Mark 7:2-17

²Dey see Jedus ciple dem da nyam dout wash dey han de way dey ole people say dey haffa do fa mek um clean een God eye.

³(Cause de Pharisee dem an all de oda Jew people ain nyam nottin cepin dey wash dey han de way wa dey ole people been laan um fa do.

⁴An wen dey buy ting een de maakut, dey neba nyam um cepin dey wash dey han dat way. An dey beena do plenty oda ting wa dey ole people been laan de Jew people fa do, like fa wash cup an pot an coppa bowl dat way.)

⁵De Pharisee dem an de Jew Law teacha dem aks Jedus say, “Hoccome ya ciple dem ain wash dey han fo dey nyam? Hoccome dey ain do like how we ole people been laan we?”

⁶Jedus ansa um say, “Oona hypicrit! De prophet Isaiah done tell de trute bout oona wen e write say, ‘Dese people yah da hona me wid dey mout, bot dey haat ain dey wid me.

⁷Wen dey woshup me op, dat dohn mean nottin, cause dey da laan people fa do law wa people jes mek op. Dey say dat God Law, bot e ain so.’ ”

⁸Jedus say, “Oona done stop do wa God tell people fa do, an oona da do jes wa people tell oona fa do.”

⁹E tell um say, “Oona tink oona hab good sense wen oona ain do wa God Law tell oona fa do. Oona do like dat jes fa do wa oona ole people tell oona fa do!

¹⁰Moses done write, ‘Ya mus show hona an be manisable ta ya fada an modda.’ An Moses say, ‘De poson wa taak bad ginst e fada or e modda, oona mus kill um.’

¹¹Bot oona say ef anybody hab sompin e able fa gii e fada or e modda wa gwine hep um, e ain haffa gim. E kin say, ‘Dis ting Corban’ (dat mean, A done promise fa gii God dis ting yah),

¹²an oona say dat poson ain haffa gii e fada or e modda de ting wa been gwine fa hep um.

¹³Dat show how oona ain do wa God say. Oona jes da do dem ting wa oona ole people laan oona fa do. An oona da laan oona chullun same ting. Oona da do plenty oda bad ting like dem yah.”

¹⁴Jedus call de crowd back an tell um say, “Mus listen ta me good fashion, so dat oona ondastan.

¹⁵Ain nottin wa gwine eenta poson wa mek um sinna een God eye. Wa da come outta de poson, dat wa mek um sinna een God eye.

¹⁶De poson wa hab yea fa yeh, e mus yeh wa A da say.”

¹⁷Wen Jedus lef de crowd an gone eenside de house, e ciple dem aks um wa mean dat wa e done say.