Melkahka Kan 119:32-64

³²I pahn ngoangki peikiong sapwellimomwi mahsen kan, pwehki komw pahn ketin kalaudehla ei loalokong.

³³Maing KAUN, komw ketin padahkihong ie wehwehn sapwellimomwi kosonned kan, I ahpw pahn kapwaiada ahnsou koaros.

³⁴Komw ketin kawehwehiong ie sapwellimomwi kosonned kan, oh I pahn kapwaiada; I pahn kapwaiada ni mohngiongi unsek.

³⁵Komw ketin kahluwa ie nan ahl en sapwellimomwi kosonned kan pwe iei met me I kin diarki ei nsenamwahu.

³⁶Komw ketikihong ie ineng en kapwaiada sapwellimomwi kosonned kan, a kaidehk I en kepwehpwehla.

³⁷Komw kupure ie, pwe I en dehr ngoangki dipwisou mwahl akan; komw kupwure ie, nin duwen me komwi ketin inoukidahr.

³⁸Komw ketin kapwaiada sapwellimomwi inou ong ie, sapwellimomwi ladu menet— inowo me komwi ketin wiawihong irail kan me peikiong komwi.

³⁹Komw ketin doareiesang kepweikeng kan me I kin masak; ia uwen kupwuriamwei en sapwellimomwi kadeik kan!

⁴⁰I men kapwaiada sapwellimomwi mahsen kan; komw ketikidohng ie mour kapw, pwe komwi me pwung.

⁴¹Maing KAUN, komw ketin kasalehiong ie duwen omwi kupwur limpoak ong ie, oh doareiehla nin duwen me komwi ketin inoukidahr.

⁴²Eri I ahpw pahn kak sapeng irail kan me kin kepweikengih ie pwehki ei koapworopworki sapwellimomwi mahsen.

⁴³Komw kupwure ie pwe I en kin lokaia mehlel ahnsou koaros, pwehki ei koapworopwor mihmi ni sapwellimomwi kadeik kan.

⁴⁴I pahn kapwaiada sapwellimomwi kosonned ahnsou koaros, met oh pil kohkohlahte.

⁴⁵I pahn weweidwei nan mour saledek, pwehki ei kin nantihong kapwaiada sapwellimomwi padahk kan.

⁴⁶I pahn lohkihda sapwellimomwi koasoandi kan mwohn nanmwarki kan, oh I sohte pahn namenengki.

⁴⁷I kin diar peren ni ei kin kapwaiada sapwellimomwi mahsen kan, pwehki ei kin kesempwalki.

⁴⁸I kin wauneki oh kesempwalki sapwellimomwi kosonned kan; I pahn medemedewe sapwellimomwi kaweid kan.

⁴⁹Komw ketin tamanda inowo me komw ketin wiahiong ie, sapwellimomwi ladu menet; e kahrehiong ie koapworopwor laud.

⁵⁰Mehnda ma I mi nan lokolok ahpw I nsenamwahu pwehki sapwellimomwi inowo kakehleiedahr.

⁵¹Me aklapalap akan kin mwamwahlikin ie, ahpw I sohte kin sohpeisang sapwellimomwi kosonned.

⁵²Maing KAUN, I kin tamanda sapwellimomwi kadeik en mahs ako, eri ihme kin kansenamwahwihiehla.

⁵³I kin lingeringerkihda kowahlap, ei kin kilang aramas suwed akan ar kin kauwehla sapwellimomwi kosonned.

⁵⁴Sapwellimomwi mahsen kan wia audepen ei koul kan nan ei mour mwotomwot nan sampah wet.

⁵⁵Maing KAUN, I kin tamankomwihda nipwong, oh I kin medemedewe duwen sapwellimomwi kosonnedo.

⁵⁶I kin diar ei nsenamwahu pwehki ei kapwaiada sapwellimomwi mahsen kan.

⁵⁷Maing KAUN, komwihte me I kin anahne; I inoukihda me I pahn peikiong sapwellimomwi kosonned kan.

⁵⁸I patohwan peki rehmwi sang nan kapehdi unsek komwi ketin kupwure ie, nin duwen me komwi ketin inoukidahr!

⁵⁹I medemedewe duwen iren ei mour, I ahpw inoukihda me I pahn idawehn sapwellimomwi kaweid kan.

⁶⁰I sohte pahn pwand, ahpw I pahn mwadang kapwaiada sapwellimomwi mahsen kan.

⁶¹Aramas suwed akan wiadahr arail mehn lidipih ie, ahpw I sohte manokehla sapwellimomwi kosonnedo.

⁶²I kin pwourda nin lukepen pwong pwe I en kin kapingahkin komwi sapwellimomwi kadeik pwung kan.

⁶³I kin kompoakepahniki irail koaros me kin papah komwi, irail koaros me kin peikiong sapwellimomwi kosonned kan.

⁶⁴Maing KAUN, sampah direkihla sapwellimomwi limpoak poatopoat; komw ketin padahkihong ie sapwellimomwi kosonned kan.