Markungundru 6:15-53

¹⁵Palpa jatana wonti: “Nauja Elias nganai;” palpa jatana wonti: “Nauja Propheta kulno nganai, Propheta kulno jeribaka kara.”

¹⁶Herodili jenia ngarana, nau jatana wonti: “Naupini. Johannes nganai, nina mangatandra ngato wokaribana paraia; nau narmdru jiritjina warai.”

¹⁷Ngangau nulupini Herodili jinpana wonti ja Johannes patana wonti, ja nina kanjangari pungani dupudupu ngankana wonti Herodias Philippuni ngatataia nunkanaia noandru; ngangau nulu nana noa patana wonti.

¹⁸Ngangau Johannes Herodingu jatana wonti: “Jinkangu wata talku nganai, ngatataia jinkanaia noa ngamalkananto.”

¹⁹Herodiasandru nina najinajibana wonti ja ngantjana wonti nina nari ngankala, ja nani ngandandarina wonti.

²⁰Ngangau Herodes Johanningundru japali nganana wonti, ngangau nau milkila nganana wonti, nau kana talku ja kulikiri, ja nulu nina nganialkana wonti; ja nina matja ngarana, nulu marapu ngankana wonti, ja nina manjujeli ngarana wonti.

²¹Ja ditji manju matja wokarana, Herodili dankani ditjini nunkanani buka pirna ngankingana wonti kana pirnani, ja kapara pirnani, ja Galilaialani ngoperaetjani nunkanani.

²²Ja Herodiasani ngatani wirina wonti, ja nani kilina wonti, ja Herodes ja kamaneli nunkani nankangu murlali pantjina wonti; ngadani mitaia kaparali mankarani jatana wonti: “Ngatjiau ngakangu, mina jundru ngatjiai, ja ngato jinkangu jinkila nganai.”

²³Ja nau nankangu jaura morlalu jatana wonti: “Minakulno jidni ngakangu ngatjiai, jenia ngato jinkangu jinkila nganai milila ngakani juralu.”

²⁴Nani dunkana wonti ja ngandrini nankanani jatana wonti: “Mina ngani ngatjinanto?” Nani jatana wonti: “Johannes multibanietja mangatandra.”

²⁵Ja nani nurujeli pirna mitaia kaparani wirina wonti ja ngatjina wonti ja jatana wonti: “Ngato ngantjai, jundru ngakangu nurujeli Johannes multibanietja mangatandra pirrani jinkinauto.”

²⁶Ja mitaia kapara ngaurongauro pirna pantjina wonti, windri jaura morlalundru ja bukaia kamanelindru nau wata ngantjina wonti nana nintali ngankala.

²⁷Ja nurujeli mitaia kaparali mangatandra wokaribanietja kulno jinpana wonti, ja jirijiribana wonti mangatandra nunkani maninanto.

²⁸Nau wapana wonti ja mangatandra nunkani kanja ngari pungani wokaribana wonti, ja mangatandra nunkani pirrani tikalkana wonti ja mankarani jmkina wonti, ja mankarali nina ngandrini nankanani jinkina wonti.

²⁹Ja milieli nunkanali jenia matja ngarana, tana wokarana wonti ja palku nunkani manina wonti ja nari kutuni kulnuni kurana wonti.

³⁰Ja Apostel wora Jesungu jurborina tikana wonti, ja tanali nunkangu pratjana kaukaubana wonti, mina tanali ngankana warai, ja mina ngujangujara tanali jinkina warai.

³¹Ja Nau tanangu jatana wonti: “Kaparanau jura pilki pitaraia! Ngangau marapu nganana wonti, tana wokarana wonti ja wapana wonti, ja tana ngandandarina wonti buka tajila.

³²Ja tana wapana wonti botali pilki pitaraia.

³³Ja kana wolarali tanana wapanani najina wonti, ja marapujeli nina ngujamana wonti; ja tana tidnali ngura pratjanandru jerra mindrina wonti, ja tana tanangu ngopera nganingana wonti ja nunkangu mapaterina wonti.

³⁴Ja Nau matja dunkana, Jesujeli kana wolara pirna najina wonti, ja Nau tanangu kalumiltjamiltjarina wonti, ngangau tana tjipi jeribaka nganana wonti tana ngamalkanietja pani; ja Nulu wonina wonti tanangu ngujangujara marapu jinkila.

³⁵Ja ditji ngaltingaltini mili nunkani nunkangu wokarana wonti ja jatana wonti: “Ninkida pitaru nganai, ja ditji ngaltingaltiriai.

³⁶Tanana jinpau, ngangau tana ngura pirnaia ja wakaia karakara wapananto, tanali buka tanani burungankala, ngangau tanali panila ngamalkai tajila.”

³⁷Nulu kalabana wonti ja tanangu jatana wonti: “Jura tanangu buka jinkianau!” Ja tana nunkangu jatana wonti: “Ngaiani wapananto 200 mardatandrali buka burungankala tanangu jinkila tajinanto?”

³⁸Nau tanangu jatana wonti: Worderuntja buka ngunku jura ngamalkai? Wapanau ja najianau!” Ja tanali matja ngujamana, tana jatana wonti: “Mara wora, ja paru mandru.”

³⁹Ja Nulu tanangu jirijiribana wonti, tana pratjana ngamana ngarinanto witta kulno ja witta kulno kanta kuljakuljani.

⁴⁰Ja tana ngamana ngarina wonti witta pilkipilki, milingeru witta kulnuni 100 ja witta kulnuni 50.

⁴¹Ja Nulu buka ngunku mara wora jo paru mandru patana wonti, ja Nulu pariwilpa najina tarana wonti ja tanana ngurungutana wonti; ja Nulu buka wokaribana wonti ja milini nunkanani jinkina wonti, ngangau tanali tanangu jinkinanto, bakana paru mandru Nulu pratjanani puntibana wonti.

⁴²Ja pratjanali tajina wonti ja jerturina wonti.

⁴³Ja tanali buka wordu wordu billi marapratjana ja mandru manamiri kampana wonti, ja bakana paru.

⁴⁴Ja tanali matja buka tajina, materi 5,000 nganana wonti.

⁴⁵Ja nurujeli Nulu mili nunkani jinpana tertana wonti, tana botani wirinanto ja nunkangu ngopera jerankari Bethsaidaia pararananto, Nulu ngopera kana wolara jinpananto.

⁴⁶Ja Nau tanangundru matja puntina, Nau mordawonpaia tarana wonti ngatjila.

⁴⁷Ja matja tinkarina, bota panto maudrani nganana wonti, ja Nau mitani kulnulu.

⁴⁸Ja Nulu najina wonti, worderu tanali parparali ngankana bota tertubana wonti, ngangau watara tanangu mudlani ngakana wonti. Ja nguramarani kuperi Nau tanangu wokarana wonti ngapani wapana; ja Nulu ngantjana wonti tanangu wiringala.

⁴⁹Tanali nina najina ngapani wapanani, tanali ngundrana wonti Nau kutji nganai, ja pirna maritjina wonti.

⁵⁰Ngangau pratjanali nina najina wonti ja ngarrana wonti. Ja Nulu nurujeli tanangu kaukaubana wonti ja jatana wonti: “Murlali ngananimai, ngani Nauja, wata japali ngananimai!”

⁵¹Ja Nau tanangu botaia tarana wonti, ja watara mudana wonti. Ja tana munta japali pirna pantjina wonti ja ngaruparana wonti.

⁵²Ngangau tana bukandru wata kiririna wonti, ngangau tana ngara ngurunguru nganana wonti.

⁵³Ja tana matja pararana, tana Genezareth mitani wokarana wonti, ja tanali bota dirkalaia parumana wonti.