MAREKO 6:15-53

¹⁵To haida idia gwau, “Inai be Elia,” Haida idia gwau, “Inai be peroveta tauna ta, peroveta gunadia bamona.”

¹⁶To Heroda ia kamonai neganai, ia gwau, “Inai be Ioane, guna iena kwarana lau utua oho, to hari mase dekena amo ia toreisi.”

¹⁷Heroda be unai bamona ia hereva, badina be guna ia ese iena taudia haida ia siaia lao, Ioane idia dogoatao, dibura ruma lalonai idia atoa. Inai be Herodia ena ura. Herodia be Heroda ena kakana Filipo ena adavana, to Heroda ese ia adavaia.

¹⁸Guna Ioane ese Heroda ia gwau henia, ia gwau, “Taravatu be, oiemu kakana ena adavana oi headava lasi.”

¹⁹Unai dainai Herodia ia badu Ioane dekenai, ia ura ia alaia mase, to dala be lasi,

²⁰badina be Heroda ia gari Ioane dekenai. Ia gari, badina be ia diba Ioane be kara maoromaoro tauna, bona helaga tauna, bona Heroda ese Ioane ia naria namonamo. Nega momo Ioane ena hereva be Heroda ia kamonai, bona ia daradara momo, to ia ura dikadika ia kamonaia.

²¹Heroda ena vara laloatao dinana ia ginidae neganai, aria badana ia karaia, hanua lohiadia bona tuari lohiadia bona Galilea kahana tau badadia ia boiria, idia mai. Vadaeni, inai be Herodia ena nega namona.

²²Herodia ena natuna kekeni ia raka vareai, ia mavaru, Heroda mai ena vadivadi taudia danu idia moale bada. Heroda ese kekeni dekenai ia hereva, ia gwau, “Oiemu ura oi gwauraia, dohore lau henia oi dekenai.”

²³Ia gwauhamata metauna karaia, ia gwau, “Dahaka gau oi noinoi lau dekenai, dohore lau henia oi dekenai. Bema lauegu basileia kahana oi noia danu, do lau henia oi dekenai.”

²⁴Kekeni ia lao murimuri dekenai, iena sinana ia nanadaia, ia gwau, “Dahaka lau noinoi?” Ia gwau, “Ioane Bapatiso ena kwarana.”

²⁵Karaharaga ia raka vareai lou king dekenai, ia noia, ia gwau, “Lauegu ura be harihari Ioane Bapatiso ena kwarana oi henia lau dekenai, mereki latanai.”

²⁶Heroda ena lalona ia hisihisi bada, to iena gwauhamata dainai, bona iena vadivadi taudia dainai, inai noinoi koua dala ia diba lasi.

²⁷Heroda ese karaharaga iena tuari tauna ta ia siaia, ia hamaoroa Ioane Bapatiso ena kwarana ia utua oho, ia mailaia. Ia lao dibura ruma lalonai, Ioane Bapatiso ena kwarana ia utua oho.

²⁸Ioane ena kwarana mereki latanai ia mailaia, kekeni dekenai ia henia. Gabeai kekeni ese sinana dekenai ia henia.

²⁹Ioane ena diba tahua taudia ese inai sivarai idia kamonai neganai, idia lao, iena tauanina idia loahaia, guria gabuna lalonai idia atoa.

³⁰Aposetolo taudia idia haboua lou Iesu dekenai, idia karaia gaudia, bona hadibaia gaudia idia hamaoroa totona.

³¹Taunimanima momo idia mai idia lao dainai, Iesu bona iena diba tahua taudia edia aniani nega be lasi. Unai dainai idia ia hamaoroa, ia gwau, “Umui mai, taunimanima noho lasi gabuna dekenai ita lao, ita laga-ani sisina.”

³²Idia guia vanagi dekenai, taunimanima noho lasi gabuna dekenai idia lao.

³³To idia lao neganai, taunimanima momo ese idia itaia. Vadaeni hanua ibounai dekena amo, aena dekenai idia heau lao, idia ginidae guna.

³⁴Iesu ia ginidae, taunimanima momo ia itaia neganai ia bogahisihisi idia dekenai, badina idia be mamoe hegeregere, bona naria tauna lasi. Vadaeni, ia ese mauri sivarai momo ia hadibaia.

³⁵Kahirakahira dina ia diho, iena diba tahua taudia idia lao Iesu dekenai, idia gwau, “Inai be aniani lasi gabuna, hanuaboi be kahirakahira ia mai.

³⁶Taunimanima oi siaia lao namo, idia lao uma, bona hanua maragidia, aniani haida idia hoia, idia ania.”

³⁷Iesu ia haere, ia gwau, “Umui sibona ese aniani umui henia idia dekenai.” Idia gwau, “Be, edena bamona? 200 kina ai abia, paraoa ai hoia, bona ai henia idia dekenai, idia ania, a?”

³⁸Iesu ia nanadaia, ia gwau, “Umui emui aniani gaudia hida? Umui lao itaia.” Idia tahua, gabeai idia gwau, “Paraoa 5, bona gwarume rua sibona.”

³⁹Iesu ese taunimanima ibounai ia hamaoroa rei matamata gabuna idia helai diho.

⁴⁰Idia helai diho, haida 100 dekena amo, haida 50 dekena amo.

⁴¹Aniani gaudia paraoa 5 bona gwarume rua Iesu ese ia abia, iena matana ia negea gubai, ia guriguri, Dirava dekenai ia tanikiu, gabeai paraoa ia makohia, diba tahua taudia dekenai ia henia, idia henia taunimanima dekenai. Gwarume danu ia makohia, bona ia henia taunimanima ta ta dekenai.

⁴²Idia ibounai idia aniani, idia boga kunu.

⁴³Gabeai idia ania lasi paraoa bona gwarume idia haboua, bosea 12 idia hahonua.

⁴⁴Paraoa ania tatau be 5000.

⁴⁵Vadaeni nega tamona Iesu ese iena diba tahua taudia ia hamaoroa, vanagi dekenai idia guia, idia hanaia lao guna Betesaida hanua kahanai, to ia sibona do ia noho, taunimanima do ia siaia lao.

⁴⁶Ia siaidia lao murinai, ia daekau ororo dekenai, ia guriguri.

⁴⁷Adorahi neganai vanagi be davara huanai, to ia sibona tano dekenai ia noho.

⁴⁸Ia itaia, idia bara hekwarahi bada, badina lai be edia vaira dekenai ia mai. Bona hanuaboi lalonai, daba kahanai, idia dekenai davara ena kopina latanai Iesu ia raka lao. Ia ura vanagi ia hanaia.

⁴⁹Idia itaia, davara kopina latanai ia raka neganai, idia laloa ia be lauma ta, bona idia boiboi dikadika.

⁵⁰Badina be ibounai idia itaia, bona idia gari dikadika. To karaharaga Iesu ia hereva idia dekenai, ia gwau, “Umui goada abia, umui gari lasi, inai be lau.”

⁵¹Ia lao idia dekenai, vanagi dekenai ia guia, bona nega tamona lai ia doko. Vadaeni, idia hoa bada.

⁵²Badina be paraoa hoa kara idia itaia, to ena anina idia diba namonamo lasi, edia laloa be koua.

⁵³Davara idia hanaia, vadaeni Iesu bona iena diba tahua taudia idia kamokau Genesareta kone dekenai.