Maleaki 1

1

2

3

4

¹Maleakizi Wofuŋte dâŋ Israe ŋic mufua‐jarewec.

²Wofuŋ e ʒiŋuc mukac: “No maŋjauŋ eŋare warehuc juekopac.” Ŋoŋe ine ʒiŋuc muŋgopieŋ: “Go weniŋuc ehuc maŋjauŋ enâre warehuc juekic?” Iŋuc muhuc wioŋgopieŋte Wofuŋzi dâŋ ʒiŋuc bâtikie‐ŋarekac: “Esau â Jakobo jahe hahac ɋa jâmbâŋ juhapire no sifu Jakobo maŋzi heme hariŋ ecnehuc Esau ine hone takirepo.

³Ehuc hae mâreŋ‐ticne imackepe bec qowi jaŋere juju hae ewec.”

⁴“Nâŋe henʒaŋ‐nâpokicne, erâ sifu hae sesuc mocwâc heɋârerâ banaŋmu,” Edomŋic jaŋe iŋuc muhapie Anutu Tâpiri Ɋuŋɋasaŋ Wofuŋzi ʒiŋuc muocmu: “Jaŋe heɋârerâ bazo murâ banʒepieŋ, no ine mocwâc hetâtiepemu. Iŋuc fuame ŋic jaŋe honerâ ʒiŋuc mujareniŋmu: Ŋic hehesicne jaŋere mâreŋ. Ŋicguru i jaŋe Wofuŋzi kimbeŋ qajarehuc juocmu sanaŋ.”

⁵Wiac i ʒâŋe fâri‐ŋeŋiczi honehuc ʒiŋuc muniŋmu: “Wofuŋ e Fekicne sâkozi Israe mâreŋ sâcke‐fârehuc jukac!”

⁶“Ŋokâzi mamac‐ticne sâseekac, â kiŋaŋ qaqazi bomboŋ‐ticne araŋ bacneekac. Eme no Mamac juipiehape mozi sâsecnuekac? Â bomboŋ juipiehape mozi araŋ banareekac? Anutu Tâpiri Ɋuŋɋasaŋ Wofuŋ noni, ʒâŋe‐nane qaisockeeŋgopieŋ taha bapa ŋoŋe hâcne iŋuc ŋazakopac. Ŋoŋe ine muŋgopieŋ: ‘Nâŋe weniŋuc ehuc ʒâŋege qaisockeeŋgopeneŋ?’

⁷Irec ʒiŋuc ŋazape: Ŋoŋe taha wiac sâqorekicne alata‐naneo râehuc iŋuc hâcne eeŋgopieŋ. Ehuc ʒiŋuc mu wioc eeŋgopieŋ: ‘Nâŋe weniŋuc epene wâwânâŋnehec eekac?’ Ŋoŋe ʒiŋuc manaŋgopieŋte wâwânâŋnehec ekac: ‘Wofuŋte alata i gâc sâcne hecnezo.’

⁸Ŋoŋe qowi ʒâŋe tiŋtuŋ me kike demba me hucnehec bâzi rikeeŋgopieŋ i moc mi sâqoreekac me? Wiac iŋucne i mâreŋ soŋaŋ‐ŋeŋic râcnepie bune biaŋkeha mana‐ŋareme sâckeocmu me? Anutu Tâpiri Ɋuŋɋasaŋ Wofuŋ nore dâŋ iŋuc.

⁹‘Ʒi ine Anutuzi aki anonoc enâreocte kio wâwâsic ecnenaŋ.’ Ŋoŋe iŋuc muhuc taha wiac iŋucne bafisipie mana‐ŋarepe sâckeocmu me? Anutu Tâpiri Ɋuŋɋasaŋ Wofuŋ nore dâŋ iŋuc.

¹⁰Alata‐naneo maŋgâŋ bâzi rikenʒipiŋte ŋoŋeraonec moczi taha ufuŋte motâc hefârezac me! No hone aŋac mi eŋarekopac, erâ wâc taha bâzi‐ŋeŋicte takicnuekac, Anutu Tâpiri Ɋuŋɋasaŋ Wofuŋ nore dâŋ iŋuc.

¹¹Ʒoaŋ wewefunaonec fuŋkerâ raku huhunao tarakac ira ŋicne ŋicne juraŋgopieŋ jaŋerao ʒâŋe biŋe‐nane sâcke‐fârerâ fokac. Ehame mâreŋ sâc nore ʒâŋe muhuc hosâc âsu rikeeŋgopieŋ â taha biaŋne râeeŋgopieŋ, i ʒâŋe biŋe‐nanezi ŋicne ŋicne jaŋerao sâcke‐fârerâ fokacte iŋuc eeŋgopieŋ, Anutu Tâpiri Ɋuŋɋasaŋ Wofuŋ nore dâŋ iŋuc.

¹²Ŋoŋe ine ʒiŋuc muhuc ʒâŋe biŋe‐nane bawahaeŋgopieŋ: Wofuŋte alata i wiac omane, â fainao tahare wiac fokac i sâcne qaisockezo.

¹³‘Keci neneŋ gie sâko,’ ŋoŋe iŋuc muhuc mecpiroc enareeŋgopieŋ, Anutu Tâpiri Ɋuŋɋasaŋ Wofuŋ nore dâŋ iŋuc. Ŋoŋe qowi momorizi kisuckekicne me puriŋne me hucnehec tahare biŋe bafisipie wemocko manape biaŋkeha ropemu? Wofuŋ nore dâŋ iŋuc.

¹⁴Ŋic moczi taha moc Wofuŋ nore biŋe râeocte mupaŋkerâ faicnao qowifâc‐ticne jaŋere ŋondeŋko ŋicne biaŋne moc jucne‐bipieha sâqocne moc râeocmu e eeatuc‐ticnere erâ sâwecte biŋe ezejec. No hâcne Wofuŋ Sâko jukopac, ehame ŋicne ŋicne jaŋerao ʒâŋe biŋe‐nanezi qeŋ bipinehec ekac, Anutu Tâpiri Ɋuŋɋasaŋ Wofuŋ nore dâŋ iŋuc.