1Wei lamna Iesu Keriso Messiah God natuna Riwana Aiaina karena.
2Wariaḡa peroveta Isaiah i girugirumia nanare:
3“Peroveta au mutulua e viviḡoreḡore:
4Ma taupariverena John i nei au mutulua da rava i bababataitoi ma God riwana i jimejimei i pa, “Ami ḡoʼapoapoe ona voterei, ma ona mae-taviremi God awarina ma ami ḡoʼapoapoe ina nota-tawanei ma ana babataitoimi.”
5Ma rava anatapui Judea au paratana ma au Jerusalem i nae da John ita rautaniḡanei. Maranai ai ḡoʼapoapoe i rupeni, John, taui i babataitoi au waira Jordan.
6Ma John, kamel aparana metametanana i oteoteni ma ana tairoro ḡamoḡamo opina. Ana lam kapau ma manigewa.
7Ma tauna, rava i ririwei i pa, “Rava au muriu e nenei i ḡetelara, eḡa me tau. Eḡa tagotagogiu da ana ae uma ḡuravana ana rupeni.
8Tau wairei a babataitoimi, wate tauna, Arua Vivivireinei ina babataitoimi.”
9Lamna maranaina Iesu, Nasaret, Galili i netawanei ma i nei ma John au waira Jordan, tauna i babataitoi.
10Ma maranai Iesu wairei i ḡeḡetai, i ʼnana da mara i wanatawanei ma Arua Vivivireina me gabubu i ḡairai.
11Ma God ponana marei i opu ma i riwa i pa, “Tam, tau natu au nuavaina ma u vinuaiainiu.”
12Ma lamna au murina God Aruana Vivivireina Iesu i paritawanana-opunei au mutulua.
13Ma au pom 40 au mutulua i mae. Ma Satan, tauna i rauelari. Ḡamoḡamo ḡaiḡaiawai nai au dobuna i mamae ma God ana anela marei tauna i paini.
14Ma gulau Herod, John i pani. Ma muriai Iesu i nae au Galili da rava awarii God Riwana Aiaina i jimei.
15Ma Iesu i ririwa i pa, “God ana mara vinevinena i ḡetai. God ana vibadana vouna rava aubai, lamna i turiai. Ami ḡoʼapoapoena ona rupeni ma ona mae-tavirem ma Riwana Aiaina ona vitumaḡanei!”
16Mara tagogi Iesu Galili topana au gerana i bababara nae. Ma lebalebaḡai ruaḡa i ʼnanai, Simon ma ana tevera Andrew au topa i rarauagida.
17Iesu i riwei i pa, “Ona nei ma ona votaḡotaḡoiu. Ma me marina iana o tutuarui; nanare, ana viararamanimi da rava ona tuarui da ina vitumaḡaneu!”
18Ma maratogogi ai agida i voterei ma Iesu i votaḡotaḡoi.
19Ma taui au gera i verau-nae. Iesu, Zebedi natunatuna i ʼnanai, James ma John ai au waga ai agida wanawanarorona i vokaukauei.
20Ma maratagogi taui i ḡorei, “Taumi ona nei ma ona votaḡotaḡoiu!” Ma taui amai Zebedi ana taunola maiteni i voterei ma Iesu i votaḡotaḡoi.
21Iesu ana Tauvotaḡotaḡo maiteni i nae au Capeniam. Ma au Sabat, Iesu i rui au pari numana ma God Riwana Aiaina, viararamanana i vikarei.
22Tauna ana rewapanana i viararamana eḡa me mai Jew ai tarawatu babadai nanare. Ma taurautaniḡana ana viararamana i baiei.
23Maranai Iesu pari au numana i viviararamana ma oroto arua-apoapoena orana i ruiruinia i garara
24i pa, “Iesu Nasaretei, aiwai e ḡoeḡoei awariai. Tam weka u nei da ma viapoapoeniai bo? Tau a aramanei tam aiai. Tam Vivivirem Godei!”
25Ma Iesu riwa bagibaginei i riwei i pa, “Ma genuana! Nai orotona ma opu-tawaneii!”
26Ma arua-apoapoena orotona i viaikwajiei ma ponana i rata, i garara ma i opu-tawanei.
27Ma rava anatapui i bana-kauei ma taui ava i vitarapiri, “Wei aiwai? Wei viararamana vouna ma ana rewapana maiteni! Wei ravana awarina rewapana e mamae da arua-apoapoena i riwei ma tauna i vovoteletelei!”
28Iesu nolana, maratagogi i tua Galili au anatapuna.
29Nai marana pari numana i opu-tawanei ma ana tauvotaḡotaḡo maiteni i nae Simon ma Andrew ai au numa. James ma John maiteni i nae.
30Simon poiana wavinena ini ḡuḡurana ana au animatave i matamatave ma maranai Iesu i ḡeta ma numa ravai, tauna i pariverei.
31Tauna i nae wavine awarina, nimana i vojijini ma i voagui da i vomairi. Lamna maranaina, ini ḡuḡurana i voterei ma wavinena, taui i paini.
32Ma au bigai madeḡa i neulai au murina, rava, ai rava doridoriai ma aiavoi arua-apoapoei au orai maemae, i neiai Iesu awarina.
33Ma rava anatapui nai au melagaina i vitagogiei numa au metaetana.
34Ma Iesu, maḡamaḡaui ai doria nununai i vilawani ma arua-apoapoe maḡamaḡaui rava awari i viaḡaḡana-opunei. Ma arua-apoapoena i aramanei da tauna anina God natuna ma lamna aubaina taui i viḡaei da i genuana.
35Ubaubanai boiboḡi, Iesu i vomairi ma numa i opu-tawanei ma i nae gabu au genugenuanana. Ma kampa, God awarina i raupari.
36Muriai, Simon ana rava maiteni i nae da i baiei.
37Ma maranai Iesu i nelaḡai, ma i riwei i pa, “Rava anatapui e baibaiem.”
38Iesu i paribelei i pa, “Tana nae taon ḡelaui au ḡereḡere, ma kampa maiteni God Riwana Aiaina ana raugugulei. Tau wei lamna aubaina a nei.”
39Ma Galili au anatapuna i naeni ma pari au numai i raraugugula ma arua-apoapoei i viopuni.
40Anina ma rava awarina opi doriana, i nei Iesu awarina ma au naona i peu ma i raudune ma agu i vibaḡei i pa, “Mepa da ma ḡoei, anina da ma viaiainiu.”
41Ma Iesu nuabola orana i oai ma urana i viloloi da i vodadani ma i riwa i pa, “Anina a ḡoeḡoei, ma aii!”
42Ma maratogogi opi-doriana, oroto i voterei ma tauna i aii me.
43Anina ma Iesu i riwana-guratei i pa,
44“Tam ma nae! Aiwai i tuputupua awarim, eḡa rava ma vieḡei! Ma jijimanina ma nae pirisi pulo tau apuna awarina ma vietataiana-melem ma viaiaina pulona Moses i ririweia ma kauei da ina vimataira taui awari! Pirisi pulo tauapuina ana vianina ina verei da tam u lawana.”
45Wate orotona i nae ma aiwai awarina i tuputupua lamna melagai au anatapuna i babaniana-naiei. Ma lamna aubaina Iesu melagai anatapui i vorei ma mepa eḡa rava ita mamaelana kampa i nae. Wate rava mepa maemaei i nei Iesu awarina.
