Men Epijuj 6

1

2

3

4

5

6

¹KOMAIL jeri kan peiki on me wia komail ada pan Kaun o, pwe i me pun.

²Kakaki jam om o in om, iei tapin kujoned, me inaupa mia,

³Pwe koe en injenemau o pil maur warai nin jappa.

⁴Komail jam akan der kamakar mal noumail jeri kan, kakair irail ada ni kaian mau o panau on Kaun o.

⁵Komail ladu kan en oke omail jaumaj akan ni pali uduk ni majak o rerer o pil ni tiak en karakarak en monion omail dueta on Krijtuj.

⁶Kaidin janjal mon aramaj eta, pwen konekon re ’rail, a en dueta ladu en Krijtuj, me kin pereperen wiawia kupur en Kot jan monion omail.

⁷O komail en papa mau, pwe on Kaun o, a kaidin on aramaj akan.

⁸Pwe komail aja, me mau kot, me amen pan wiada, Kaun pan katini on i jota lipilipil ij i, ma ladu de me maioda amen.

⁹O komail jaumaj akan en wia dueta on irail, o der jakone irail, pwe komail aja, me arail o pil omail Jaumaj kotikot nanlan, o a jota kotin lipilipil aramaj amen.

¹⁰Ikmuri ri ai kan komail kelaileki Kaun o ni a manaman.

¹¹Purion tatan mauin karoj en Kot, pwe komail en kak kelail palian tewil a widiwidin kan.

¹²Pwe kaidin uduk o nta, me kitail en pei on, a on jaupeidi o manaman akan, o on jaumaj en jappa kan, me kin kakaunda nan rotorot wet, o on kaun nenin en lan akan.

¹³Ari, pweki mepukat komail en ale tatan mauin karoj en Kot, pwe komail en kak kelail ni ran jued, o kajinenda murin omail kapwaiadar meakaroj.

¹⁴Komail ari kajinenda, luke pamail en katenetenki melel o pereki pere pan maramara me pun.

¹⁵O nä omail en kitekit pena, pwen onop on wa jili ronamau en popol.

¹⁶A pil eu pan ko on mepukat: Komail ale perepa en pojon, pwen kakun kila katieu kijiniai en me jued o.

¹⁷Komail pil ale lijorop en kamaur o kodlaj en Nen, me majan en Kot.

¹⁸O podidi on kapakap o wia poekipoeki. Nidinidiki Nen ni meakaroj. O majamajan, o poden kapakapaki jaraui kan karoj.

¹⁹O kapakapa kin ia, pwe i en nil meledok o au ai en jara pajan ai ainar en kaweweda me rir en ronamau.

²⁰Me nai jaunpadakepa, me jalidier, pwe i en kelail on padapadaki, duen me kon on.

²¹A pwe komail en aja ir ai kan, o me i kin wiada, ri atail kompok Tikikuj o papa lelapok en Kaun o, pan padaki on komail meakaroj.

²²I me i kadarala, pwe komail en ajadar ir at akan, o pwe i en kamait monion omail.

²³Popol on ri atail, o limpok ianaki pojon jan ren Kot Jam o Kaun Iejuj Krijtuj!

²⁴Mak en mimi ren karoj, me kin pok on atail Kaun Iejuj Krijtuj kokolata!