Text copied!
CopyCompare
Enga Nutesamene Baipolo - Epesasa

Epesasa 6

Help us?
Click on verse(s) to share them!
1Nyakama wane dupame Kamongo doko lao masetala nyakamanya endangi takangepa dolaponya pii auu pyoo sakamaiyepape. Dopa pingi mana doko tolatae.
2“Embame embanya endangi takangepa dolapo andanda semaiyoo katape.” Pii doko mana setapae dupanya andake mende. Goteme epe ditona leamo pii dake pii dakenya awapa silyamo:
3“Dopa pitinopa emba yuu dokonya kamea pyoo gii longo lao katate.”
4Dee nyakama takange dupame nyakamanya wane dupa imbu kaena lao minao imbu pisala nayalapape. Dopa napinya nyakamame wane dupa Kamongonya lao pii lamaiyoo mana minatamo dupa dopa pyoo minape lao mana lamaiyepape.
5Nyakama kendemane dupame nyakamanya isa yuu dakenya kamongo dupa paka kayamaiyoo walu lao dupanya pii sakamaiyoo kalyepape. Nyakamame mona lapo napalena Kataisanya kalai pyakamaili lao pyakamaiyoo kalyepape.
6Endakali dupame auu kaena lao nyakama kandatamino dokopa iki kalai pyaa naenya, Kataisanya kendemane joo kalai pyoo katao nyakamanya mona dokome Goteme pipimili lao masilyamoli pyoo pyoo kalyepape.
7Nyakamame kalai pitamino doko endakalinya kalai pyakamaili lao pyakamaiya naenya, mona epe palyetala Kamongonya kalai pyakamailyamanona lao dapa lao masoo pyakamaiyoo kalyepape:
8kendemane mendeme tamopi mee akali mendeme tamopi dupanya mendeme kalai epe pitamo dokonya baa Kataisa-kisa yole nyeta.
9Nyakama kamongo dupame nyakamanya kendemane dupa kandao mana mendai dopaka pyoo minalapape. Nyakamame dupa paka pisilyamino mana doko yakinalapape. Nyakamapi dupapi nyakama pitakanya Kamongo doko kaiti-kisa kalyamona lao masalapape. Baame endakalinya lengelyaapi kandao mokosala naenge.
10Nambame pii dake etao lelyo: nyakamame Kamongo dokopi baanya etete pupu lapae dokopimi nyakama kyoto injisina lao kalyepape.
11Sataneme waa katao mana miningi dupa nyakamame daa lao kyoto joo kalyanya yanda pyoo yonge pee pingi Goteme nyakama dingi dupa pitaka pee pyoo kalyepape.
12Naimame endakali-pipa yanda pyaa naenya, sipitisa koo ketae kalyamino dupapi, isingi dupapi, enomba nyoo isoo katenge dupapi, isa yuu iminjetae dakenya kamongo dupapi dupa-pipa yanda pilyamano.
13Tenge ongonya minao Goteme nyakama yanda pyoo pee pingi dingi dupa pitaka nyoo kalyepape. Dopa petala gii koo ipatamo dokopa nyakamame kapa pao kyoto joo katapala yanda pitami. Yanda pyoo etapala dokopa isa nasoo katatami.
14Dopana nyakama kyoto joo kalyepape. Nyakamame kiningi pii doko matapu joo pyoo katao, mana tolatae doko yanda pyaanya sangalinya pee pingili pyoo pyoo kalyepape.
15Wai Pii Epe mona lyuu lasingi doko lamaiyanya depa latae kalyamino doko nyakamanya moko pee joo pyoo kalyepape.
16Koteaka lao nyakamame masoo miningi doko konambi joo minao kalyepape. Akali koo dokome telya ita tao katenge dupame pyatamo dupa pitaka nyakamame konambi dokome kapa pao minao konjisetami.
17Dee Goteme naima pyoo nyepeamo doko nyakamame yanda pyaanya aiyombanya andu pingili pyoo andu pyoo katao, Gotenya pii Oli Sipitisanya konjua jepae doko kingimi minao kalyepape.
18Nyakamame koteaka lao Oli Sipitisanya pupu lapae dokome loma tata tata dupa soo tee laapape. Loma soo isetae katao koto nanyalapape. Gotenya endakali dupapi nambapi nisoo nyakamame loma salapape.

19Nambame pii laanya pito dokopa paka nakayao Goteme pitona lao yalo pyoo masiamo Wai Pii Epe doko kyoto joo lamaiyale lao baame pii epe mende namba dina lao loma salapape.
20Nambame Wai Pii Epe doko lao panao katenge tenge dokonyaka namba anjetae kalyo. Dokonya namba-kisa kalai pipenge silyamoli pyoo nambame Wai Pii Epe doko kyoto joo lao panao lamaitona Goteme namba nisina lao loma salapapeaka.
21Nyakamame namba dopa pyoo kalyeno lao masalapale lao akali Tikikasa dokome nambanya pii dupa pitaka nyakama langita. Tikikasa doko naimanya auu kaenge masoo miningi kaiminingi Kamongonya kalai akali tupi lapae mende.
22Nyakamame naima dopa pyoo kalyaminona lao masalapale lao tenge mendai dokonya baame nyakama langyoo nyakamanya mona kyoto injisakao nambame baa epena lelyo.
23Takange Gotepa Kamongo Jisasa Kataisapame masoo miningi naimanya kaiminingi dupa mona lyuu lasetala auu kayamaingi dokopa masoo miningi dokopa dolapo dupa-kisa sakatasina.
24Naimanya Kamongo Jisasa Kataisa lao auu kayao malala naenge endakali dupa kandao Goteme mona epe palena.