Aposel 22:3-14

³Ma iy asehek ili le anya, “Jo badu Juwis, tine tuwi jo badeh, udu kon rakon iri aloh Silisiya udu bolo kon tinan Tasus. Arile, jo ma bwisik, jo ili akohok tanan ta leheya ma jo asahan ili awas badeh, udu kon tinan Jerusalem dah. Bolo len doh, ndramak tinan taha ari nyaran Gamaliyel badeh, leheya jo. Ma jo badeh, akohok tanan handru ta iri kandriyen malen mari ta tubu taha Moses. Jo abadok ma asahan boto-on ta in hamon le ta Kindrei, ta iri sahou tan, i buku le aha lau marakon nane are kada-ah amekes.

⁴Bwena mene jo bokoro-ei iri lau a-en hamon ta San ta Jises, andra-i labai. Ma jo anya kidi iri kamak ka-au. Jo badeh, bawei iri mwan ma badih na sen, ano akahei iri ala are bolo asiu lulik.

⁵Iri tinan tiri pris tataha hawe iri kansol mari badu Juwis are kede-eh, iri winiyan asehek sahou mari doh ewek taha, ta jo basehek sahou wendreya, ta iri lakou nane doh bwe. Iri lau mene torowenei la-ukei ramen ili tiri Juwis are Damaskus, iri atehei eme minek, ta jo kili kateu iri lau doh, kabawei iri na sen, ma kandrei iri kame Jerusalem ta iri lau tinan tataha kadeu maha-an ki tiri.”

⁶Pol asehek i tiri i buku doh, “An udu halas badeh, jo edek ndrame mirihik labai ta kon tinan Damaskus. Se nawin bwe, sun ari lomadan tinan labai anya udu kandrah eme andri awudi jo mara-ei.

⁷Ma jo atarah i andri bada munyak, ma ndranyek anuhun ndramak ari aloh jo i buku doh, ‘Sol, Sol, tasah handru ou anya adai jo kimek?’

⁸“Eme ma jo asumon bohon i buku doh, ‘Laban, ou are lau badeh?’ Eme iy anya, ‘Jo Jises badu Nasaret, ou nane abo gok ta adai jo kede-eh!’

⁹Ya oro lau rayah nane adek hawek badeh, anyolom lomada sun doh, arile oro banuhun boho ndramak nane asehek sahou eme tek bwe.

¹⁰“Eme ma jo ndremenya iy ja, ‘Laban, ou aso-ok jo kamekes saba lakou tam handru?’ “Ma Laban tiye sahou eme tek i buku doh, ‘Ya, ou suri ou ma ou ala bolo kon tinan Damaskus, ya ndramak ari kameh tiye tam ta lakou marakon Kindrei aso-ok ou amekes.’

¹¹Madak ma la-uh badeh, ilik mara-ei, tasah lomada sun nane doh, lomadan tinan labai, eme ma oro lau nane adek hawek tawi minek, ma sirini jo iu ili bolo kon tinan Damaskus.

¹²“Ndramak ari nyaran Ananayas, iy udu bolo kon nane doh. Iy lau ta Jises ari ai, len mari badeh, iy in hamon le tiri kandriyen ta batanau, eme ma iri Juwis nane are Damaskus badeh, aso-ok iy tinan labai.

¹³Ya iy eme ales ere mirihik tek, ma iy asehek sahou eme tek i buku doh, ‘Sol, ou nadu tine ahi, na dah kameh ou winiyan anyolom kon ja.’ Sahou ano le bohon badeh, madak asak, ma jo anyolom iy amwenen.

¹⁴“Iy asehek sahou eme tek i buku doh, ‘Kindrei ale mene, tubu taha iri atudun iy badeh, lebelei ou, ma aseken ou akohok tanan tiri lakou marakon iy aso-ok, ma iy aseken ou anyolom iy. Iy badeh, mwasin labai ta madan, ma ou winiyan anuhun iy asehek sahou na bohon amwenen.