ኤፌሶና 6

1

2

3

4

5

6

¹ናቶ፥ ሂንቴና ዬሌዳዋንቶ ጎዳ ቦንቺያዋዳን ኣዛዜቲቴ፤ ኣዪሲ ጎፔ፥ ሃዌ ኦꬃናው ቤሲያዋ።

²«ኔው ኡባባይ ሎዓናዳኒኔ ሳዓን ኔ ላይꬃይ ኣዱቃናዳን፥ ኔ ኣዉዋኔ ኔ ዳዮ ቦንቻ» ጊያ ኣዛዙ ፆሳይ ኢማና ጌዳ ሂዶታና ዴዒያ ኮዪሮ ኣዛዙዋ።

⁴ኣዋቶ፥ ሂንቴ ሂንቴ ናናቱዋ ጎዳ ሴራኒኔ ዞሪያን ዲቺቴፔ ኣቲን፥ ኡንቱንታ ሃንቄꬆፒቴ።

⁵ኣዪላቶ፥ ኪሪስቶሳው ኦꬂያዋዳን፥ ሂንቴ ጎዳቶ ያሻቴꬃኒኔ ኮኮርሳን ሱሬ ዎዛናፔ ኣዛዜቲቴ።

⁶ፆሳይ ጌዳዋ ኦꬂያዋንቱዳን፥ ኪሪስቶሳ ኣዪላቱዋዳን፥ ዎዛናፔ ኦꬂቴፔ ኣቲን፥ ኣሳ ናሼቻናው ኦꬂያዋዳን፥ ኣሳይ ቤዖ ጊዴ ኦꬆፒቴ።

⁷ኣሳው ጊዴናን ጎዳው ኦꬂያዋዳን፥ ꬊቤናን ዎዛናፔ ኦꬂቴ።

⁸ኣዪሌ ጊዲና ዎይ ዎማኑዋ ጊዲና፥ ኢ ኦꬂያ ሎዖ ኦሶ ኡባው ጎዳይ ሁጲያን ሁጲያን ዎዪታናዋ ኤሪታ።

⁹ጎዳቶ፥ ሂንቴ ኣዪሌቱዋ ናሲያዋ ኣጊዴ፥ ኡንቱንቶ ሄዋዳን ኦꬂቴ፤ ሂንቴናኔ ኡንቱንታ ጋꬂ ሞዲያ ጎዳይ፥ ኦናኔ ማዲ ፒርዴናዌ፥ ሳሉዋን ዴዒያዋ ኤሪታ።

¹⁰ዉርሴꬃን፥ ጎዳኒኔ ኣ ዎልቃማ ዎልቃን ኡባ ዎዴ ሚኒቴ።

¹¹ፃላሂያ ኢታ ጪሙዋ ቴዓናው ሂንቴ ዳንዳያና ማላ፥ ፆሳይ ሂንቴንቶ ኢሚያ ኦላ ማዩዋ ኡባ ማዪቴ።

¹²ኣዪሲ ጎፔ፥ ኑኒ ቦላ ሳሉዋ ዴዒያ ኢታ ኣያና ዎልቃቱዋና፥ ሞዲያዋንቱና፥ ጎዳቴꬃይ ዴዒያዋንቱናኔ ሃ ꬉማ ቢታ ሞዲያዋንቱና ኦሌቲያዋፔ ኣቲን፥ ኣሳና ኦሌቶኮ።

¹³ሄዋ ዲራው፥ ኢታ ጋላሳን ቴዓናዉኔ ቃሲ ዉርሴꬃይ ጋካናው ዋꬌቶዋፔ ጉዪያን፥ ሚኒ ኤቃናው ሂንቴ ዳንዳያና ማላ፥ ፆሳ ኦላ ሚሻ ኡባ ኦይቂቴ።

¹⁴ሄዋ ዲራው፥ ፄሳን ሳቂያ ዳንጪያዋዳን ቱማቴꬃ ዳንጪዴ፥ ቲራን ዎꬂያ ኦላ ሚሻዳን ፂሎቴꬃ ማዪዴ፥ ሂንቴ ጌዲያን ጫማ ዎꬂያዋዳን ሳሮቴꬃ ሚሺራቹዋ ቃላ ኦዳናው ጊጊዴ፥ ሚኒ ኤቂቴ።

¹⁶ሄ ኡባፔ ኣꬂዴ፥ ፃላሂ ዬዲያ ዎንዳፊያ ታማ ኡባ ቶዪሳናው፥ ኣማኑዋ ኡባ ዎዴ ጎንዳሊያዳን ኦይቂቴ።

¹⁷ኣቶቴꬃ ሁጲያን ዎꬂያ ቢራታ ቆቢያዳን ዎꬂቴ፤ ቃሲ ጌሻ ኣያና ማሻ ጊዴዳ ፆሳ ቃላ ኦይቂቴ።

¹⁸ፆሳ ዎሲዲኔ ኣ ማዱዋ ኦቺዴ፥ ኡባ ዎዴ ጌሻ ኣያናን ፆሳ ዎሲቴ። ሄዋ ዲራው፥ ሚኒቴ፤ ሳሌቶፒቴ፤ ጌሻቱዋ ኡባው ፆሳ ኡባ ዎዴ ዎሲቴ።

¹⁹ቃሲ ታኒ ያዬናን ዎንጋላ ፁራ ኦዳናው፥ ፆሳይ ታ ዶና ዶዪዴ፥ ሃሳዪያዋ ኢማናዳን፥ ታዉካ ፆሳ ዎሲቴ።

²⁰ታኒ ሃዒ ቃሹዋን ዴዖፔካ፥ ሃ ዎንጋላ ዲራው ታኒ ኪቴቴዳዋ፤ ታኒ ኣባ ታው ቤሲያዋዳን ያዬናን ኦዳና ማላ፥ ታው ፆሳ ዎሲቴ።

²¹ሺን ታኒ ዋና ዴዒንቶኔ ኣያ ኦꬃይታንቶ ሂንቴካ ኤራናዳን፥ ኑ ሲቆ ኢሻይ፥ ጎዳ ኦሱዋን ኣማኔቴዳ ቆማይ ቲኪቆሲ፥ ታዋ ኡባ ሂንቴንቶ ኦዳናዋ።

²²ኑኒ ኡባይ ዋኒ ዴዒንቶ ሂንቴንቶ ኦዲዴ፥ ሂንቴና ሚኒሳና ማላ፥ ታኒ ኣ ሂንቴኮ ኪታዲ።

²³ፆሳ ኣዉዋፔኔ ጎዳ ዬሱሲ ኪሪስቶሳፔ ሳሮቴꬃይኔ ሲቆቴꬃይ ኣማኑዋና ኢቲፔ ኢሻቱዋ ኡባው ጊዶ፤

²⁴ዶቼና ሲቁዋን ኑ ጎዳ ዬሱሲ ኪሪስቶሳ ሲቂያ ኡባቱዋና ፆሳ ኣꬎ ኬካቴꬃይ ጊዶ። ኣሜንዒ።