Maleaki 4

1

2

3

4

¹“Erâ manaŋgopieŋ, dameŋ qândâŋkekac i ʒoc fâroroc sâko iŋucne. Eme izi ŋic pepec penaroŋ â hehesicne jaŋe rocjopame sopâc kecɋaŋ iŋucne hahaŋkeniŋmu. Ehame dameŋ warekac izi qizec susuc â siec‐jeŋic moc mi bâtirihuc ʒâseŋke‐fâreocmu, Anutu Tâpiri Ɋuŋɋasaŋ Wofuŋ nore dâŋ iŋuc.

²Â ʒâŋe biŋe‐nanere erâ araŋ banareeŋgopieŋ ŋoŋerao ine wamare dameŋ biaŋ bâbâpiaŋ‐ticnehec maickeocmu. Iŋuc fuame ŋoŋe aŋac baŋacne juniŋmu.

³Eme no mumutara gie bapemu dameŋ ira ŋoŋe ŋic hehesicne kike‐ŋeŋiczi âtenʒaŋ‐jopakupie uucne eniŋmu, Anutu Tâpiri Ɋuŋɋasaŋ Wofuŋte nore dâŋ iŋuc.

⁴“Israe ŋic ŋoŋere erâ Horebe tikio kiŋaŋic‐nane Mose ecnepe sâcmutâc sanaŋ â dâŋsanaŋ erâ mumutâc dâŋ fuŋne fuŋne ŋaza ŋowatuc ewec irec manasuhuc junʒepieŋ.

⁵“Manaŋgopieŋ, dameŋ sâko‐nane qeŋ bipinehec qândâŋkezo eha no porofete Elia sore‐ŋarepemu.

⁶Erâ mâreŋ ʒi imackezipore Elia e mamac â naru motec jaŋe maŋ mocjaha ehuc sâsâsec erâ juniŋte gie baocmu.”