Aposotolo Adi Hewau 22:3-14

³“Eau Iudea tauna mamohoina, Tareso eai se labasigu, Kilikia tehana eai, na ina eanua eai ta arinai se abihelaigu Gamaliela aena paana eai, ita tamadayao edi laugagaeo laulaudi se heatakomakomanigu, eau hinage Eaubada mo ea nuatuadiadidiriei, doha hinage omi gamagarimiu teina wau ta.

⁴Wau Dobila wa arinai ea hemahemanabaraidi e se mate, ea paidi, ea gabalaedi numa masigiri eai ea toredi, tatao eo sisine.

⁵Kohena lailai hinage, eo babada gamagamagari egu riba se awamamohoiei: uriuri ea abidi ehadayao enadi, abo ea lau Damaseko eai tatao paipaiauridi nei eai bena ea laedi Ierusalema eai, abo se hemata’iladi.

⁶“Dobila eai ea laulau, Damaseko ea hanahanaui asuasubenalai eai, marana lailai i sinaigu, galewa eai i sinadobima.

⁷Ea guridobi tano eai, arina esau ea ataiei, i ribalaoma arigu eai i ene, ‘Saulo e, Saulo e, ue saha u hegadotoagu ta?’

⁸Ena riba ea heuio ea ene, ‘Guiau e, oa hede eai?’ Ia abo i ribalaoma arigu eai i ene, ‘Eau Iesu Nasareta tauna, oa ede u hegadotoagu ta.’

⁹Agu sasaguyao maeguyao aie lau wa, marana wa se ita se matausi; na ia wa i ribama arigu eai arinana nige se ataiei.

¹⁰Abo ea ene, ‘Guiau e, saha abo ea abi?’ Guiau enagu ie riba, i ene, ‘U torohai, u lau Damaseko eai, nei eai ginauri gamagamagari bena u abidi, abo se heribam.’

¹¹Marana wa i balebalelem arinai nige ea italoloei, agu sasaguyao se abinimaegu, abo aie lage Damaseko eai.

¹²“Tau esau esana ede Anania, Eaubada taunanabuena, eo laugagaeo taunuatudidinina hinage, Iudea tataodi gamagaridi nei eai se mia si ene ia abi‐lolo tauna,

¹³i laoma gegesigu eai i toro, i ene, ‘Egu tau Saulo e, matam se lala.’ Arinai abo matagu ea helabaisini, ia ea iita.

¹⁴Ia abo i ene, ‘Tamadayao edi Eaubada i itasipoim, i hetorom ena nuatu abo u itadi, Laulau Dudurai Tauna hinage abo u ita, ia awana ribadi hinage abo u ataiedi.