SAN MARCOS 6:15-53

¹⁵Altiül tapiüngüw: ―Ngwüy, aag ayaj mixejchiiüts Elías, awüw. Altiül tapiüngüw: Aag ayaj alinop nendeac andeac Teat Dios tajlüy tanomb ―awüw.

¹⁶Pero wüx Herodes tanguiay aaga andeacüw quiaj, tapiüng: ―Ngwüy, aag ayaj sapiüng Juan, aaga tüjchiüs mamb ndojquiüm onic nej, nganüy lapac tiül mondeow ―aw a Herodes.

¹⁷Atquiaj tapiüng Herodes cos alwüx omeaats leawa tarang, cos nej tüüch mamb ndeaam a Juan, majmel tiül manchiüc, naoelich naag galen. Aag ayaj tarang Herodes cos atquiaj tandiüm minajtaj nej nenüt Herodías. Aaga Herodías quiaj mintaj Felipe, michiig Herodes, nganüy Herodes lamaquiiüb.

¹⁸Cos Juan wüx aliün mapac tasaj Herodes: ―Ngo majneaj mequiiüb mintaj michiig ―aj.

¹⁹Quiaj Herodías xeyay tajcüy majaw a Juan. Tandiüm mambiy; pero ngome taxom nguineay marang.

²⁰Cos Herodes lamajaw Juan arang leaw andiüm Teat Dios, aton andeac leaw naleaing, pares tembol mandüy, ngo müüch a Herodías marang ngo majneaj wüx ombas a Juan. Herodes masey ngo maxom omeaats wüx leaw tandeac a Juan, nej xeyay tandiüm manguiay.

²¹Noic nüt wüx Herodes tarang noic nangos nüt ajcan lamatüch alinoic mineat nej, quiaj aaga najtaj Herodías taxom nguineay marang. Cos Herodes tapaj meáwan monajiüt, at nipilan monjiür tomiün tiül aaga iüt Galilea, marang noic nadam nangos nüt.

²²Quiaj tamb nop nüx, micual aaga najtaj Herodías, tajmel niüng ajlüy monet mejiüng. Herodes y leaw aliw quiaj tandiümüw majawüw ajiüng a nüx quiaj. Condom a rey Herodes tasaj a nüx: ―Itün xicueaj leaw indiüm, xique sanüüch ic ―aj.

²³Nej tapaj minüt dios mapiüng naleaing apmüüch, ngo mawaiich, tapiüng: ―Cuajantanej apmetün, xique sanüüch ic, masey pinawan leaw alnajiür ―aw a Herodes.

²⁴Quiaj taw a nüx, tamb matün manguiay mimüm nej. Tasaj: ―Müm, ¿cuane indiüm mejaw natüna? ―aj. Quiaj mimüm nej tapiüng: ―Itün omal aaga Juan, áag neech yow nipilan ―aj.

²⁵Andilílan tiüt a nüx, tamb andüy niüng ajlüy Herodes, tapiüng: ―Teat, sandiüm nganüy nganüy meaach xic omal aaga Juan amb tiül noic polat ―aj.

²⁶Quiaj Herodes tamix omeaats xeyay; pero cos nej lamapaj minüt dios, aton tandeac manguiayiw nipilan. Nganüy netam marang, müüch leaw atün a nüx quiaj.

²⁷Najénan tüüch mamb nop soldado, tasaj mandooig onic a Juan majamiün omal.

²⁸Quiaj tamb a soldado majaw tiül manchiüc mandooig onic a Juan. Condom tajoy omal a Juan amb tiül noic polat, tüüch a nüx. Quiaj a nüx tamb müüch mimüm nej.

²⁹Wüx minipilan Juan tanguiayiw nej landeow, quiaj tambüw maxainguiw, tajoyiw mamiütüw. Atquiaj tarang Herodes wüx tambiy aaga Juan.

³⁰Condom wüx tapeayiw ajcüwa gajpiüp (12) monamb ijpüwpüw, tapots masajüw Teat Jesús nguineay tarangüw, nguineay taquiajchiw nipilan.

³¹Quiaj tasaj nejiw Teat Jesús: ―Nganüy macaron, tabaats maxojtaats quiripite niüng ngo majlüy nipilan ―aj nejiw. Cos xeyay nipilan tenguial apeayiw quiaj niüng ajlüy nej, pálwüx teawüw. Ngo müjchiw nejiw matüch metiw.

³²Ndoj quiaj tajtepiw tiül nop müx, tambüw nejíwan quiaj, andüyiw niüng ngo majlüy nipilan.

³³Pero xeyay nipilan tajawüw nejiw ambüw, aton tajawüw jane nejiw; quiaj tambüw acuiürrüw imiünüw tiül micambajüw nejiw. Ombas mapeayiw quiaj, teoj mapeay Teat Jesús.

³⁴Wüx Teat Jesús taw tiüt imiün tiül müx maquiiüb minipilan nej, tajaw xeyay nipilan teamacüliw nej. Quiaj tajmiüc omal omeaats, cos tajaw ajlüyiw atnej tigüy najcueat sap, ngo majlüy wüx nejiür nejiw. Quiaj tapots maquiaach nejiw xeyay cuajantanej.

³⁵Wüx langwiiüts laliüc majmel nüt, quiaj minipilan nej tambüw masajüw nej: ―Teat, langwiiüts ¿nguineay apmarangaats? Cos nejinguind ngo macül ningüy.

³⁶Isajüw mambüw tiül cambaj y tiül rünch mangalüw üetiw, cos ngo majiürüw üetiw nejiw ―ajüw nej.

³⁷Quiaj Teat Jesús tasaj nejiw: ―Icona iyamban üetiw ―aj nejiw. Quiaj tapiüngüw: ―¿Teat, nguineaye? ¿Ngwüy sanamban nangalan ijquiaw acoic miow (200) denario pan müjchiiüts müetiwe? ―awüw.

³⁸Teat Jesús tasaj nejiw: ―Quiüran ijawan cas pan ijiüran ningüy ―aj nejiw. Wüx tajawüw cas pan ajlüy, quiaj tasajüw nej: ―Ajlüy acoquiaw pan alijpüw cüet ―ajüw.

³⁹Quiaj Teat Jesús tasaj nejiw masajüw nipilan chetemoj noicnoic ajlüy tiül nine nateaic soex.

⁴⁰Quiaj chetetoj; al tiül atüch coic miow (100), al tiül ic miow gajpowüw (50) noicnoic ajlüy.

⁴¹Condom Teat Jesús taxaing aaga acoquiaw pan al ijpüw cüet. Taxaing omal majaw cawüx, tüüch gracias Teat Dios. Condom wüx tambaag aaga pan texeyay. Quiaj tüüch minipilan nej majineaw müjchiw meáwan nipilan. At aaga ijpüw cüet aton tambaag müüch nejiw majineaw.

⁴²Condom tatüch müetiw meáwan nipilan paxiünüy üetiw.

⁴³Wüx landoj, quiaj taxainguiw leawa minaw a pan, at a cüet, chipiüt gajpiüp (12) nchep.

⁴⁴Ajcüwa tetiw quiaj atüch acoquiaw mil monxey.

⁴⁵Quiaj Teat Jesús tasaj minipilan nej majtepiw tiül müx mamongoj andüyiw necamb a nadam yow quiaj. Tasaj nejiw mambüw ombas nejiw mandüyiw tiül cambaj Betsaida. Cos nej apmacül quiaj leawa ümb majtsor nipilan, quiaj apmaw quiaj.

⁴⁶Wüx laǘmb majtsor nipilan, quiaj tamb andüy wüx nop tiüc mataag orar, mandeac aweaag Teat Dios.

⁴⁷Wüx lapojniow, aaga müx namb lamatüch pinawan aaga nadam yow quiaj, nganüy Teat Jesús néjan quiaj aliün wüx iüt.

⁴⁸Nej tajaw laǘmb apacüw majombüw a yow majüyichaw a müx, cos angochiw a iünd. Wüx landüy wüx arraw, quiaj Teat Jesús tamb matüch nejiw, ajüy amb teomal yow. Tarang atnej apmamóngan.

⁴⁹Wüx tajawüw nop najüy amb teomal yow, quiaj tepajüw: ―¡Aag ayaj nembolooch! ―awüw.

⁵⁰Meáwan nejiw tajawüw, xeyay mbayatoj. Quiaj Teat Jesús tasaj nejiw: ―Nde mbayameron, ich mapac imeajtsan cos xique, ngome aljane ―aj nejiw.

⁵¹Condom tajtep tiül müx maquiiüb nejiw; quiaj lomboj a iünd. Mbayatoj majawüw, ndoj tapac omeajtsüw

⁵²Nejiw nganaw majawüw nguineay tarang wüx tüüch mexeyay a pan, aliün mapac omalüw.

⁵³Tapeayiw necamb a yow tiül iüt Genesaret. Quiaj tawüw tiüt, taoeliw mimüxiw nejiw mbeay yow.