MAREK 7:2-17

²Dikhle, hoj le Ježišoskere učeňika chan o maro melale vastenca, bo na thode (morde) len avke, sar o Farizeja phenenas, hoj kampel te kerel.

³Bo o Farizeja the savore Židi doľikeren oda, so varekana kerenas o tradiciji le phurendar, hoj medik na thovenas mištes o vasta, na chanas.

⁴A te aven pal o pľacos, na chan, medik pes na thoven. Preile le phurendar the but aver tradiciji, ajse sar oda: Sar te thovel avri o pohara, kuča, pira the o meďune grati.

⁵Avke o Farizeja the o zakoňika lestar phučle: “Soske tire učeňika na doľikeren o tradiciji le phurendar a chan o maro le melale vastenca?”

⁶Odphenďa lenge: “Tumen dujemujengere, mištes pal tumende prorokinelas o Izaiaš, avke sar hin pisimen: ‘Kala nipi man lašaren le mujeha, ale lengero jilo hino mandar dur.

⁷Hijaba man lašaren, bo sikaven o sikaviben, so hin le manušendar.’

⁸Bo omukľan le Devleskero prikazaňje a doľikeren le manušengere tradiciji.”

⁹A phenďa lenge: “Le Devleskero prikazaňje čerinen vaš tumare tradiciji.

¹⁰Bo o Mojžiš phenďa: ‘De pačiv tira da the le dades! A oda, ko košel la da the le dades, mušinel te merel!’

¹¹Ale tumen phenen: ‘Sako, ko phenďahas la dake abo le dadeske: Oda kotor mire barvaľipnastar, so šaj diňomas tumenge, thoďom pre sera le Devleske,’

¹²a paľis leske imar na domuken ňič te kerel prekal e daj the prekal o dad.

¹³Kajse tradicijenca, so ľikeren a poden dureder, musaren le Devleskero Lav. A but ajse veci keren!”

¹⁴Paľis vičinďa ke peste le nipen a phenďa lenge: “Šunen man savore a achaľon!

¹⁵Le manušes na meľarel oda, so chal, ale oda, so avel avri andral leskero jilo.

¹⁶Te hin varekas kana, hoj te šunel, mi šunel!”

¹⁷Sar odgeľa le manušendar a geľa andro kher, leskere učeňika lestar phučle pal oda podobenstvo.