1Ke oi imoi aumi Lopia fou omia kainai, oi inami amami ainaꞌi foafia, gome egaꞌina laomai felo.
2Ke “Inami amami fopalopianiꞌi.” Ke iifa egaꞌina eufai auga iifa kapula ke kapa akaikiꞌa. Ke egaꞌina iifaga alogai, Deo ega pakoꞌa iifaga ekapa kakaua.
3Egaꞌina auga oi inami amami agopalopianiꞌi aisama, “Kapa maꞌoai feloꞌi mo faagamiai akemia, ke inae aagoai oague alogai, emi agu maunina epo agemaefa agoalogama,” eoma.
4Ke oi ina ama aumi, gaumi guaꞌi folopakupua. Kai Lopia ega pamaleleai fopaikifaniꞌi ke keaga felogai fopapeaꞌi.
5Ke oi kalaꞌafi aumi, oi Iesu Kristo aina oafia koa iꞌopoga, emi aagoa lopiaꞌi fomaniꞌiainiꞌi, au akaikiꞌaꞌi fopamiaꞌi. Ke egaꞌina laoga mainai isa ainaꞌi foafia.
6Ke isa oi animi kegaani mo puogai, agoꞌiai mo ainaꞌi foloafia folopinauga kapula kai, Iesu Kristo ega kalaꞌafi aumi koa iꞌopomi, alomi koꞌagai Deo kapaꞌina anina eani auga mo fokapa.
7Ke emi pinauga agokapa alogai, egaꞌina pinaugaga papiau apuꞌi folopamia kai, Lopia ega pinauga koa fopamia alomi koꞌagai fokapa.
8Gome oi ologo Lopia papiau maꞌoai, kalaꞌafi o kalaꞌafi laaꞌi auꞌi mo ganinagai, maꞌoai kapaꞌina felo kekapaisa auga faugai afa felo agepeniꞌi.
9Ke oi lopia aumi, oi emi kalaꞌafi auꞌi oi emi pinauga kekapa auga Lopia koa ega pinauga kekapa koa iꞌopoga, oi isafa emi kalaꞌafi eeꞌiai iꞌopoga mo fokapa. Oi isa folopamaniꞌiniꞌi, gome ologo oi ke emi kalaꞌafi fou emi Au Akaikiꞌa ufai eague, ke Isa kai agaꞌo afegai aeaulao.
10Ke aau akiu Kristiano papiaumi, pau niniꞌani fuagai auga, oi Lopia fou omia faagagai ega isapu akaikiꞌagai fokapula.
11Ke Deo ega ifani amuꞌi maꞌoai faagamiai fooge, ega koa tiapolo ega pifoge apalaꞌi eemi akefai mo ganinagai, emi pakoꞌai agoapa agekaina.
12Gome iꞌa aꞌa pipaini auga, papiau aumauni ifai kegago auꞌi fou alapipaini kai, isapu keafia papiau ke agelo fou ifoꞌi ala fekeꞌima omaꞌi kagakagaꞌi keꞌimaꞌi auꞌi, ke isapu maꞌoai ufai ke aagoai kekae auꞌi, ke isapu afu maꞌoai aloꞌiai kepinauga auꞌi, ke isapu keafia iꞌina agofaꞌa uminaga keꞌima auꞌi, ke tiapolo apalaꞌi eꞌi isapuai ufa gua keꞌima auꞌi fou apipaini.
13Ega puo Deo ega ifani amuꞌi maꞌoai faagamiai foogeꞌi, ega koa tiapolo ega iꞌopo kina apala eemi agemai aisama, oi isa fou agopipaini agekaina. Ke kapa maꞌoai agokapaꞌi afegai aisama, ifomi ifemiai agoapa.
14Ega puo foapa kapula, Deo ega iifa koꞌa auga peleta koa fopamia uufamiai fopaaga. Ke alo opai laoga maina auga olagami aulina koa fopamia olagamiai fooge fopakaisapuimi.
15Ke kamata ogafauka ofua oagu ala olao ooma auga olao koa iꞌopoga, iifa faunina Deo ega gagao fouga auga, kamata koa iꞌopoga fopamia fogafauka, fofua foagu.
16Ke egaꞌina kapaꞌi maꞌoai laaꞌiai auga, emi pakoꞌa Iesu Kristo eegai ooge auga keki koa fopamia, ke egaꞌina kekinai tiapolo ega gugu mailoꞌi egefalaiꞌi eemi kefai auꞌi maꞌoai agopakaisapuꞌi agoafialoꞌi agekaina.
17Ke Deo kaniami eagamauga auga ifani auꞌi kaniaꞌiai auli keoge auga koa fopamia kaniamiai fooge kaniami fopakaisapua. Ke Deo ega iifa, Deo ega Spiritu ega ifani aꞌifaga auga isafa foafia fofua foagu.
18Ke emi megamegai kapa iꞌoiꞌi iꞌoiꞌi megamegaꞌi fopaꞌaua ke fogoi kapulania. Ke agomegamega alogai, Deo ega Spiritu kapaꞌina epalogonimi faugai amomegamega eoma auga mo faugai fomegamega faefuafua. Ke egaꞌina minomiai ekaega kai, aufa kina fofua foagu, ke Deo ega papiau maꞌoai isafa fauꞌiai fomegamega faefuafua.
19Ke lau isafa fauai fomegamega, ega koa akeu alapaagalaisa aisama, Deo lau akeuai niniꞌani feogeꞌi, ega koa aimaniꞌiu mo iifa faunina Iesu fouga ogefake auga papiau fapalogoniꞌi laoma.
20Ke lau auga Iesu Kristo ekinaniau inae aagoai isa faugai lapinauga puogai tipula au lamia. Ke fauai fomegamega, ega koa aimaniꞌiu mo, Deo lau egaꞌina iifaga ala faifafou oma eoma auga, iꞌopoga mo fakapa laoma.
21Ke lai akimaiagai, Kristiano auga Tikikus alo koꞌagai Lopia ega pinauga ekapa auga, kapa maꞌoai maamiai ageifania, ega koa lau ala laagu oma auga, ke kapaꞌina lakapa auga isafa agologo.
22Ke lau isa egaꞌina mo fekapa laoma puogai laulaisa eemi efai, ega koa lai ala aagu oma auga fologo, ke magogo kapula fepenimi laoma.
23Lau lamegamega ega koa Deo ke Lopia Iesu Kristo fou eꞌi gagao, ke pakoꞌa Isa eeꞌiai emai auga ke Isa papiau aniꞌi keani auga laoga maina, oi aau akiu Kristiano papiaumi fekepenimi laoma.
24Ke lamegamega ega koa kaisau mo aloꞌi koꞌagai iꞌa aꞌa Lopia Iesu Kristo anina keani auꞌi, Deo ega gafegafe akaikiꞌa ipauma isa fepeniꞌi fekeagu felo laoma.
