‐jareeŋgopieŋ, jaŋe maŋhumuc juhuc sicne fotâc ehapie â ʒikare moc mi manasuhapie iŋuc ejareeŋgopieŋ.
9Erâ ŋicfâc‐nane jaŋere ŋokacfâc fic hae biaŋ‐jeŋickonec jâpec‐jopaeŋgopieŋ, erâ ɋiefâc‐jeŋic wiac tahac‐jopapo i jowac rosanaŋkeeŋgopieŋ. Ehuc ʒiŋuc jazaeŋgopieŋ:
10“Ajoc, fahare ratâmireniŋ, ʒira ŋeŋe mana hae mâcne, ʒi wâwânâŋ fokacte sisipiric ima‐ticnehec fuaocmu.”
11“Waiŋ â opâ momori irec dâŋ ŋazape,” ŋic moczi fisirâ burec â sawadâŋ iŋuc jazame muzac ere manapie miti mumuŋic‐jeŋic ezac.
12O Jakobore ɋâricfâc, no ʒeŋgoma hetumaŋ‐ŋopapemu, â Israe nâfocne ro nusec ejarepemu. Henusuc‐jopape ture‐fâreniŋmu, lama jaŋe sapao feeŋgopieŋ, â sopâcko heâckeeŋgopieŋ irec sâc. Ŋic guru sâko micʒonʒoŋ‐jeŋic fuaocmu.
13Micne baocmuzi aka bârâriehuc bânie‐jareme quruŋ herâ motâc fotâcnehuc waharâ raniŋmu. Eme Wofuŋ e Femicne‐jeŋiczi bânie‐jarehuc micne‐jeŋic eocmu.
