Mak 7:2-17

²Ya iri ndratou oro lau ra-on ta Jises aimon nyamon, ya oro basikine mine oro bala buku none kandriyen tiri Parasi bwe.

³Tasah iri Parasi ma hawe iri Juwis mari badeh, winiyan baimon nyamon bwe, i buku none iri basikine mine iri bwena bwe, tasah iri an hamon ta kandriyen ta tubu iri.

⁴Ya i buku none iri are baen ame, ya nyamon badu baen iri winiyan baimon bwe, i buku none nyamon basikine bwe. Iri badeh, an hamon ta kandriyen solo-an labai, i buku none san ta sikine bwiniu ma kun hawe kun kaba ma hawe sau.

⁵Ya eme iri Parasi ma hawe iri lau ta leheya kandriyen tiri Juwis ndremenya Jises i buk doh, “I buku sah oro lau tam aimon nyamon ya oro basikine mine oro bwe, ya oro ba-en hamon ta kandriyen ta tubu ahi iri bwe?”

⁶Eme Jises tiye i tiri, “Amwenen handru i buku none propet Aisaya ndratiye nyala aha! Aha asehek na boho aha le, i buku none iy ndratorowenei, ‘Iri lau mwan ma badih dah bwese nyarak eme loken na boho iri le, arile ndrine iri ereu len labai.

⁷Iri asehek sahou batanau ta lau le, arile iri anya, “Idah sahou ta Kindrei.” Idoh ya iri asolom laleyah eme tek.’”

⁸Eme Jises anya, “Aha ndraruwani kandriyen ta Kindrei, eme aha an hamon ta kandriyen tiri ndramak.”

⁹Eme ja iy tiye i tiri, “Batu aha ndrala labai, ya eme aha baseken batanau ta Kindrei bwai, eme ma aha tawi kandriyen taha le.

¹⁰Moses mene ndratiye, ‘Ou a-en bahandra tamam uru tinem, ma ou anuhun sahou turu,’ ma, ‘Are lau aluhe taman uru tinen, iy kimek ta aliy.’

¹¹“Arile ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak luk tan ta aseben taman uru tinen, arile iy tiye turu i buku doh, “Luk jo anya kaseben ah na aliy badeh, Korban (moson ta aliy, ndraleheyani ta adeu i ta Kindrei).”’

¹²Ya, ta san doh ado baseken iy baseben taman uru tinen bwe.

¹³Ta kandriyen doh le ado atehei sahou ta Kindrei i andri mara-ei, ma hawe lahou ra-on ja badu hawen, ya ado bwese-ei iri kandriyen solo-an ado akohok ta tubu aha iri ja eme loken mara-ei.”

¹⁴Eme Jises aloh iri lau mwan ma badih a hawen ja, ya eme iy tiye tiri i buku doh, “Aha mari kanuhun jo, ma aha kabudon kamwenen.

¹⁵Saba lakou badu manan i bolo boho ari ndramak, badeh winiyan bamesekei iy bandra-i bwe. Arile lakou udu bolo bohon eme len idoh kameh, mesekei ndramak andra-i adeh.”

¹⁶“I buku none are ndramak ndranyen udu aliy, badeh iy kanuhun!”

¹⁷Ano iy ruwani iri lau ma iy ili bolo asiu, eme ma oro lau tan ndremenya iy ta sahou sokek nane.