Melkahka Kan 78:11-66

¹¹Re manokehla dahme e ketin wiadahro, manaman ko me e ketin wiahda mwohn masarail ko.

¹²Nindokon ar pahpa kahlap ako ar uduhdiahl, Koht ketin wiahda manaman kei nan wasa patapat en Soan, nan wehin Isip.

¹³E ketin pwalangpeseng sehdo ni pali riau oh kahluwairail nan ngalangal; oh ketin kawuhdi pali riau en sehdo rasehng dihd riau.

¹⁴Ni rahn e ketin kahluwa irail pahn mwetehn depwek ehu oh pwohng ehu pwon sang ni marain en kisiniei.

¹⁵E ketin pwalangpeseng paip nan sapwtehn oh ketikihong irail pihl sang loale.

¹⁶E kupwurehda pihl en kusieisang nan paipo oh ketin kakusei pihl rasehng pillap pwoat.

¹⁷Ahpw re usehlahte ar wiewia dihpiong Koht, oh kahngohdiong Wasa Lapalahpie nan sapwtehno.

¹⁸Re kasongosonge Koht ni ar nsenki pekipeki kisin tungoal me re anahne.

¹⁹Re aklapalap patohwan ong Koht, ketihtihki, “Pala Koht kak kaunopada atail tungoal nan sapwtehnet?

²⁰Mehlel me e ketin poakih paipo, pihl ahpw kusieisang loale; ahpw ia duwe, e kak ketin katungoalehkin kitail pilawa oh ketikihong sapwellime kan uduk pwe re en tungoale?”

²¹Koht eri ketin engiengda ni eh ketin karongehda; e ahpw ketin kauwohng kisiniei sapwellime aramas ako, oh sapwellime engieng ahpw laudla,

²²pwehki ar sohte likih oh sohte kamehlele me e pahn ketin komourirailla.

²³E ahpw ketin mahsendalahng pahnlahng oh ketin ruwese pwe wenihmwen lahng kan en ritida;

²⁴e ahpw ketin kamwerehdi wahn pilawa sang nanleng, ni e ketin kadaridi mana pwe re en tungoale.

²⁵Irail eri tungoale kisin tungoal en tohnleng kan, oh Koht ketikihong irail uwen me re anahne.

²⁶E pil ketin mweidala pwe angin palimese en ipirseli wasa, oh sapwellime manaman en kamwekidada angin palieir;

²⁷e ahpw ketin kadaridiong sapwellime aramas akan pelin menpihr ehu, me tohtohsang piken ni oahroar kan;

²⁸re ahpw pwupwudiong nan werengen impwal ko oh kapilpene wasa re koukousoan ie.

²⁹Aramas ako eri tungoale oh medkihla; Koht ketikihong irail dahme irail anahne.

³⁰Ahpw ni ar saikinte itarki dahme re anahne oh nindokon ar tungutungoal,

³¹Koht ketin engiengda pahrail oh kemehla nair ohl kehlail ko, me pwulopwul kaselel ko en Israel.

³²Mehnda ma e ketin wiahda mepwukat, ahpw aramas akan uselahte wiewia dihp; mehnda ma re uduhdiahl sapwellime manaman akan, ahpw re sohte mwahn kin likih.

³³Ih eri ketin kasohrehla ar mour rasehng esingek ehu oh mwadang lupukala ar mour kan ni paisuwed.

³⁴Ni eh ketin kemehla ekei irail, luhwe ko kin sohpeiong; re koluhla oh ngidingidki ar kapakapohng.

³⁵Re kin tamanda me Koht iei soundoareparail, duwen Wasa Lapalap eh kin ketin sewese irail.

³⁶Ahpw ar koasoi kan koaros kin likamw; sohte mehkot me re kin nda kin mehlel.

³⁷Re sohte kin loalopwoatohng; re sohte kin loalopwoatohng ar inou ong ih.

³⁸Ahpw Koht me inenen kalahngan ong sapwellime aramas akan. E ketin mahkikihong irail diparail kan oh sohte ketin kamwomwirailla. Pak tohto e ketin koledi sapwellime engieng oh pein katokehdi engieng en nan kupwure.

³⁹E ketin tamataman me irail ahneki luwet en aramas, rasehng kisinieng me kin ipidohte oh sohrala.

⁴⁰Ia uwen tohtohn ar kin kahngohdiong nan sapwtehn; ia uwen tohtohn ar kansensuwedihada!

⁴¹Re pwurupwurehngete kasongosonge Koht oh katoutouwihala nan kupwuren Koht Sarawien Israel.

⁴²Re manokehla sapwellime manaman lapalap oh rahn me e ketin kapitirailla sang ar imwintihti kan

⁴³oh ketin wiahda sapwellime wiewia kan oh manaman lapalap akan nan wasa patapat en Soan nan wehin Isip.

⁴⁴E ketin wekidohng ni nta pillap akan, mehn Isip kan ahpw sohla kak nimpil.

⁴⁵E ketin kadarpeseng loahng pwehn kaloke irail, oh kairu pwehn kauwehla sapwarail.

⁴⁶E ketin kamwarakpeseng loukust pwehn kangala wahnsapwarail kan oh kamwomwala poadokapw en sapwarail kan.

⁴⁷E ketin kemehkihla keteu aihs takai arail mwetin wain kan oh arail tuhke en pik kan.

⁴⁸E ketin kemehkihla nair kou kan melimel en keteu aihs takai oh nair pelinmen teikan lioal.

⁴⁹E kupwurehda paisuwed laud en lelohng irail ni e ketin kauwohng irail engieng mwuledek, me rasehng meninkeder en mehla.

⁵⁰E sohte ketin katokehdi sapwellime engieng de komourirailla, ahpw e ketin kemehkinirailla soumwahu lusulus.

⁵¹E ketin kemehla pwutak mesenih en peneinei koaros en Isip.

⁵²E ahpw ketin kahluwa sapwellime ko rasehng silepen sihpw men oh ketin kaukauweid irail nan sapwtehno.

⁵³E ketin kahluwa irail ni meleilei oh onepek, oh re sohte kin masak mehkot; a arail imwintihti ko e ketin kakihrala nansed.

⁵⁴E ahpw ketikidohng irail nan sapweiso sahpw sarawio, pohn nahna me pein ih ketin kalowehdi.

⁵⁵E ketin kausasang tohn sahpwo nindokon sapwellime ko ar mwekimwekid kohla; e ketin nehkpeseng sapwarailo ong kadaudok en Israel ko oh imwarail kan e ketikihong sapwellime aramas akan.

⁵⁶Re ahpw kahngohdiong Koht Wasa Lapalap, oh kasongosonge. Re sohte kapwaiada sapwellime kosonned akan,

⁵⁷ahpw re kahngohdiong oh soaloalopwoat duwehte ar pahpa kahlap ako, re rasehngala arep me pireklahr.

⁵⁸Re kahngiangihkidahr ar wasahn kaudok en aramas rotorot kan, iangahki neirail dikedik en eni kan.

⁵⁹Koht ketin engiengda ni eh mahsanihada soahng wet, iei me e ketin soingkihla douluhl sapwellime aramas akan.

⁶⁰E ketiketla sang nan mwoale nan Sailo, wasa e ketiket ie rehtail mahso.

⁶¹E ketin mweidala pwe Kohpwahn Inowo en lohdiong pahn atail imwintihti kan, kohpwao me wia kilel en sapwellime manaman oh lingan.

⁶²E ketin engiengda pahn sapwellime aramas ako oh ketin mweidala pwe re en kamakamala pahn arail imwintihti ko.

⁶³Mwahnakapw akan kin mehla nan mahwen, eri peinakapw akan sohte kin diar me re en pwoudiki.

⁶⁴Samworo kan kin mehkihla mehla eikek, oh ar liohdi kan sohte mweimweiong re en mwahieikin irail.

⁶⁵Ni imwilah, Kaun-o ahpw ketida duwehte e ketin ohpala wasa; e duwehte ohl kommwad emen me ket pahn litopw en wain.

⁶⁶E ketin katangapeseng sapwellime imwintihti kan re ahpw sarohdi oh namenekla kowahlap.