Mɑtie 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Dɛ kó dimɔ̀nnì kɛ̀ Isɑ̃ɑ̃-Bɑtiisii ketɛ́ o tɔ̃mmú kɛ́nnɑ́ɑ́ Kuyie nnɑ́ɑǹtì Sudee kó dikpɑ́ɑ̀ miɛkɛ kɛ tú:

²Ceetɛnɛ̀ di borimɛ, kɛ yɛ̃́ Kuyie ntɔ̀ɔ́tɛ́mɛ̀ kɛ bo kɑnnɛ ku kó dikpɑ̀ɑ̀tìyuu.

³Weè Isɑ̃ɑ̃ kpɛ́í nkɛ Kuyie mpɑ̃ɑ̃nɑ́ɑǹtì nɑ́ɑǹtò Esɑii do nɑ́ɑ́mmɛ̀ kɛ tú: Wèè pɛ̀ú dikpɑ́ɑ̀ miɛkɛ kɛ tú: Tũntɛnɛ̀ ti Yiɛ̀ nKuyie nkó kucɛ, sɛ́innɛ̀ o cɛ.

⁴Isɑ̃ɑ̃ do dɑ́ɑ́tí diyɑɑ̀bòrì dìì dùɔ̀kɛnɛ̀ dìndi yòyó kó ticìtì, kɛ boú fɛnɑɑ̀kɔ̃̀nfɛ̀ o kɑ, kòo kó mudiì ntú ico nɛ̀ ticiètì.

⁵Kɛ̀ Sedisɑdɛmmu kɔbɛ nɛ̀ Sudee kó kutempɛ̃ nkumɔu kɔbɛ nɛ̀ yɛhɛkɛ̀ tɛyɛ̀ yɛ̀ɛ̀ tɔ̀kɛ́nɛ̀ Suditɛ̃ɛ̃ kó kukó nkɛ̀ bɛ̀ nkɔrìní o borɛ̀,

⁶kɛ dɑ́ɑnko bɛ yɛi nkɛ̀ Isɑ̃ɑ̃ bɛ̀ ɑ̃ɑ̃̀ bɑ̀tɛ́mmù Suditɛ̃ɛ̃ kó kukó mmiɛkɛ.

⁷Kɛ̀ Isɑ̃ɑ̃ yɑ̀ Fɑdisĩɛ̃bɛ pɛ́u nɛ̀ Sɑdusĩɛ̃bɛ, kɛ̀ bɛ̀ kɔ̀ròo o borɛ̀ kòò bo bɛ̀ ɑ̃nnɛ́ bɑ̀tɛ́mmù kòo bɛ̀ nɑ̀kɛ́ kɛ dɔ̀: Iwɑ̀ɑ̀kɛ díndi! We ndi nɑ̀kɛ́ kɛ tú dí yentɛ́nɛ̀ Kuyie nkó tibeéntì tìì kèríní?

⁸Di borimɛɛ bɛnkɛ tũnkɛ́ kɛ dò ndi cèètɛ.

⁹Di yɛ̀mmɛ̀ bɑ́ ndò ndi bo nɑ kɛ́cootɛ́ di tú mɛ̀ɛ̀ kpɛ́í Abɑrɑhɑmmu kó ibí. N di nɑ́ɑ́mmu Kuyie mbo nɑ kɛ́dɔɔ̀ yɛtɑ̃́rɛ̀ yiɛ nho bí.

¹⁰Okɔ̃ũtì sũ̀ɔ̃́tɛ́mu o pĩɛ̃tɛ̀ kɛ bo u dɛtie, dɛtie ndɛ̀ɛ̀ í pɛí yɛbɛ sɑ̀ɑ̀yɛ̀ bɛ̀ bo dɛ̀ u kɛ́cɔ́u.

¹¹Mí n di ɑ̃ɑ̃̀ bɑ̀tɛ́mmù mɛniɛ mmiɛkɛ nkɛ kɛ̀ dɛ̀ bɛnkú kɛ dò ndi borimɛ cèètɛ, wèè tũ̀nní ò dɛumu kɛ m pɛ̃ɛ̃tɛ́. N yí sɑnnɛ̀ m bo dɛitɛmɛ̀ o nɛùtì, wenwe bo ndi ɑ̃ɑ̃̀ bɑ̀tɛ́mmù nɛ̀ Muyɑɑ́nsɑ̀ɑ̀mù nɛ̀ muhɑ̃ɑ̃́.

¹²Ò tɔ o piɛnkù nku kɛ bo ye nkɛ́bɑtɛ mɛbii ǹnɛ̀ tifùtì, kɛ́koutɛ́ mɛbii nkɛ́ɑ̃nnɛ́ o bɔu miɛkɛ, kɛ́cɔ́u ntifùtì muhɑ̃ɑ̃́ mmùù í kɔ̃ mmu miɛkɛ.

¹³Isɑ̃ɑ̃ ɑ̃ɑ̃̀ dìì mɔ̀nnì bɑ̀tɛ́mmù Suditɛ̃ɛ̃ kó kukó mmiɛkɛ, kɛ̀ Yesu ítɛ́ní Kɑdidee kó kutempɛ̃ɛ̃ kɛ́tuɔkɛní o borɛ̀ kòò bo ò ɑ̃nnɛ́ bɑ̀tɛ́mmù.

¹⁴Kɛ̀ Isɑ̃ɑ̃ yetɛ kɛ dɔ̀: Fɔ̃́ɔ̃̀ do dò kɛ́ nh ɑ̃nnɛ́ bɑ̀tɛ́mmù kɛ wɛ̃̀tɛ kɛ tú n dɑ ɑ̃nnɛ́ bɑ̀tɛ́mmɑ̀ɑ̀!

¹⁵Kɛ̀ Yesu ò tɛ̃̀ńnɛ́ kɛ dɔ̀: Yie mbɑkɛ kɛ́ nh ɑ̃nnɛ́ bɑ̀tɛ́mmù kɛ yɛ̃́ dɛ̀ wennimɛ̀mu kɛ dò nti dɔɔ̀ Kuyie ndɔ́ dɛ̀. Kɛ̀ Isɑ̃ɑ̃ yie nkóò ɑ̃nnɛ́ bɑ̀tɛ́mmù,

¹⁶kòò nyɛ̀tìní mɛniɛ mmiɛkɛ kɛ̀ tiwɛtìi kpetɛ́ kɛ̀ Muyɑɑ́nsɑ̀ɑ̀mù cùtɛ́ní kɛ dònnɛ̀ dikpɛtìnɔ́nkperi kɛ́cómmú o ĩ́nkɛ̀.

¹⁷Kɛ̀ bɛ̀ɛ keè mɛtɑmmɛ̀ mɑmɛ̀ dɛ ĩ́nkɛ̀ bíɛ́kɛ̀ kɛ mɛ̀ tu: Yie nweè tu m birɛ kɛ̀ n dɛ̀ dɔ́ mɛsɑ̀ɑ̀ kɛ dɛ̀ tɑ̃ mɛdiɛ̀.