Mark 8:5-17

⁵Ma Iesu, taui i paridadanei i pa, “Awarimi palawa biaḡa?” Taui i riwa i pa, “seven.”

⁶Ma Iesu, patara i riwei da au doa i kiala. Ma palawa seven i vaia ma God i viegualauei ma i vogimagimai ma ana tauvotaḡotaḡo i verei da patara i verei.

⁷Ma taui awari, iana muomuoi ruaḡa ota. Iesu i vaia; God i viegualauei ma ana tauvotaḡotaḡo i verei da patara i verei.

⁸Taui anatapui i am da i am-iaua. Ma lam am tereterenai i tuarui da poa ḡaeḡaei seven i vioai.

⁹Rava 4,000 i viambagibagi. Ma muriai i paritawanei ai au numa.

¹⁰Maratagogi, Iesu ana tauvotaḡotaḡo maiteni au waga i geru ma i nae Damanuta ana au parata.

¹¹Pharisi ḡelaui i nei ma viparipariḡai i vikarei Iesu maiteni. Taui i ḡoei da Iesu ita raudadani da mataira Godei ita viatataiei.

¹²Iesu, Aruanei i lavutu tawanana ma i riwa i pa, “Wei kimta voui, aiwai aubaina mataira e ḡoeḡoei? A ririwana-kauemi, amapo mataira eḡa ona inanai.”

¹³Anina ma Iesu, patara i netawanei ma ana tauvotaḡotaḡo maiteni au waga i geru me ma i damana Topa Galili au baba ḡelauna.

¹⁴Ma ana tauvotaḡotaḡo, nuanuai i vuru da ai palawa ita vaia ma palawa tagogi ava au waga i mamae.

¹⁵Iesu, taui I parivainotai i pa, “Pharisi ma Herod ai giu ma ai viararamana morumoruna ona inana-kauei! Lamna me yist.”

¹⁶Ma taui i babani vivira i pa, “Tauta eḡa ata palawa aubaina da e ririweta.”

¹⁷Ma Iesu i aramanei ma taui i riwei, “Aiwai aubaina o bababani da taumi awarimi eḡa palawa? Taumi amapo da eḡa ota aramana ma o vivinuanaina? Orami i bado bo?