1“Manaŋgopieŋ, no kiŋaŋŋic‐nane sorepe hata bâʒâwe‐nareocte fakac, eme honecnuzo ʒoɋac eeŋgopieŋ Wofuŋ no hâcne taha ufuŋ‐naneo ututuŋ jaha fisipemu. Manaŋgopieŋ, ʒâʒâficte kiŋaŋŋic fisime honeniŋte boc eŋareekac e hâcne fakac, Anutu Tâpiri Ɋuŋɋasaŋ Wofuŋ nore dâŋ iŋuc.
2Mâc fifisi dameŋ‐ticnao mozi sanaŋkerâ juocmu, â fua tâcneme mozi qiŋ herâ domaocmu? “Tâpiri‐ticne i ʒoczi wiac ʒame burockeekac irec sâc, â saifezi wânâŋ ʒure ɋaɋackeekac iŋucne.
3Siliwa wiac ʒocko rikepie opâ ehuc wosâekac irec sâc Lewi ŋokâfâc‐ticne ʒure ɋaɋac‐jopahuc gol â siliwa iŋucne hone wosâc ejareocmu, iŋuc ejarekume Wofuŋte taha gie biaŋne banʒepieŋ.
4Iŋuc epie Judaŋic â Jerusalem hae rune jaŋere taha i mârâc jaha Wofuŋtao aŋacnehec fowec irec sâc jaha eocmu.
5“No mumutara gie bapemurâ maic‐ŋopakopac. Ehuc hafec qaŋgec ŋic â boe sau ŋic, â burec ehuc dâŋ mueŋgopieŋ, â gieŋic furi‐jeŋic bawahaeŋgopieŋ, â hozec bekâ bâuruŋ‐jopaeŋgopieŋ, erâ ŋic jabane hone qaisoc ejarehuc nore mi hâwic‐jopaekac, ŋic iŋucne jaŋere fuŋne biac ritupemu, Anutu Tâpiri Ɋuŋɋasaŋ Wofuŋ nore dâŋ iŋuc.
6“Wofuŋ no hec hetikic‐nane mi fokac, â Jakobore ɋâricfâc ŋoŋe jumbiŋ sâc ijaha wâc juŋgopieŋ.
7Ŋoŋe mamacfâc‐ŋeŋic jumbiŋ dameŋ ira hâcne dâŋsanaŋ‐nane qâsuahuc mana rereŋ mi embiŋzi ewareeŋgopieŋ. Irec norao risiepie maic‐ŋopapemu, Anutu Tâpiri Ɋuŋɋasaŋ Wofuŋ nore dâŋ iŋuc. Ŋoŋe ine muŋgopieŋ: ‘Hâc, nâŋe mi behecgumbeŋ, irec weniŋuc erâ gorao risienaŋmu?’
8Ŋiczi Anutu no sâcne eatucnuniŋmu me? Ŋoŋe hâcne iŋuc enareeŋgopieŋ. Iŋuc mupe ʒiŋuc mueŋgopieŋ: ‘Hâc, nâŋe weniŋuc ehuc eatucgueŋgopeneŋ?’ Ŋoŋe teŋkonec wâŋ â taha wiac furu jaha mi râehuc iŋuc eeŋgopieŋ hâcne.
9Ŋicguru ʒi ŋoŋe ʒeŋgoma sâwec‐ŋopakicne. Erâ sifu eatucnuhuc jueŋgopieŋ.
10Ŋoŋe teŋkonec wâŋ i furu jaha taha ufuŋko bafisipie rowaŋ‐naneo nânâ i fohuc juzejec. Ŋoŋe iŋuc ehuc esâicnupie mupe sambâŋkonec jambuŋzi ŋoŋerao fofo dunduŋ foocmu me mâcne, irec fuŋne taniŋkezejec, Anutu Tâpiri Ɋuŋɋasaŋ Wofuŋ nore dâŋ iŋuc.
11No qokic repicne jaŋe jâpec‐jopape gie‐ŋeŋicko wiac fârine fuarâ fokac i mi sipirickenʒepieŋ. Ehame gieo waiŋ qizecne doma rakac i fârinehec ezejec, Anutu Tâpiri Ɋuŋɋasaŋ Wofuŋ nore dâŋ iŋuc.
12Eme mâreŋ‐ŋeŋiczi aŋac bâfua‐ŋareme ŋicne ŋicne jaŋe ŋoŋere manapie ʒerine eocmu, Anutu Tâpiri Ɋuŋɋasaŋ Wofuŋ nore dâŋ iŋuc.”
13Wofuŋzi ʒiŋuc mukac: “Ŋoŋe pepecdâŋ enareeŋgopieŋ, iŋuc ŋazape dâŋ okacne ʒiŋuc bâtikie‐nareŋgopieŋ: ‘Hâc, nâŋe weniŋuc ehuc pepecdâŋ egareeŋgopeneŋ?’
14Ŋoŋe ʒiŋuc muhuc enareeŋgopieŋ: ‘Anutu kiŋaŋ qaqacne i maŋgâŋ qacneeŋgopeneŋ. Me sâcmutâc dâŋticne reŋkehuc Anutu Tâpiri Ɋuŋɋasaŋ Wofuŋ ere maio busâqoc hawari jupene wiac fârine wâc mi fua‐nâreekac.
15Irec pepec penaroŋhec jaŋere manapene ʒerine eekac. Jaŋe hâcne hehesic bâfuahuc bubiaŋ faio jueŋgopieŋ. Iŋuc ehuc Anutu esâickepie wiac i me i moc mi fua‐jareekac.’”
16Eme Wofuŋ araŋ bacnembiŋ jaŋa jaŋackoaŋ muc manac epie Wofuŋzi manawec. Ehame Wofuŋ sâsehuc ʒâŋe‐ticnere manapie fewec jaŋere manasuhuc ʒâŋe biri‐jeŋic ere maio qâreŋkekicne.
17Irec Anutu Tâpiri Ɋuŋɋasaŋ Wofuŋzi ʒiŋuc mukac: “No mumutara gie bapemu dameŋ ira jaŋe fuŋfuŋfâc‐nane fârine erâ juniŋmu. Ehame ŋic moczi ŋokâ‐ticne kiŋaŋ qacnehame akickeekac, irec sâc jaha akic‐jopapemu.
18Iŋuc fuame ŋoŋe ŋic tiŋne â hehesicne, erâ Anutu kiŋaŋ qacneeŋgopieŋ â mi qacneeŋgopieŋ jaŋe mocwâc hone bârâwiŋ ejareniŋmu.
