1Eme no ʒiŋuc mupo: “Jakobore kâcɋenefâc, â Israe kikefuŋte micne guru, ŋoŋe mananiŋ: Ŋoŋe hâcne tiŋne jujure guriŋ baniŋte muŋarekicne i!
2Ŋoŋe ine wiac biaŋne qikiŋneeŋgopieŋ, â sâqocnere manapie aŋacne eekac; ŋoŋe ŋicfâc‐nane jaŋere sahac âkehockeeŋgopieŋ, ehuc siec‐jeŋickonec biuc‐jeŋic hehockeeŋgopieŋ.
3Ŋoŋe ŋicfâc‐nane jaŋere biuc nâeŋgopieŋ, â sahac‐jeŋic âkehockerâ siec‐jeŋic qazu qanʒaŋ eeŋgopieŋ; ŋoŋe bec qowi oto kuʒio râeniŋte dâkâ pitic baeŋgopieŋ, irec sâc hetâc qâtâc‐jopaeŋgopieŋ hâcne.”
4Eme jaŋe juku Wofuŋ wira wâwâsic ecnepie micjeŋicko mi roocmu; jaŋe hehesic bâfuambiŋte ʒâŋe mai‐ticne bâsoŋke‐jareocmu.
5Ŋicfâc‐nane eatuc‐jopapie qâsorieeŋgopieŋ, micjeŋicko nânâ fome “Wama” mueŋgopieŋ, â nânâ wiac jare gumec mi epie râsi ejareeŋgopieŋ, porofete iŋucne jaŋere Wofuŋzi ʒiŋuc mukac:
6“Ŋoŋerao dapâc fuame maŋʒâŋe‐ŋeŋic hâpome wiac mocwâc mi honenʒepieŋ, erâ maŋmutuc fua‐ŋareme findaŋdâŋ muniŋte eipienʒepieŋ. Porofete ŋoŋe tatamaczi mocwâc mi tamae‐ŋarezejec, gâpâreme ŋoŋerao dapâc fuazejec.
7Ehame porofete ŋoŋere faio mimi fezejec, â faŋfaŋdâŋ mumu ŋic ŋoŋe qurutuanʒepieŋ, ehuc Anuturaonec dâŋ mi fua‐ŋareme busâqoc manahuc micbipic‐ŋeŋic bâsoŋke‐fârenʒepieŋ.”
8Noni ine Jakobore kikefuŋ qaqatara‐jeŋic â Israe ŋic hehesic‐jeŋic jaza jowatuc epemurâ Wofuŋtaonec tâpiri â Mâro â tiŋne juju erâ hâbi rorâ juekopac.
9Jakobo kikefuŋte kâcɋenefâc, â Israe kikefuŋte micne guru ŋoŋe dâŋ ʒi mananiŋ! Ŋoŋe hâcne mumutiŋ dâŋ qaisockeeŋgopieŋ, â wiac sasawa tiŋne foha esifuckeeŋgopieŋ.
10Meŋeŋicko soc bohotarâ foha Zioŋko fic hae baeŋgopieŋ, â bâbâsifuc bâfuahuc Jerusalem hae heɋârerâ baeŋgopieŋ.
11Fekicnefâc‐ticne jaŋe bâbâmiriŋ wiac rohuc ŋic dâŋjeŋic mutaraeŋgopieŋ, â taha bapafâc‐ticne jaŋe furire erâ ŋicfâc‐jeŋic dâŋ jaza mutâc eeŋgopieŋ, erâ porofete jaŋe moneŋte erâ findaŋdâŋ mueŋgopieŋ. Ehuc sifu Wofuŋtao roweckeeŋgopeneŋ muhuc ʒiŋuc mueŋgopieŋ: “Wofuŋ e ŋondeŋ‐nâŋecko jukac, irec wiac hâhâwicne moc mi fua‐nâreocmu.”
12Irec ŋoŋere erâ Zioŋ i giere mâreŋ iŋucne bâfâuckenʒepieŋ, â Jerusalem hae i sesucne fuarâ fozejec, erâ taha ufuŋte tikio ine kâte uupic fuazejec.
