Mak 6:15-53

¹⁵Mewö jigetmö, tosatŋan kewö jiget, “Mi mönö Elaija (Elia)” Tosatŋan toroqeba jiget, “Mi kezapqetok azi walŋi yeŋgöreŋök kun.”

¹⁶Mewö jigetmö, kiŋ Herodnöŋ mi möta kewö jiyök, “Jon o melun azi nöŋön jibi jölŋi kutugeri, yaŋön mönö kömupnöhök wahöta malja.” Waimanjat möta Mewö jiyök.

¹⁷Mi kewögöra jiyök: Herodnöŋ munŋi Filipkö anömŋi Herodias ölöŋ meiga Jon o melun azinöŋ kiŋ jim waŋgiiga opotöröp melaim eŋgiiga anda Jon memba jöhöba kösö mire al waŋgiget.

¹⁸Jonöŋ Herodköra keu kewö jiyök: Gi qamböt ki memba mala Köna keu oŋgitzan.”

¹⁹Mewö jiiga Herodiasnöŋ Jon kazik ak waŋgiba qeget kömumapkö mörökmö, miaŋgö könaŋi kun qahö miwikŋaiyök.

²⁰Qahö miwikŋaiba Jonöŋ azi solanŋi aka sarakŋi töröŋi ahöhi, mi möta sel jöhöba kölközizip ak waŋgiba Jongöra keŋgötŋi möta malök. Mewö mala Jongö jitŋeyök keu möröhi, mi uruŋi kuŋgugetka keu gwötpuköra uruyahöt ahök. Mi töndup töndup Jongö keuŋi mötmamgö sihim mörök.

²¹Mewö aiga Herodiasnöŋ Jon qemamgö könaŋi qahö miwikŋaiba maliga miaŋgö nalöŋi ölöpŋi kewö kam kuŋguyök: Kiŋgö ahuahu nalöŋan kaiga közölömbuaŋ ala jembon aka suahö galömurupŋi aka Galili prowinsgö jitŋememe bohonŋi mi köl öröm, eŋgiiga kaba tatket.

²²Kaba tatketka Herodiasgö böratŋan miri miaŋgö uruŋe kaŋgota danis aliga Herod aka yambuk tebol liliköba tatkeri, yeŋön miaŋgö eksihimŋi gwötpuk mötket. Mewö mötketka kiŋnöŋ ambi seramgöra kewö jiyök, “Böratni! Wani yuaigöra sihimgi mötzani, mi ölöp qesinöŋga tököm gihimam.”

²³Mewö jiba keu mi jöjöpaŋ keunöŋ jim köhöiba kewö jii mörök, “Wani yuaigöra qesim niŋgimani, mi mönö ölöp gihimam. Yuai mi me mi me prowins galöm kölakzali, mi tok ölöp endeŋda likepŋi kun gihibiga galömŋi akŋan.”

²⁴Mewö jii möta yaigep anda namŋi kewö qesim waŋgiyök, “Namni, ni mönö Kiŋnöŋ wani yuaiya niŋgimapköra qesimam?” Mewö qesim waŋgiiga kewö meleŋnök, “Mönö jinöŋga Jon O-melun azigö jölŋi yandigetka nöröpŋi memba kaba niŋgiman.”

²⁵Mewö meleŋniga miaŋgöreŋök miri uruŋe kiŋkiŋgöba kiŋgöreŋ öŋgöba kewö qesiba jiyök, “Kewöni! Nöŋön sihimnan kewö mötzal: Göŋön mönö jimkutunöŋga Jon O-melun azigö jölŋi yandiba nöröpŋi memba kaba köndenöŋ algetka mia döldöpki niŋgiman.”

²⁶Mewö jiiga kiŋgö uruŋan kömbuhiiga wösöbirik mörökmö, jöjöpaŋ keuŋan jöhöi ketaurupŋan mi mötketka yeŋgö jemesoholŋine etpapuköra qeqesiŋi andö qemamgö möt lömböriba tököyök.

²⁷Tököba miaŋgöreŋök opotöröpŋi kun melaiba jiyök, “Gi mönö anda Jongö jölŋi yandiba nöröpŋi memba kaman.”

²⁸Mewö jiba melaiiga kösö miri gwaröŋe anda jölŋi yandiba nöröpŋi memba kaba köndenöŋ ala ambi seram mi waŋgiiga namŋi waŋgiyök.

²⁹Jongö gwarekurupŋan miaŋgö buzupŋi möta anda qamötŋi memba qaksirigö köt köteŋnöŋ ala löm kölget. Mewö asuhuyöhaŋgöra kiŋ Herodnöŋ könaŋgep Jisösgöra jiyök, “Jonöŋ mönö kömupnöhök guliba wahöta malja.” Mewö.

³⁰Melai melai azi Aposol yeŋön Jisösgöreŋ kaba tokoba yuai memba ambazip kusum eŋgigeri, miaŋgö kösohotŋi pakpak jiget mörök.

³¹Jiget möriga ambazip totnöŋ totnöŋ qösösök kaba anda aketka sileŋini köŋgaŋiiga nene nembingö nalö qahö ahöyök. Miaŋgöra Jisösnöŋ gwarekurupŋi kewö jii mötket, “Iŋini mönö kaba gölme kötikŋe naninök malbingöra anda borom kun luhut meme.”

³²Mewö jiiga eŋgömosöta waŋgenöŋ öŋgöba gölme kötikŋi kungen nanŋinök malbingöra anget.

³³Angetka ambazipnöŋ mi eka gwötpukŋan miaŋgö buzupŋi möta taon aka miri dop mieŋgöreŋök gölme köna kiŋkiŋgöba mutuk anda miaŋgöreŋ aŋgotket.

³⁴Aŋgotketka Jisösnöŋ waŋgenöhök eta ambazip kambu ketaŋi eŋgehiga lama galömŋini qahö tandök iliŋgösöŋ laŋ malgetka yeŋgöra wösöŋi mörök. Wösöŋi möta könahiba Buŋa keu könaŋi könaŋi kusum eŋgiyök. Mewö.

³⁵Mewö aka maliga miri jeŋan teköba gemamgö ahiga gwarekurupŋan Jisösgöreŋ kaba kewö jiget, “Böhi! Nini gölme kötikŋi kiaŋgöreŋ malinga miri lök söŋaumamgö akza.

³⁶Miaŋgöra gi ölöp ambazip ki melaim eŋginöŋga miri aka koum dowe dowe tat anjei, miaŋgöreŋ anda numbu neneŋini söŋgöröŋi memba neget.

³⁷Mewö jigetmö, kewö meleŋda jii mötket, “Eŋön mönö nanŋinak i nene gumohom eŋgime.” Mewö jiiga jiget, “Neŋön mönö denöwö akinto? Nup meme nalö 200:kö töwaŋi (Kina 1000,-) ahöza. Moneŋ mia memba anda nene beret söŋgöröŋi memba gumohom eŋgibingöra jizan me?”

³⁸Mewö qesim waŋgigetka jiyök, “Nanŋine nene beret dawik ahöza? Mi anda eket.” Mewö jiiga gösöŋini qeaŋda jiget, “Beret 5 aka söra yahöt mia memba maljin.”

³⁹Mewö jigetka Jisösnöŋ ambazip kambu kewö jim kutum eŋgiyök, “Ambazip pakpak, iŋini mönö deŋda nene nembingö kambu morömorö tokoba luplup görökŋe geba tatket.”

⁴⁰Mewö jim kutum eŋgiiga kambuŋi kambuŋi dowe dowe deŋda tatket. Kirip tosatŋi 100 aka tosatŋi 50 mewö mewö tokoba tat anget.

⁴¹Tat angetka beret 5 aka söra yahöt mi memba Suepnöŋ ui öŋgöiga kötuetköba beret mindipköba gwarekurupŋi eŋgiiga ambazip kirip dop mendeŋda sutŋine alget. Söra yahöt mi mewöyöhök kambu pakpak yeŋgöra mendeŋnök.

⁴²Mendeŋniga ambazip körekmakörek nemba nem timbireŋ aket.

⁴³Nem timbireŋ aka nene kitipŋi kitipŋi mosötkeri, mi gwarek yeŋön qezakögetka sakap 12 miaŋgöreŋ geba kokolak qeyök. Mewöyök söra kitipŋi mi mem kiripköget. Mewö.

⁴⁴Azi beret negeri, yeŋgö jaŋgöŋini mi 5000.

⁴⁵Neget teköiga Jisösnöŋ miaŋgöreŋök gwarekurupŋi jim kutum eŋgiba kewö jiyök, “Iŋini mönö waŋgenöŋ öŋgöba qeljiŋe o aŋgö kutuba likepŋe Betsaida mire anme. Nöŋön ölöp nalö sutŋe ambazip kambu ki melaim eŋgibagun kamam.”

⁴⁶Mewö jiba yaizökzök jim eŋgiba eŋgubula kunduŋe öŋgöba köuluköyök.

⁴⁷Köuluköba mali mare ahiga nanŋik kötikŋi kunduŋe maliga waŋgeŋinan aŋgö bibiŋe anök.

⁴⁸Ani lökuatnöŋ qeba qem bibihiba naŋgöget aniga luhutnöŋ angeraŋgöreŋök gila kai lömböriiga bömbömgöget. Miri awöraŋgöiga (3-6 kilok) miaŋgöreŋ Jisösnöŋ mewö eŋgeka o aŋgö qakŋe tiba tiba gwarekurupŋi yeŋgöreŋ Kaba eŋgoŋgitmamgö ahök.

⁴⁹O aŋgö qakŋe tiba tiba kaiga eka “Köwet Soŋgoriŋnöŋ kaza!” jiba könahiba qeta silatket.

⁵⁰Qeta silata körek i eka keŋgötporiŋ aketmö, Jisösnöŋ miaŋgöreŋök keukeu jiba kewö jii mötket, “Alaurupni! Mönö ewebibiŋinambuk saitiŋgit malme. Nanak kazal. Keŋgötŋini kude mötme.”

⁵¹Mewö jiba yeŋgöreŋ waŋgenöŋ öŋgöiga luhutnöŋ nöŋ qeba göröŋ alök. Göröŋ aliga jönömŋini undui önöŋi qahö auruget.

⁵²Mutuk beret mem sehiba gumohom eŋgiyöhi, miaŋgö könaŋi qahö möt asarigetmö, uruŋinan gwözöŋniga tok auruba tatket. Mewö.

⁵³O aŋgö kutuba likepŋe Genesaret mire aŋgota waŋge mosöta saknöŋ geget.