5Maing KAUN, Koht, Wasa Lapalap, komw ketida oh ketido sewese ie; Maing Koht en Israel! Komw pein ketin mahsanih! Komw ohpala wasa oh ketin kaloke me rotorot akan; komw dehr ketin kupwurkalahngan ong me loallap suwed akan!
6Re kin pwurodo nin soutik, wie ngiringir duwehte kidi ni ar kin kohkohseli nan kahnimwo.
7Komw karonge mahs ar lokaia kepweikeng oh kamasepwehk kan. Lowarail kan duwehte kedlahs nan ewarail, re ahpw kin lemeleme me sohte me kin rong irail.
8Ahpw, Maing KAUN, komw kin ketin kiparamatkin irail; komw kin ketin wiahki me rotorot akan mehkot mwahl.
9I kin koapworopworki sapwellimomwi roson; Maing Koht, komwi me ei wasahn ruk.
10Ei Koht kin ketin loalloale ie oh pahn ketido rehi; e pahn ketin kasalehiong ie lohdi en ei imwintihti kan.
11Maing Koht, komw dehr ketin kemeirailla, pwe nei aramas akan dehr manokehla. Ahpw komw ketin katangahkinirailpeseng sapwellimomwi roson lapalap oh kaloweiraildi, Maing ei Kaun, oh silepat.
12Dihp mi ni kilinawarail kan; arail koasoi kan koaros diren dihp; komw kupwure pwe arail koasoi kan en lidipihiraildi nan ar pohnmwahso! Pwehki ar kin lahlahwe oh lokaia likamw,
13komw ketin angiangih irail oh kamwomwirailla; komw kamwomwirailla douluhl. Pwe aramas koaros en patohwan ese me Koht kin ketin kakaun Israel, oh sapwellime manaman kin kipe wasa koaros nin sampah.
Melkahka Kan 59
Melkahka Kan 59:5-13