1Ndoꞌo, sekuechi xiꞌin dichi kuechi xiꞌin solteru kuechi, io xa jandixa koio‑n tadɨꞌɨ‑n. Maxku kuxe ini‑n nuu tadɨꞌɨ‑n chi ñatu natau chi ñayiu ka kukanu ini Cristu, Ia kuu Xtoꞌo‑ro, ka kuu‑n. Ɨɨn xavaꞌa kuu xijan.
2Yodotnuni: “Koo koio‑n xañuꞌu nuu tadɨꞌɨ‑n.” N‑jaꞌan Ianyuux xa nux jandixa‑ro ley yaꞌa, kueꞌe xa kineꞌe‑ro. Xaꞌa kuu xijan: “Kani jɨꞌɨn‑ro ñuñayiu te kutuu vii kutuu vaꞌa‑ro.” Vuelta yaꞌa kuu vuelta kiꞌna nuu n‑jaꞌan‑ia xa nux jandixa‑ro ley‑ia, kueꞌe xa kineꞌe‑ro.
4Ndixi, ñayiu ka kuu taa, maxku dakiti ini‑n daꞌya‑n. Najani‑n nuu‑i xa n‑jaꞌan Ianyuux. Juña tnuꞌu‑n‑yɨ nuu nax taꞌu tniu‑ia xa kada‑ro.
5Ndixi, ñayiu ka kidatniu duꞌa nuu xtoꞌo‑n, koo‑n xañuꞌu nuu‑s. Koo ndaa koo kuiti anu‑n hora kida‑n tniu‑s. Kada koio‑n kuenda xa nuu Cristu xinokuechi‑n, ñadu nuu xtoꞌo‑n.
6Maxku hora ni ndeꞌa ñaꞌa xtoꞌo‑n ndeꞌe ku kadatniu‑n xa na tna ini ñaꞌa‑s. Io xa ku kundaa ku kuvaꞌa anu‑n hora ka kida‑n tniu‑s, chi xijan ndajan Ianyuux. Kuenda kɨu nuu Cristu xinokuechi‑n xa xinokuechi‑n nuu xtoꞌo‑n.
7Koo ini koo anu‑n xa kada‑n tniu xtoꞌo‑n. Kada‑n kuenda xa nuu Cristu, Ia kuu Xtoꞌo‑ro, ka xinokuechi‑n, ñadu nuu ñayiu.
8Xá ka xini‑n ntdaa‑n xa nux ka kida‑n xavaꞌa, taxi Ianyuux taꞌu‑n; kuu‑n ñayiu ka kidatniu duꞌa nuu xtoꞌo‑n a ka kuu‑n ñayiu ña ka kidatniu duꞌa nuu xtoꞌo‑n.
9Dani ndixi, se xndaxio ñayiu ka kidatniu duꞌa nuu‑n, maxku jaꞌan‑n nuu‑i xa kada uꞌu‑n‑yɨ a xa jani‑n‑yɨ. Xa xnaꞌa‑n xa ɨɨn ni Ia kuu xtoꞌo ñayiu ka kidatniu duꞌa nuu xtoꞌo‑i io xiꞌin ñayiu ñayo na xtoꞌo io. Ña tuu nax viꞌi‑ia nuu ka kuu‑ro ñayiu ka kidatniu duꞌa a ka kuu‑ro se xndaxio ñayiu ka kidatniu duꞌa nuu‑ro. Andɨu kuu nuu tuu‑ia.
10Xaꞌa nga na jaꞌan‑da nuu‑n. Na chindee ñaꞌa Ianyuux xa dani na kukanu ini‑n Cristu, te kunduu‑n xiꞌin‑ia. Na kadatniu Ianyuux anu‑n xa daa na kada‑n.
11Vaꞌa xa vaꞌa kada tuꞌa koio‑n mee‑n xa na kuaꞌa maxku dajaꞌan ñaꞌa Kuiꞌna xa kada koio‑n kuechi. Kada koio‑n kuenda xa soldado ka kuu‑n. Ndɨu nuu ɨɨn soldado vestidura‑s, te neꞌe‑s armas xa jɨn jantnaꞌa‑s.
12Kuenda kɨu jantnaꞌa‑ro xa ndeꞌe ka ndukundee‑ro xa maxku kada‑ro kuechi hora ka dajaꞌan ñaꞌa xaloko xiꞌin tachi loko xiꞌin mee Kuiꞌna taxnuni nuu ntdaa xaꞌa. Kuenda kɨu ka jantnaꞌa‑ro, ko ñadu ñayiu ka jantnaꞌa xiꞌin‑ro chi xaloko. Ka xikonuu‑i andɨu xiꞌin ñuñayiu, te ka taxnuni‑i nuu ñayiu loko xtuu ñuñayiu. Ñatu ka kida‑ro kuechi hora dajaꞌan ñaꞌa Kuiꞌna xa kada‑ro nux xndedi ini‑ro.
13Xa na kuaꞌa maxku ndaku xaloko xa kada koio‑n kuechi, kada tuꞌa koio‑n mee‑n ná io tuꞌa ɨɨn soldado jɨn jantnaꞌa. Xa na kuaꞌa maxku ndaku Kuiꞌna xa dajaꞌan ñaꞌi‑i xa kada‑n kuechi, kunaꞌa vaꞌa‑n nax kuu xa n‑jaꞌan Ianyuux xa io xa kada‑n, te kukanu ini naꞌi‑n‑ia. Ma kaka yata‑n nuu‑ia nux daa na kada‑n.
14Kuenda kɨu ɨɨn soldado duku dujun kaꞌa cinturón nunu xa maxku kɨu ñaꞌa ɨɨn xa ñani ñaꞌa ku kuu koio‑n xa jaꞌan‑n nuu ñayiu xa n‑jaꞌan Ianyuux. Ɨɨn xandaa kuu. Dɨuni kuenda kɨu ɨɨn soldado ndiꞌu pechu ɨɨn xa nani coraza ka kuu‑n xa jandixa‑n Ianyuux.
15Xa na kuaꞌa jɨꞌɨn ɨɨn soldado xa jantnaꞌa‑s io xa ndɨu‑s ndixa‑s, te xa na kuaꞌa jɨꞌɨn‑n xa juña tnuꞌu‑n ñayiu nax io xa kada‑i xa na kuaꞌa na ku kundaa ku kuvatu anu‑i, kada tuꞌa‑n mee‑n.
16Xko xadɨ soldado escudo‑s nuu‑s, xiti‑s xa ndaꞌva‑s ndaꞌa kuxi koko ka daxee se jantnaꞌa xiꞌin‑s. Kuenda kɨu kada‑n ná kida soldado jan xa ndaꞌva‑s ndaꞌa kuxi koko jan xa ma juejoon‑n xa kadatniu Kuiꞌna anu‑n. Nux kukanu ini‑n Cristu ma juejoon‑n xa kadatniu‑i anu‑n.
17Kuenda kɨu ɨɨn soldado n‑kaku xa kuú‑s xa n‑ñani dɨkɨ‑s ɨɨn xa n‑ñani xaxeꞌe xa ñuꞌu‑s lelu kaa ku kuu‑n xa kaku koio‑n nuu Kuiꞌna, te nanitaꞌu‑n. Ná kada‑ro kuenda xa soldado neꞌe espada‑s xa dadaꞌan niꞌno‑s mee‑s ku kuu‑n xa dadaꞌan niꞌno‑n mee‑n nuu ñayiu hora jaꞌan‑n tnuꞌu Ianyuux yodotnuni n‑jaꞌan Espíritu‑ia.
18Najaꞌan koio‑n Ianyuux hora na kada‑n ntdaa xa jaꞌan‑da ya. Ndɨkɨu ndɨñuu kajan taꞌu koio‑n nuu Ianyuux xaxeꞌe ntdaa ñayiu n‑kida‑ia xa nduu‑i ñayiu ii. Chindee ñaꞌa Espíritu‑ia hora na kajan taꞌu koio‑n nuu‑ia. Kadayɨka‑n mee‑n te jun ini‑n xa daa kada koio‑n.
19Kajan taꞌu koio‑n nuu Ianyuux xaxeꞌe daña tuku. Kajan taꞌu koio‑n nuu‑ia xa na niꞌi‑da tnuꞌu io xa jaꞌan‑da nuu ñayiu. Dɨuni kajan taꞌu koio‑n xa na kuyɨɨ‑da xa jaꞌan‑da nuu ñayiu nax io xa kada‑i xa nanitaꞌu‑i. Ñayo‑ro n‑xo xini janda nanitaꞌu‑ro, ko vitna ka xini‑ro.
20Xaxeꞌe xaꞌa yɨndiꞌu daña se kuu ndaꞌa xeꞌe Jesucristu. Kajan taꞌu koio‑n nuu Ianyuux xa maxku yuꞌu‑da xa jaꞌan‑da xa io xa jaꞌan‑da.
21Tíquico kuu se kachitnuꞌu ñaꞌa nuu janda tuu‑da, te nax kida‑da do yaꞌa kɨu na naxee‑s do dian. Ñani‑ro kuu‑s chi ka kukanu ini‑ro xiꞌin‑s Cristu, te mani ka juini‑ro‑s. Xinokuechi kutu‑s nuu Ianyuux te ña dandoo‑s tniu‑ia.
22Natundaꞌa‑da‑s juan naxee na kuaꞌa na kachitnuꞌu ñaꞌa‑s nuu janda xtuu koio‑da xiꞌin nax ka yaꞌa‑da. Kutuu‑n xiꞌin‑s, te kukaꞌnu anu‑n.
23Yo kuu anu‑da xa kada Taa‑ro Ianyuux xiꞌin Jesucristu, Ia kuu Xtoꞌo‑ro, xa na kutuu vii kutuu vaꞌa koio‑n xa ka kuu‑n ñayiu ka kukanu ini‑ia. Na kutuu mani koio‑n. Dɨuni na kada‑ia xa dani na kukanu ini‑n‑ia.
24Na chindee chituu ñaꞌa Ianyuux ntdaa‑n xa ka kuu‑n ñayiu ka xemani Xtoꞌo‑ro Jesucristu. Dɨuni na kada‑ia xa dani ku juemani‑n Jesucristu.
