1Yesus nanoli nakandoo, nae, “Masanenedak baa! Boso tungga anggama heti-heun, fo suek hataholi koa ei. Te mete ma ei tao leondiak, na, ei Amam nai nusa-sodak taa fee ei nggadi mala.
2Mete ma ei sangga tulu-fali hataholi mana toꞌa-taa kala, na, boso miu popode maa mala sudi nai bee. Tehuu mete ma ei tao leondiak, na, ei sama leo hataholi mana kokolak feꞌek ma tao feꞌek. Ala lahiik lalaꞌok leni uma huhule-haladoik leu, fo suek hataholi koa sala, lae, ‘Wei, hataholi la ia, ana seli lalan seli bae maa! Au kokolak tetebes ia! Ma, hambu kokoak leondiak, na, ala simbo basa sila nggadi nala so.
3De, mete ma ei sangga tulu-fali hataholi mana toꞌa-taa kala, na, boso mafada sudi see baa!
4No leondiak, na, hataholi la malai daebafok ia, taa bubuluk. Tehuu ei Amam manai nusa-sodak mana bubuluk hata fo ei taom no neneek ndia. Dei fo Ana bala ei nenik babaꞌe-babatik makadotok.
5“Ledoeik ei hule-haladoi, na, boso tao aok leo hataholi mana kokola feꞌek, tehuu tao feꞌek. Ala lahiik lalaꞌok leni dala hataholi noꞌuk leu, ma lambadeik lai uma huhule-haladoik dale, suek hataholi noꞌu kala lita sala ma koa sala, lae, ‘Wei! Sila ia, hataholi malalaok bou!’ Tehuu mamanene baa! No hambu kokoak leondiak, na, ala simbo lala sila nggadi nala so.
6Tehuu ei taa bole leondiak. Mete ma ei hule-haladoi, na, maso mini kama dale miu, fo kena lelesu. Basa na hule-haladoi nee-nee neu ei Amam. Suek hataholi feꞌek taa lita, tehuu ei Amam nita. Dei fo Ana bala fee ei nenik babaꞌe-babatik makadotok.
7Mete ma ei hule-haladoi, na boso kokolak maꞌeok miu-mai. Huu, hataholi taa mana malelak Manetualain boe, bisa ala hule-haladoi leondiak. Ala duduꞌa lae, Manetualain nahiik namanene sila huhule-haladoi manalu ndia.
8Boso tao tungga leo sila baa! Huu mae ei bei taa moke hata-hata neu Amak nai nusa-sodak, tehuu Ana bubuluk memak hata fo ei paluum.
9De, mete ma hule-haladoi, na, pake conto leoiak: ‘Amak manai nusa-sodak! Ama naden malalaok nalan seli. Ela basa hataholi la soꞌu lamadedema Ama naden fo ana seli ndia.
10Ela Ama dadik Manek neu basa hataholi la! Ela basa hataholi la tao tungga Ama palendan nai daebafok ia, sama leo Ama atan nala tao tungga Ama palenda nai nusa-sodak.
11Ama tulun fee ai nanaꞌak mana daik tungga faik.
12Ai moke Ama koka heni ai sala-singgo nala, sama leo ai mafalende heni hataholi sala nala, fo taon neu ai.
13Ama, manea fo ai taa tao manggalauk. Ma masalaꞌe mala ai, mima nitu la koasan mai. Te Ama ia, Manek mana koasa manai lain seli, ma ana seli. Ama toꞌu palenda nakandondoo henin. Ai huhule-haladoin, kada leondiak Ama. Amin.
14Tehuu mamanene baa! Mete ma ei mafalende heni hataholi salan neu ei, na, dei fo ei Amam manai nusa-sodak boe oo, Ana koka heni ei sala mala.
15Tehuu mete ma ei taa nau mafalende heni hataholi salan neu ei, na, neu ko ei Amam boe taa nafalende heni ei sala mala.”
16“Mete ma ei hule-haladoi ma puasa, na, boso tao matak mamada ndoos, sama leo hataholi mana kokolak feꞌek, ma tao feꞌek. Huu ala tao leondiak fo suek hataholi koa sala, lae, ‘Wei! Sila ia, hataholi malalao kala bae!’ Tehuu mamanene baa! Hambu kokoak leondiak, na, ala simbo basa sila nggadi nala so.
17Tehuu mete ma puasa, na, malou ei mata mala malalao ndoos, ma sau neulalau langga buluk!
18De, dei fo hataholi lita ei, na, tala bubuluk, lae, ei mana puasak. Tehuu ei Amam mana bubuluk. Dei fo Ana bala fee ei babaꞌe-babatik makadotok.”
19“Boso tao ues mbilu mbuse fo makaduduluk hata makadotok nai daebafok ia. Huu neu ko fufuk ma besi-teik tao lakalulutu sala. Boe ma naꞌo mai ofe ma koꞌo neni sala.
20Tehuu malolenak ei tao ues mbilu mbuse fo makaduduluk hata makadotok nai nusa-sodak. Huu nai ndia, fufuk no besi-teik taa bisa tao lakalulutun. Ma naꞌo boe oo, taa bisa mai ofe fo koꞌo nenin.
21Ei mbeda hata mala lai bee, na neu ko ei dale mala lakadita lai ndia boe.”
22“Hataholi matan, sama leo banduk fo tao nanggaledo ndia dalen. Mete ma ndia matan manggaledok, na, ana tungga dala sodak malole, sama leo hataholi laꞌok nai manggaledok dale.
23Tehuu mete ma matan manggasasabuk, na, ana taa tungga dala neulauk, sama leo hataholi mana laꞌok nafadadaba nai makiuk dale. De, mete ma manggaledok manai ei dale mala, makiuk so, na, ei boe oo masoda nai makiuk dale.”
24“Hataholi taa bisa tao ues no tebe-tebe fee malanggan dua, huu dei fo ana hii malanggan esa lena heni malangga feꞌek. Bisa boe ana tungga malangga esa, tehuu tana mbali malangga feꞌek. Huu ndia, de, o taa bisa mae, ‘Lamatuak ndia, au malanggang,’ mete ma o tao doik dadik neu o malanggam.
25Huu ndia de Au afada leoiak: boso masambute duduꞌa, au sangga asoda talobee, au uꞌa-inu hata, ma, pake hata? Ei maehetuk nasoda ndia na, kada soaneu naꞌa? No aok ndia, soa pake badu do? Taa leondiak.
26Mete sudik mbui kala mana laa lai lalai. Taa lasambute sele ma ketu-kolu fo mbeda nanaꞌak neu kama mbembedak dale. Tehuu ei Amam nai nusa-sodak, nakaboi mbea-mbea sala, nakandondoo henin. Ndia boe oo, neu ko bisa nakaboi ei lena heni sila bali. De, duduꞌa neulalau dei. Huu, Ana timba-tai ei, lena heni mbui kala sila.
27Mete ma hataholi nambadeik neu titilok matan, basa de ana nasambute no ndia ao-inan, na, ana bisa tao namadema ao-inan do? Taa bisa!
28Mete ma taa, na, hatina de ei masambute, fo, duduꞌa laꞌeneu baloꞌa papakek bali? Miu mete sudik bungga bakung nai mook. Tana inda abas, ma tenu sidi.
29Tehuu mamanene neulalau baa! Mane Soleman baloꞌa papake neulauk nalan seli, taa bisa laban bungga la lolen.
30Huu, Manetualain tao dalek neu bungga fo kada lasoda nai leledon ia, fo basa na, foꞌa boe ma lamatuu so, fo hataholi nggali heni sala leni haꞌi dale leu. Neu ko Ana papake ei lena heni bungga la sila. De, hatina de, ei taa nau mamahele tebe-tebe neu Ndia?
31De, boso masambute duduꞌa, mae, ‘Ai sangga miꞌa hata?’ do ‘Ai sangga minu hata?’ do, ‘pake hata?’
32Hataholi fo taa namahele neu Manetualain, ala tao ues mbilu mbuse fo lasuu hambu basa dedeꞌa kala sila. Tehuu ei boso leondiak, huu ei Amam nai nusa-sodak bubuluk basa hata fo ei paluuk so.
33Kada ei musi makalalaꞌok Ndia uen dei, ma musi tungga Ndia palendan, fo basa na, neu ko Ana fee tamba basa hata fo ei paluum.
34De, boso masambute duduꞌa hata fo foꞌa ei paluum. Huu, foꞌa na, no nasambute feꞌek bali. Faik ia totoꞌan, dai ndia so.”
