Melkahka Kan 69:2-32

²I kihrlahr nan pwelmatak loal, oh sohte wasa I en sok ie; I lelehr wasa loal, oh iloak kan nektehn kamwopwiehla.

³I mwoatohtkilahr ei likilikwer en pek sawas, oh nan kepinwereiet medengkilahr. Pwoaren mesei kat mahlkidahr ei kilikilengwohng sapwellimomwi sawas.

⁴Irail kan me kin kailongkin ie ni sohte kahrepe re tohtohsang pitenmoangei kat. Ei imwintihti kan kin peliankin ie lokaia likamw; re inenen kehlail oh men kemeiehla. Re kin idingohng ie I en kapwurehwei mehkot me I sohte pirapahda.

⁵Maing Koht, dipei kan sohte kin rirsang komwi; komwi me ketin mwahngih ia uwen ei pweipwei.

⁶Maing KAUN, Wasa Lapalahpie, komw dehr ketin mweidohng ie I en kanamenekihala irail kan me kin likih komwi! Maing Koht en Israel, komw dehr ketin mweidohng ie I en kasarowehdi irail kan me kin pwongih komwi!

⁷Pwehki mwaromwi me I alehkiher kepweikeng sang rehn aramas akan oh direkilahr namenek mwuledek.

⁸I rasehngalahr mehn liki men rehn riei kan, oh mehn liki men nan ei peneinei.

⁹Ei ngoangki lingan en Tehnpasomwi kin ngkengken loalei rasehng kisiniei; kepweikeng kan me kin wiawihong komwi, pil lelohng ie.

¹⁰I kin mpahikihla ei kaisihsol, a aramas akan kin kapweikengih ie;

¹¹I kin likawihada likoun nsensuwed, a re kin kouruhrkin ie.

¹²Re kin lipahnede ie nanial akan, oh me sakaulahr akan kin kokoul kepikepitkin ie.

¹³Ahpw Maing KAUN, I pahn patohwan kapakap ong komwi; Maing Koht, komw ketin sapeng ie ni ahnsou me komwi kupwurki, Komwi ketin sapeng ie pwehki sapwellimomwi limpoak lapalap, pwehki omwi ketin dadaurete sapwellimomwi inou en komouriehla.

¹⁴Komw ketin doareiehla pwe I kikihrla nan pwelmatak; komw ketin sinsile ie sang ie imwintihti kan, oh sang nan kepinpil loal wet.

¹⁵Komw dehr ketin mweidohng ahden pihl en koaduhpwalihiehdi; komw dehr ketin mweidohng I en duhla nan lapake wet, de kihrla nan sousou.

¹⁶Maing KAUN, komw ketin karonge ie sang ni kalahngan en sapwellimomwi limpoak poatopoat; komw ketin sohpeidohng ie sang ni sapwellimomwi kalahngan lapalap!

¹⁷Komw dehr ketin karirasang silangmwi sapwellimomwi ladu menet; I patopatohier nan apwal laud—komw ketin sapeng ie ahnsou wet!

¹⁸Komw ketido rehi oh ketin doareiehla; komw ketin kapitiesang ei imwintihti kan.

¹⁹Komw ketin mwahngih duwen koasoi kepweikeng kan me I kin ale, duwen ei paisuwedlahr oh solahr wahupei; komw ketin mahsanih ei imwintihti kan koaros.

²⁰Lokaia kepweikeng kan kauwelahr mohngiongi, oh sohte mehkot kak sewese ie. I men emen en sewese ei nsensuwed, I ahpw sohte diar; I rapahki emen me pahn kansenamwahwihiehla, I ahpw sohte diar.

²¹Ni ei duhpeklahr, re kihong ie pwoisin; ni ei men nimpildahr, re kihong ie pinike.

²²Arail kamadipw kan en wiahla kauparail; arail kamadipw kan en kahrehiong irail arail paisuwedla.

²³Komw ketin karotongehla masarail kan! Komw ketikihsang kehlail en tihnsewarail pwe re en kin luwet ahnsou koaros!

²⁴Komw ketin angiangihirailda; komw ketin mweidohng pwe angin omwi engieng en koanoairaildi.

²⁵Arail wasahn kousoan kan en tehnla; oh imwarail impwal kan en sohla towe me mour.

²⁶Re kaloke irail kan me komw ketin kalokeier; oh koasoia duwen lokolok en irail ko me komw ketin kalokeier.

²⁷Komw ketin kolokolete kadehdepen diparail kan koaros; dehr ketin mweidohng re en iang paieki sapwellimomwi komour.

²⁸Adarail kan en irihrsang nan pwuken me momour kan; re en dehr iang wadawadohng sapwellimomwi aramas akan.

²⁹Ahpw iet pwe I patopatohier nan pwunod oh medek; Maing Koht, komw ketin pwekiehda oh doareiehla.

³⁰I pahn kapingahki Koht apwoat koulen; I pahn lohkiseli sapwellime roson lapalap ni ei pahn kapikapinga.

³¹Met pahn kaparanda kupwur en KAUN-O laudsang meirongkihong emen kouen, laudsang meirong en emen lapalahn kouwolen.

³²Me toutoulahr akan ni ar pahn kilang irair wet, re pahn nsenamwahula; irail me kin pwongih Koht, re pahn nan kapehd kehlailkihda.