San Marcos 8:5-17

⁵Na' che' Jesúza' ḻegake': ―¿Ka'k' yetxtilka' noa'le? Na' che'gake'ne': ―Gallan.

⁶Na' bene' mandad kwe' beṉ'ka' lo yona', na' bex̱ee gallte yetxtilka', na' ka biyoll bi'e Chioza' yeḻ' chox̱ken, na' bxoxje'n na' bi'en beṉ'ka' nakgake'ne' txen kwenc̱he c̱hisgake' c̱he c̱he beṉ'ka'.

⁷Na' ḻekzka' nox̱'gake' zto c̱hop beḻ. Na' bi'e Chioza' yeḻ' chox̱ken, na' golle' beṉ'ka' nakgake'ne' txen we'gake' c̱he c̱he beṉ'ka'.

⁸Na' yog'ḻoḻgake' weej wdaogake' ax̱t ka beljgakile', na' bitopgake' zi gall xet' diika' bichooṉan.

⁹Beṉ'ka' weej wdao gokgake' ka tapa mil. Na' Jesúza' bisee ḻegake'

¹⁰na' bizee biyoolene' beṉ'ka' nakgake'ne' txen ḻoo barkwa' na' ziyajgake' gana' mbani Dalmanútana'.

¹¹Na' bllin fariseoka' na' wzologake' chakguedlengake' Jesúza'. Na' daa goklall'gake' wchix̱gake'ne', wṉabgakile'ne' gone' to yeḻ' wak lawe'ka' kwenc̱he gakbia' shi Chioza'kzan bseḻeene'.

¹²Na' Jesúza' ax̱t wkaalallee, golle': ―¿Berac̱he le' zoale ṉaa chṉabzle gon' to yeḻ' wak dii ile'ile'? Dii ḻi nia' le', aga bi yeḻ' wak gon' ile'ile'.

¹³Na' bizee kwite'ka', na' biyo'e ḻoo barkwa' sto shii ziyaje' shḻaa nisdo'na'.

¹⁴Na' beṉ'ka' nak Jesúza' txen goḻ-lall'gake' wa'gake' yetxtil c̱he'ka', na' tlish'chga dii noa'gake' ḻoo barkw c̱he'ka'.

¹⁵Na' che' Jesúza' ḻegake': ―Wsak'gale bi shajḻe'le dill' wxiye' c̱he fariseoka' na' c̱he Heródeza', daa zaklebi levadúrana'.

¹⁶Na' beṉ'ka' nakgake'ne' txen che' ljwellgake': ―Daa bi bi'acho yetxtilan' ne' ka'.

¹⁷Na' gokbe'i Jesúza' dillaa choe'gake', na' golle' ḻegake': ―¿Berac̱he chakzile daa bi bi'ale yetxtilan' nia' ka'? ¿Abiṉ' shajni'kzile' ni biṉ' gakbe'ile ka nak diika' chon'? ¿Abiṉ' iyalj yic̱hjlall'do'lenan'?