Menge Ininang 22:3-14

³“Siaken se doma niyo Judiyo. Timebaw a doton te Tarso, sebad lonsod doton te Silisya. Timilles a dini te Jerusalem. Si Gamaliel se meistro migtoladà kanak. Mig-iling a te kedita te punù egtoloen te kemonaan tadon. Measeb a egtolò te Timanem onawa te keaseb niyo songkani.

⁴Yan se doun te nemilang a te otaw egpemenal ki Jesus aw inimetayan ko dan, so eden ko aw yan se ibeg te Timanem. Doen heman dinakep ko aw kineleboso ko, pengkey meama aw bayi.

⁵Netegahan iyan te ontò pengolo te simbahan aw kedita te menge obanen, so sikandan se simolat diyà te doma dan doton te Damasko te mepakay aw domoton a amon dekepen ko se menge otaw nemenal ki Jesus, so ibeg ko ibingen ko dan dini te Jerusalem amon ipelumun.

⁶Meneng sagwa agpet den alas dosi, aw medapag a den doton te Damasko, pegketà nesogatan a te anyag lekat te langit.

⁷Nekelangkeb a diyà te tanà, aw doen dinineg ko minikagi, ‘E Saulo, nengà lay egpemilang ka kanak?’

⁸Penga niyan, minikagi a, ‘Sir, sinu ka lay?’ Yan timaba se Pengolo, ‘Siaken si Jesus tege Nasarit se egpemilangen nikaw.’

⁹Pengkey kinità te menge otaw dimoma kanak se peg-anyag, meneng wedà dan kelebeti se kagi te sìyan minikagi kanak.

¹⁰Mig-insà a, ‘Pengolo, eden lay se inangen ko?’ Yan minikagi se Pengolo, ‘Tindeg ka aw deleg ka doton te Damasko. Yan indanan ka aw eden se keilangan inangen nikaw.’

¹¹Wedà a pekekità tandà te anyag lekat te langit, meneng inagak a te doma ko pesalo doton te Damasko.

¹²Doen sebad otaw eg-ogpà kidoen si Ananias ontò measeb egtolò te punù ingkeliwat i Moises aw induyun te kedita te Judiyo.

¹³Dimateng sikandin diyà kanak aw minikagi, ‘Kedowa ko, bekahi se mata no, so todà ka komità.’ Na, pegketà nekekità a kandin.

¹⁴Minikagi si Ananias, ‘Tapay ka pinemallì te Timanem egseligan te kemonaan ta, amon metaga-taga ka te ibeg din. Pinemallì ka din amon komità ka te batà din, aw amon domineg ka te kagi din, aw netoman den iyan.