Melkahka Kan 37:20-38

²⁰Ahpw aramas suwed akan pahn mehla; imwintihti en KAUN-O kan pahn sohrala rasehng wahn rohs en nanwel akan; re pahn sohrala duwehte ediniei.

²¹Aramas suwed akan kin pweipwand, ahpw sohte kin kapwungala, a aramas mwahu kan me sapan oh kadek.

²²Me KAUN-O kin ketin kupwuramwahwih, iei irail me pahn koukousoan nan sahpwo, a irail me rialahr pahn KAUN-O, pahn koakoahksang.

²³KAUN-O kin ketin kahluwa aramas akan nan ahl me re en weweid ie oh kin ketin sinsile irail kan me kin kaparanda kupwure.

²⁴Ma re pahn pwupwudi, re sohte pahn wonohnte nanpwel, pwe KAUN-O pahn ketin sewese kapwourirailda.

²⁵Ni ei pwulopwul, oh met ni ei mahlahr, I saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.

²⁶Ahnsou koaros e kin kadek oh mweidohng aramas nah mwohni pwe re en doadoahngki, oh nah seri kan wia kapai ehu ong ih.

²⁷Sohpeisang me suwed, oh wia me mwahu, eri kadaudokomw kan ahpw pahn koukousoan nan sahpwo kohkohlahte;

²⁸pwe KAUN-O kin kupwurperenki dahme pwung oh sohte kin likidmeliehla sapwellime aramas loalopwoat akan. E kin ketin sinsile irail ahnsou koaros, a kadaudok en me suwed akan pahn koakoahksang.

²⁹Me pwung kan pahn koukousoan nan sahpwo oh re pahn sapwenikihla kohkohlahte.

³⁰Koasoien aramas mwahu me diren loalokong, oh e kin lamalam pahrek ahnsou koaros.

³¹Kosonned en eh Koht kin poad nan eh mohngiong oh e sohte mwahn kin mweisang.

³²Aramas suwed kin mwasamwasahnte aramas mwahu kan oh kin song en kemeirailla;

³³a KAUN-O sohte pahn mweidalahng irail pahn manaman en ar imwintihti kan de ketin mweidohng re en pakadeikada nan mwoalen kopwung.

³⁴Koapworopworki KAUN-O oh kapwaiada sapwellime kosonned akan; e ahpw pahn ketin kawawihiukala ni eh pahn ketikihong uhk sahpwo, oh ke pahn kilang me suwed akan ar pahn koakoahksang.

³⁵I kilangadahr aramas suwed emen me inenen lemei, me sikdahsang aramas koaros, rasehng sidar en Lepanon pwoat,

³⁶a mwuhr, ni ei daulih wasao, e solahr mie; I ahpw rapahkiseli, oh sohte diar.

³⁷Tehk mwahu aramas mwahu, kilang aramas pwung; aramas meleilei kin mie kadaudoke,

³⁸a me dipan akan pahn mwomwla douluhl, oh kadaudokarail kan pahn kamwommwomwla.