Misee 4

1

2

3

4

5

6

7

¹Sɑɑ ɡɑɑ sisi yè sɔɔ ɡuu tèn mi Yinni Gusunɔn sɑ̃ɑ yerɑ rɑɑ ɡire, tɑ koo ɡuu ni nu tie bɛɛrɛ kerɑ. Kpɑ bwese dɑbinu nu nɑ mi,

²nu nɛɛ, i nɑ su dɑ Yerusɑlɛmuɔ Yinni Gusunɔn ɡuurɔ mi Isirelibɑ bɑ rɑ nùn sɑ̃, kpɑ u sun win swɛɛ sɔ̃ɔsi su sĩ yi sɔɔ. Min diyɑ u koo win woodɑ yɑrɑ kpɑ u ɡɑri ɡerumɑ.

³U koo bwese dɑbinu siri, ni nu dɑm mɔ nu nɑ tontonden di. Kpɑ bwese ni, nu nin tɑkobibɑ bɔɔri nu kɑ tebonu seku. Mɛyɑ nu koo nin yɑɑsi bɔɔri nu wobɑ so. Bweseru ɡɑrɑ kun ɡɑru seesimɔ. Bɑ ǹ mɑɑ tɑbun ɡɑri mɔ̀ ben suunu sɔɔ.

⁴Bɑɑwure u ko n wɑ̃ɑ win ɡberu kpɑɑnɛɔ bɔri yɛndu sɔɔ. Goo kun mɑɑ nùn nɑndɑsiɑmɔ. Gusunɔ wɔllu kɑ tem Yinniwɑ u yeni ɡeruɑ.

⁵Bweseru bɑɑtere tɑ rɑ kɑ̃wɑ tu ten bũu mɛm nɔɔwɑ. Adɑmɑ bɛsɛ, Gusunɔ bɛsɛn Yinniwɑ sɑ ko mɛm nɔɔwɑ sere kɑ bɑɑdommɑɔ.

⁶Tɔ̃ru ɡɑrɑ sisi tè sɔɔ kon be bɑ mɛɛrɑ kuɑ mɛnnɑ, kpɑ n be bɑ kpikiru suɑ sokusiɑmɑ, be, be nɑ rɑɑ nɔni sɔ̃ɔwɑ mi.

⁷Kon be bɑ mɛɛrɑ kuɑ mi mɛnnɑ. Kpɑ be, bɑ n sɑ̃ɑ nɛn tɔmbun sukum mɛ mu tie. Kpɑ n be, be bɑ rɑɑ kpikiru suɑ mi ko bwese dɑmɡiru. Kpɑ nɛ, Yinni Gusunɔ nɑ n sɑ̃ɑ ben sunɔ Siɔniɔ sere kɑ bɑɑdommɑɔ.

⁸Wunɛ Yerusɑlɛmun ɡuuru, wunɛ wi ɑ sɑ̃ɑ nɡe wuu kɔ̃sobun diru, ɑ tɔmbu kɔ̃su, kɑɑ mɑɑ wunɛn bɛɛrɛ wɑ nɡe yellu. Domi Yerusɑlɛmu yɑ koo kpɑm ko Isirelibɑn wuu mɑro.

⁹Mbɑn sɔ̃nɑ i kuuki mɔ̀ bɛɛ Yerusɑlɛmuɡibu. Mbɑn sɔ̃nɑ i tii tɛ̃birimɔ nɡe tɔn kurɔ wi kĩ u mɑ. Mɑnɑ bɛɛn sunɔ u wɑ̃ɑ. Mɑnɑ bɛɛn bwisi kɛ̃ɔbu bɑ dɑ.

¹⁰Bɛɛ Yerusɑlɛmuɡibu, i wuri koowo nɡe tɔn kurɔ wi u yiire u kĩ u mɑ. Domi tɛ̃, i ko i yɑri Yerusɑlɛmun di. Kpɑ i dɑ i n wɑ̃ɑ yɑkɑsɔ. Bɑ koo kɑ bɛɛ dɑ sere Bɑbiloniɔ. Adɑmɑ Yinni Gusunɔ u koo rɑ bɛɛ yɑkiɑmɑ min di. Kpɑ u bɛɛ wɔrɑ bɛɛn yibɛrɛbɑn nɔmɑn di.

¹¹Tɛ̃, bwese dɑbinu nu mɛnnɑmɔ nu kɑ bɛɛ seesi. Nu mɔ̀, su de ben wuu Yerusɑlɛmu ye, yu bɛɛrɛ biɑ, yu ko bɑnsu. Kpɑ sɑ n su mɛɛrɑ.

¹²Adɑmɑ tɔn be, bɑ ǹ yɛ̃ himbɑ ye Yinni Gusunɔ u yi win tɔmbun sɔ̃. Bɑ ǹ win bwisikunu yɛ̃. U kĩ u bu mɛnnɑ nɡe ɑlikɑmɑ ye bɑ subɑ mi bɑ rɑ ye so.

¹³Yinni Gusunɔ u nɛɛ, bɛɛ Yerusɑlɛmuɡibu, i seewo i bɛɛn yibɛrɛbɑ so nɡe ɑlikɑmɑ. Kon de i n dɑm mɔ nɡe kɛtɛn kɔbɑ ye yɑ dɑm mɔ nɡe sisu. Mɑ yen nɑɑ konnu nu dɑm mɔ nɡe sii ɡɑndu. I ko i bwese dɑbinu munkuwɑ. Kpɑ i ben ɑrumɑni ɡeɑ mwɑ i nɛ Gusunɔ tem kpuron Yinni yiiyɑ.

¹⁴Adɑmɑ bɛɛ Yerusɑlɛmuɡibu, i bɛɛn tɑbu kowobu mɛnnɑmɑ. Wee bɑ bɛɛ tɑrusi. Mɑ bɑ bɛɛn sinɑ boko soomɔ bɑɑnɔ kɑ bokunu.