SAN MARCOS 6:15-53

¹⁵Huan oc sequin oquihtohuayahque: ―Yehhuatl in tlayolchicahuani Elías. Huan oc sequin oquihtohuayahque: ―Yehhuatl se tlayolchicahuani, quen de yihuehcau.

¹⁶Huan queman oquicac in hueyixtoc Herodes, oquihtoc: ―Yehhuatl in Juan, aquin oniquihto maquiquechtzontequican, huan oquiehualo in Dios.

¹⁷Oquihtoc ijcon in Herodes ica tlen opanoc tleca oquisihuacuilic in iicniu Felipe. Huan oquicaquiltic in Herodes in Juan ica tlen oquichiu huan ic inon oquicocolic in Juan inon sihuatl itoca Herodías. Oncan Herodes oquitzactoya in Juan, ahmo maquiahsi in sihuatl.

¹⁸Tleca in Juan oquiluic in Herodes: ―Ahmo cuali ticpiyas isihuau mocniu.

¹⁹Huan ic inon in sihuatl Herodías ocualan huan quimictiyani in Juan, huan ahhuel quiahsis.

²⁰Huan Herodes oquimoucaitac in Juan tleca oquimatiyaya yehhuatl se molui cuali tlacatl huan se iconeu in Dios. Huan ic inon oquitzactoya in Herodes ic ahmo tlen maquipano. Miyacpa in Herodes oquitlahtolcaquiyaya in Juan, huan masque ahmo oquinehnehuiliyaya tlen oquiluic, oquipactiyaya quicaquis.

²¹In Herodes oquitlaolichti in itonal inetlacatilis huan oquintlamacac nochin huehhueyi tequihuahmen huan in tlicancamen den tlali Galilea.

²²Huan ocalac ichpocau inon Herodías huan opeu mihtohtiya, huan oquipacti Herodes huan aquin ihuan ocatcahque. Huan in hueyixtoc oquiluic in ichpochtontli: ―Xinechtlahtlanili tlen ticnequis, huan nehhuatl nimitzmacas.

²³Huan oquicaquiltic in Herodes: ―In tlen tinechtlahtlanilis, nimitzmacas hasta in tlahcopa campa nihueyixtoc.

²⁴Huan oquis in ichpochtontli huan oquitlahtlanito in inana: ―¿Tlen nictlahtlanis? Huan inana oquinanquilic: ―Xictlahtlanili itzonteco den Juan Tlacuatequiyani.

²⁵Huan saniman in ichpochtontli omocuep canin ocatca in hueyixtoc huan oquiluic: ―Nicnequi saniman xinechmaca iitzonteco Juan Tlacuatequiyani ihtech se plato.

²⁶Ic inon in hueyixtoc Herodes molui otlocox, huan ipampa itlahtol huan in aquin ihuan ocahcatca, ic inon ahmo oquinec motlahtolpatlas.

²⁷Saniman in hueyixtoc oquititlan se topili macualica itzonteco in Juan.

²⁸In topili oya huan oquiquechtzontec in Juan ompa telpiloyan, huan ocualicac itzonteco ihtech se plato. Huan oquimacac in ichpochtontli, huan yehhuatl oquimacato inana.

²⁹Queman in itlamachticahuan den Juan oquimatque inon, oyahque quianahque itlacayo, huan oquitocaque ihtech se tlaltecochtli.

³⁰Omocuepque in tetiotlatitlaniluan in Jesús canin oquinchiyaloc huan oteiluihque nochin tlen oquinchiuque huan tlen oquinextilihque in tlacamen.

³¹Huan Yehhuatzin oquiniluiloc: ―Matimoxelocan san tehhuan ipan se tlali huehca huan ompa timosehuisque chihton. Ijcon omihto tleca miyacten oteahsiyayahque huan oquisticatcahque. Huan ic inon niyan ahhuel otlacuahque.

³²Huan oyahque ihtech se barco huan oahsitohque ipan se sacatlahtli canin ahmo aquin ocatca.

³³Huan miyacten oquinitaque quen oyahque, huan oquinixmatque. Huan oquisque in tlacamen den nochin altepemen inahuac, huan otzecuinque itentla in atl huan otetlanque.

³⁴Queman Jesús oquixohuac den barco huan oquinitaloc in miyac tlacamen, inca otlocoyaloc. Tleca ocatcahque quen calnelohten ahmo quipiyahque in paxtol, huan opehualoc quinnextililo miyac tlahtoli.

³⁵Ihcuac molui yitiotlac, in tetlamachticahuan omopachohque tenahuac, huan teiluihtihue: ―Nican ahmo aquin chanti huan yitiotlac.

³⁶Xiquintitlani ic mayacan ipan in altepemen huan maquicohuacan tlen quicuasque.

³⁷Yehhuatzin oquinnanquililoc: ―Xiquintlamacacan namehhuan. Huan otenanquilihque: ―¿Tlen cox, tiyasque ticohuasque pantzin ica ome mil pesos para tiquintlamacasque? Panos tlahco xihuitl ic quitlanis seya inon tanto.

³⁸In Jesús oquintlahtlaniloc: ―Tel, ¿quesqui pantzin nanquipiyahque? Xiyacan xiquitacan. Queman yoquitaque, oteiluihque: ―Ompacaten macuili pantzin huan ome michten.

³⁹Huan oquintequiutiloc in tlacamen mamosehuican ipan quesqui ololi ipan in pasto.

⁴⁰Omosentlalihque ipan miyac ololi de se ciento huan de tlahco ciento.

⁴¹In Jesús omoan in macuili pantzin huan in ome michten, huan oahcotlachiyaloc neluicac huan omotlasohcamatiloc ica in Dios ica inon tlacuali. Huan ihcuac omoxehxelo, in pantzin omomiyaquilic. Huan oquinmacaloc in tetlamachticahuan, maquitlalican iixpa in tlacamen. Huan ihcuac omoxehxelo in ome michten, omomiyaquilic.

⁴²Huan nochten otlacuahque huan opachiuque.

⁴³Huan oquipehpenque mahtlactli huan ome canasta tenticatca ica in cohcotonque pantzin, huan tlen omocau den michten.

⁴⁴Huan in aquin otlacuahque cana macuili mil tlacamen.

⁴⁵Huan saniman in Jesús oquintequiutiloc in tetlamachticahuan matlehcocan ihtech in barco huan mateyecanacan ipan in altepetl Betsaida tlen ca isentlapal in atl. Huan Yehhuatzin oquinnahuatiloc in tlacamen.

⁴⁶Ihcuac otlan quinnahuatilo, ohuilohuac ipan in tepetl moyolmachtilo.

⁴⁷Ihcuac yitlayohua, in barco ocatca inepantla in hueyi atl, huan Jesús tesel omocahualoc ipan in tlali.

⁴⁸Huan oquinitaloc quen yosiyauque ic tlaatilantihue, tleca tlahuel chicahuac in yehyecatl ic quixnamictihue. Huan ic tlatuihtica, Jesús oquinahsiloto nehnemohuatiu iixco in atl. Huan onesiyaya quen Yehhuatzin omonequiyaya quimpanahuilos.

⁴⁹Huan ihcuac yehhuan oteitaque in Jesús nehnemohuatiu iixco in atl, oquinehnehuilihque yeh se nemohmoutilistli, huan oquitzahtzilihque.

⁵⁰Tleca nochten oteitaque huan omomoutihque. Huan saniman Jesús otlahtoloc huan oquiniluiloc: ―¡Ximoyolchicahuacan huan ahmo ximomoutican! Nehhuatl niJesús.

⁵¹Huan otlehcoloc ihtech in barco huan in yehyecatl omosehuic. Huan yehhuan molui quen tel oquimautoyahque.

⁵²Tleca ayamo oquinehnehuilihque aquin Yehhuatzin, huan masque oquitaque tlen opanoc ica in pantzin, oyoltepitzautoyahque.

⁵³Ic oquipanahuihque in atl, oahsique ipan in tlali Genesaret, huan oquilpihtoyahque in barco atlatentli.