EFESIOS 6

1

2

3

4

5

6

¹Queremutic, tsebetic, chꞌunbeic me smantal la atot ameꞌique yuꞌun jech tscꞌan li Cajvaltique.

²Li jun mantal li yaloj Dios ti ta xichꞌ slequilal yutsilal li buchꞌu ta schꞌune, jaꞌ liꞌi: “Ichꞌo ta mucꞌ atot ameꞌ”, xi.

³Li slequilal yutsilal Dios ti chavichꞌique, jaꞌ ti xamuybajic noꞌoxe schiꞌuc ti jal chacuxiic liꞌ ta balumile.

⁴Joꞌoxuc li totil meꞌiloxuque, mu me xasaꞌbeic scꞌacꞌal yoꞌon la avalab anichꞌnabique. Lec noꞌox me xapasic ta mantal jech chac cꞌu chaꞌal lec chispasutic ta mantal li Diose. Chanubtasic ta schꞌunel amantalic jech chlic schꞌunbeic smantal Dios nojtoc. Mi mu schꞌune, tsitsic jech chac cꞌu chaꞌal chistsitsutic yaꞌel li Diose.

⁵Joꞌoxuc li manbiloxuc ta sventa jtunele, chꞌunbeic me smantal la avajvalic li liꞌ ta balumile, aqꞌuic me ta venta. Jaꞌuc me ta sventa Cristo chapasic, jech jun avoꞌon chatunic yuꞌun la avajvalique.

⁶Scotol ora pasic li cꞌusi chayalbeique. Mu me jaꞌuc noꞌox lec chapasic yilel li cꞌalal te sqꞌuelojoxuc la avajvalique ti yoꞌ jaꞌ lec chayilic oe. Ta sloqꞌueluc me avoꞌonic pasic li cꞌusi ta scꞌan li Diose, yuꞌun jaꞌ xa yajtuneloxuc li Cristoe.

⁷Mu me ta sujeluc xaꞌabtejic yuꞌun jaꞌ chatunic yuꞌun li Cajvaltique, maꞌuc noꞌox chatunic yuꞌun li crixchanoetique.

⁸Yuꞌun xanaꞌic ti chijyacꞌbutic jtojoltic li Cajvaltic mi lec li cꞌusi la jpastique, acꞌo mi ochemutic ta jtunel.

⁹Joꞌoxuc li oy avajtunelique, lecuc noj me xapasic ta mantal la avajtunelique, mu me ta uteluc xavalbeic mantal. Naꞌic me ti te oy ti Ajvalil cuꞌuntic ta vinajele. Li Cajvaltique coꞌol chichꞌ jcꞌoptic jcotoltic.

¹⁰Quermanotac, jaꞌ slajeb xa chacalbeic liꞌi. Ta sventa ti avichꞌojic ta mucꞌ li Cajvaltique, oyuc me stsatsal avoꞌonic. Yuꞌun li Cajvaltique echꞌem stsatsal.

¹¹Aqꞌuic me lec la amaquic yaꞌel li yacꞌoj li Diose yoꞌ jech chapasic o ta canal li jloꞌlovaneje, jaꞌ li pucuje. Jech chac cꞌu chaꞌal li soltaroetic ti yichꞌojic smac schꞌutic, schiꞌuc smac stiꞌ yoꞌonic, schiꞌuc xonobic, schiꞌuc smac sjolic, schiꞌuc smac scotol sbecꞌtalic, schiꞌuc smachitaic, yoꞌ jech mu spaseic ta canal. Yuꞌun maꞌuc ta jpastic cꞌop schiꞌuc li buchꞌutic coꞌol oy jbecꞌtaltic jchiꞌuctic schiꞌuc li coꞌol oy jchꞌichꞌeltic jchiꞌuctique. Jaꞌ ta jpastic cꞌop schiꞌuc li buchꞌu mu xquiltique, jaꞌ li banquilal pucuje schiꞌuc li itsꞌinal pucujetique li jaꞌ sventainojic li cꞌustic chopol liꞌ ta balumile. Jaꞌ li oy sjuꞌelique, jaꞌ ti liꞌ ta spasic mantale, ti ep ta xchꞌunbat li smantalique. Jaꞌ yuꞌun tunuc me avuꞌunic scotol la amaquic li yacꞌojbutic li Diose yoꞌ jech mu xaspasic ta canal li cꞌalal chtal sujoxuc ta mulil li pucuje. Yuꞌun mi avichꞌojic scotol la amaquique, jaꞌ stsatsal o avoꞌonic. Li cꞌu sba xuꞌ avuꞌun chapasulanic o ta canale, jaꞌ scꞌan jaꞌ noꞌox chachꞌunic li cꞌusi melele, jaꞌ noꞌox chavalic li cꞌusi melele, jaꞌ noꞌox chapasic li cꞌusi leque. Scꞌan ta yutsil avoꞌon chatunic yuꞌun li Diose yuꞌun muꞌyuc xa amul chayilic. Scꞌan chachꞌunic ti chacolic o sbatel osil ta sventae. Scotol leꞌe jaꞌ amaquic yaꞌel, jaꞌ yuꞌun mu xaspasic ta canal li cꞌustic chopol chacꞌ talel ta atojolic li pucuje. Schiꞌuc scꞌan chtun avuꞌunic li scꞌop Dios ti ta sjules ta ajol ta avoꞌonic li Chꞌul Espíritue yoꞌ jech chapasic o ta canal li pucuje.

¹⁸Scꞌan nojtoc ti chataic ta naꞌel Dios scotol cꞌacꞌal. Cꞌanbeic li Chꞌul Espíritu ti acꞌo yacꞌ ta ajol ta avoꞌonic li staobil ta naꞌel li Diose. Mu me xchꞌay ta avoꞌonic stael ta naꞌel li Diose. Cꞌoponbeic Dios ta stojol scotol cꞌacꞌal eꞌuc li buchꞌutic coꞌol oyoxuc ta scꞌob li Dios achiꞌuquique.

¹⁹Cꞌoponic Dios ta jtojol eꞌuc yoꞌ jech acꞌo yacꞌbun jnaꞌ li cꞌusi chcale jech mu xixiꞌ, yoꞌ jech jamal acꞌo cal ti laj yacꞌ xa jnaꞌtic Dios ti jcotoltic chijcolutic ta sventa li Cristoe.

²⁰Yuꞌun jaꞌ cabtel yacꞌojbun li Diose chcal ti xuꞌ xa chacolique acꞌo mi liꞌ chuculun ta carenae. Jaꞌ yuꞌun cꞌoponic Dios ta jtojol ti jamal acꞌo cal yuꞌun jaꞌ jech scꞌan ta jpas.

²¹Chajtacbeic batel li quermanotic Tíquicoe yoꞌ chayalbeic li cꞌustic icꞌot ta pasel ta jtojole, schiꞌuc li cꞌusi ta jpase, yoꞌ jech ta stsatsub o avoꞌonic yuꞌun chavaꞌiic ti lec oyune. Li Tíquicoe cꞌux ta coꞌontic. Jun yoꞌon ta xtune yuꞌun li Cajvaltique.

²³Ta jcꞌanbe li Jtotic Diose schiꞌuc li Cajvaltic Jesucristoe ti acꞌo spasboxuc ta jun avoꞌonic li jujunoxuque, schiꞌuc ti acꞌo xachꞌunic más ti jaꞌ chascoltaic li Cajvaltique yoꞌ jech más chacꞌuxubinan abaic.

²⁴Acꞌo acꞌbaticuc slequilal yutsilal Dios li buchꞌutic oy o ta yoꞌonic li Cajvaltic Jesucristoe.