Mɑtie 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Kuyie nkpɑ̀ɑ̀tìyuu bo ndònnɛ̀ bɛsɑpɑ̀mbɛ̀ tɛpíítɛ̀ bɛ̀ɛ̀ do tùótɛ́ bɛ fitíyì kɛ́nkɔri kɛ bo co bɛ dɔù.

²Kɛ̀ bɛ̀nùmmù tu tiyɛìntì kɛ̀ bɛ̀nùmmù ciì.

³Bɛ̀ɛ̀ yɛi nkɛ̀ bɛ̀ɛ túótɛ́ bɛ fitíyì bɑ́ bɛ̀ í nsùɔ́ mmɛfitíkùɔ̀ nkɛ́ntɔ.

⁴Bɛ̀ɛ̀ ciì kɛ̀ bɛ̀ɛ cũɔ̃́ mɛfìtíkùɔ̀ nkɛ́súɔ́ nkɛ́ntɔ nɛ̀ yɛmɑ́tìdíè.

⁵Bɛ dɔù í ncɑ̃rikɛ kɛ tùɔ̀kɛní kɛ̀ inuɔ mbɛ̀ pĩ nkɛ̀ bɛ̀ɛ duɔ́.

⁶Kɛyènkɛ̀ cuokɛ̀ kɛ̀ bɛ̀ɛ pĩɛ̃kɛ́ kɛ dɔ̀: Di dɔù tùɔ̀kɛnímu. Kɔtɛnɛ̀ kóò co.

⁷Kɛ̀ bɛɛ̀ bɛsɑpɑ̀mbɛ̀ɛ entɛ bɛmɔu kɛ́ntũnni bɛ fitíyì.

⁸Bɛ̀ɛ̀ mɛ nyɛi nkɛ̀ bɛ̀ɛ mɔɔ bɛ̀ɛ̀ ciì kɛ dɔ̀: Tí pɑ̃nɛ̀ mɛfìtíkùɔ̀ nsɑ́m̀pɔ́ kɛ̀ ti fitíyì iì dɔ́ kɛ́kú.

⁹Bɛ̀ɛ̀ ciì kɛ̀ bɛ̀ɛ yetɛ kɛ dɔ̀: Mɛ̀ í yó nti sɑ̀nnɛ̀, kɔtɛnɛ̀ bɛ̀ɛ̀ fiiti bɛ borɛ̀ kɛ́dontɛ́.

¹⁰Bɛ̀ɛ̀ yɛi mbɛ̀ kɔ̀tɛ dìì mɔ̀nnì mɛfìtíkùɔ̀ ndommu, kɛ̀ bɛ dɔùu tuɔkɛní kɛ́túótɛ́ bɛ̀ɛ̀ ciì kɛ bɑ̀ɑ́tí, kɛ̀ bɛ̀ɛ tɑ mupotúòmù kó kudieku, kɛ́kpetínnɛ́ kɛ́pɑ́ɑ́,

¹¹kɛ̀ bɛ̀ɛ̀ yɛi, bɛ̀ɛ̀ do kɔ̀tɛ mɛfìtíkùɔ̀ ndommu kɛ̀ bɛ̀ɛ tuɔkɛní kɛ́yú kɛ dɔ̀: Ti yiɛ̀ nti kpetɛ́.

¹²Kòò nɛ́ bɛ̀ tɛ̃̀ńnɛ́ní kɛ dɔ̀: N di nɑ́ɑ́ mmɔ́mmuɔ nwe n yí di yɛ̃́.

¹³Ndɑkɛnɛ̀ tũ̀nkɛ kɛ yɛ̃́ di í yɛ̃́mɛ̀ di Yiɛ̀ nwɛ̃tiní dìì yiè yoo dìì mɔ̀nnì.

¹⁴Kuyie nkpɑ̀ɑ̀tìyuu dònnɛ̀ onìtì wèè kɔ̀ri wènwe kupɔ̀ɔ̀kù kɛ yu o kó bɛtɔ̃mbɛ̀ kɛ bɛ̀ totí mɛsɔɔ,

¹⁵kɛ duɔ́ nhoketiwè yɛsɔɔwèrɛ̀ sikɔu sìnùmmù (500), odɛ́rínwè sikɔu sìdɛ́ (200), otɑ̃ɑ̃́nwè tɛkɔ̀ùtɛ̀ (100), bɑ́ wè o wɛ̃rímú mɑmɛ̀ kɛ ìtɛ́.

¹⁶Bɛ̀ duɔ́ nwè yɛsɔɔwèrɛ̀ sikɔu sìnùmmù kòo yɛ̀ dɔ̀ɔ̀nɛ̀ kupotɑɑ́ nkɛ́cɔ̃ntɛ sikɔu sìnùmmù kɛ̀ yɛ̀ɛ wɛ̃nnɛ́ tɛkɔupíítɛ̀ (1000).

¹⁷Bɛ̀ do duɔ́ nwè yɛsɔɔwèrɛ̀ sikɔu sìdɛ́ kòo mɛ ndɔɔ̀ kɛ́cɔ̃ntɛ sikɔu sìdɛ́ kɛ̀ dɛ̀ɛ wɛ̃nnɛ́ sikɔu sìnɑ̀ɑ̀ (400).

¹⁸Bɛ̀ do duɔ́ nwè yɛsɔɔwèrɛ̀ tɛkɔ̀ùtɛ̀ (100) kòo kɔtɛ kɛ́dɑmmú difɔ̃̀tìrì kɛ́ yɛ̀ kũnnɛ́.

¹⁹Kɛ̀ dɛ̀ɛ mɔntɛ kɛ̀ yɛsɔɔwèrɛ̀ yiɛ̀ nkonní kɛ́bekɛ o tɔ̃mbɛ̀ kɛ̀ dɔ̀ bɛ̀ɛ ò nɑ̀kɛ́ bɛ̀ dɔ̀ɔ̀nɛ̀ mù o sɔɔwèrɛ̀.

²⁰Bɛ̀ do duɔ́ nwè yɛsɔɔwèrɛ̀ sikɔu sìnùmmù kòo kɔtɛní kɛ tɔ tɛkɔupíítɛ̀ kɛ dɔ̀: Okótì ntɛ ɑ do n duɔ́ nyɛ̀ɛ̀ sɔɔwèrɛ̀ sikɔu sìnùmmù, nɛ́ ntɛ sikɔu sìnùmmù tɛsì n cɔ̃ntɛ sì.

²¹Kɛ̀ mɛsɔɔ nyiɛ̀ ndɔ̀: N dɑ pɛ́nsìrì ɑ tú otɔ̃ntì sɑ̀ɑ̀wè nwe wèè wetí dɛ̀mɑrɛ̀ sɑ́m̀pɔ́rɛ̀ miɛkɛ, nɛ̀ dɛ kpɛ́í m bo dɑ duɔ́ ndɛdiɛrɛ̀, kɔtɛní kɛ̀ ti ńwɛ̃ nkɛ yo ndiwɛ̀ì.

²²Bɛ̀ duɔ́ nwè yɛsɔɔwèrɛ̀ sikɔu sìdɛ́ kòo kɔtɛní kɛ tɔ yɛsɔɔwèrɛ̀ sikɔu sìnɑ̀ɑ̀ kɛ dɔ̀: Okótì, ǹtɛ ɑ do n duɔ́ nyɛ̀ɛ̀ sɔɔwèrɛ̀ sikɔu sìdɛ́, nɛ́ ntɛ sikɔu sìdɛ́ tɛsì n cɔ̃ntɛ sì.

²³Kɛ̀ mɛsɔɔ nyiɛ̀ ndɔ̀: N dɑ pɛ́nsìrì ɑ tú otɔ̃ntì sɑ̀ɑ̀wè nwe, wèè wetí dɛ̀mɑrɛ̀ sɑ́m̀pɔ́rɛ̀ miɛkɛ, nɛ̀ dɛ kpɛ́í m bo dɑ duɔ́ ndɛdiɛrɛ̀, kɔtɛní kɛ̀ tí ńwɛ̃ kɛ yo ndiwɛ̀ì.

²⁴Bɛ̀ duɔ́ nwè yɛsɔɔwèrɛ̀ tɛkɔ̀ùtɛ̀ kòo kɔtɛní kɛ dɔ̀: Okótì n sòò yɛ̃́mu ɑ yóùmɛ̀, kɛ dɛì tidiitì ɑ í buɔtí tì, kɛ kou ɑ í ye ntì.

²⁵Kɛ̀ kufɔ̃wɑɑ́ ni mpĩ nkɛ̀ n dɑmmú difɔ̃̀tìrì kɛ yɛ̀ kũnnɛ́, nto ɑ sɔɔwèrɛ̀.

²⁶Kɛ̀ mɛsɔɔ nyiɛ̀ nhò nɑ̀kɛ́ kɛ dɔ̀: Fɔ̃́ nhotɔ̃ntì yɛiwe, kutɔ̃nnɛ́díékù, ɑ tú n dɛì tidiitì n yí buɔtí tì kɛ kou n yí ye ntì,

²⁷ɑ tũ nnɛ́ nɑ nhɑ̃nnɛ́ n sɔɔ tɛdítícĩ́ɛ̃̀tɛ̀ miɛkɛ kɛ̀ n nɑ nwɛ̃tiní kɛ tùótɛ́ n sɔɔ nɛ̀ mɛ̀ pɛitɛ́ mɛ̀.

²⁸Fietɛnɛ̀ n do ò duɔ́ nyɛ̀ɛ̀ sɔɔwèrɛ̀ tɛkɔ̀ùtɛ̀ kɛ́duɔ́ n do duɔ́ nwè yɛsɔɔwèrɛ̀ sikɔu sìnùmmù.

²⁹Kɛ yɛ̃́ wèè mɔ̀kɛ bɛ̀ yóó we nyíɛ́mɛ̀ kòo dɔkɛ mɔɔtɛ, kɛ̀ wèè mɔ̀kɛ sɑ́m̀pɔ́ bɛ̀ɛ dɛ̀ fìètɛ.

³⁰Dootɛ́nko dɛ kó kutɔ̃nnɛ́díékù ditowɑɑ̀, dibiìnnì miɛkɛ, ò yó nkuɔ̀ ndɛ̀ kɛ cɑ́ɑ́ nho nìì.

³¹Onìtìbirɛ bo nwɛ̃tiní dìì yiè nɛ̀ dɛ kpetì, kɛ nɛinɛ̀ Kuyie ntɔ̃rɛ̀, kɛ kɑri dɛ kpɑ̀ɑ̀tìkɑ̀rì ĩ́nkɛ̀.

³²Kɛ̀ kutenkù kumɔu kó bɛnìtìbɛ̀ɛ tíí nho ììkɛ̀ kòo bɛ̀ bɑ̀tɛ opecɛ̃nti ɔ̃ɔ̃ bɑtɛ mɛ̀ɛ̀ botí ipe nɛ̀ sibɔɔ́.

³³Kɛ̀ ipe ḿbo o bɑkù yoú kɛ̀ sibɔɔ́ bo kucɑ̃̀nku.

³⁴Kòo kpɑ̀ɑ̀tìi nɑ́kɛ́ bɛ̀ɛ̀ bo o bɑkù yoú kɛ dɔ̀: Kɔtɛnní díndi Kuyie ndɔ̀ɔ̀ bɛ̀ mɛsɑ̀ɑ̀ nkɛ́di tikpɑ̀tì kù dɔ̀ɔ̀ tì di kpɛ́í nnɛ̀ kutenkù kó mudɔɔ̀rìmù mɔ̀nnì.

³⁵Kɛ yɛ̃́ dikònnì do m bomɛ̀ kɛ̀ di m pɑ̃ mudiì kɛ̀ n di, kɛ̀ sinɛ́yɛ̃ĩ nní mbo kɛ̀ di m pɑ̃ mɛniɛ kɛ̀ n yɑ̃̀, kɛ̀ nní ntú opɔ̀ɔ̀ kɛ̀ di n cɔutɛ́.

³⁶Kɛ̀ nní nkpɑ tiyɑ̀ɑ̀tì kɛ̀ di n dɑ́tínnɛ́, kɛ̀ nní mmɔ nkɛ̀ di ndɑkɛ n kpɛ́í, kɛ̀ bɛ̀ nni nkpetí kɛ̀ di kɔrì kɛ n dɔú.

³⁷Bɛ̀ɛ̀ dɔ̀ɔ̀ri Kuyie ndɔ́mɛ̀ kɛ̀ bɛ̀ɛ ò bekɛ kɛ dɔ̀: Ti Yiɛ̀ nti dɑ yɑ̀ ɔ̃̀ndɑɑ̀ ndi, kɛ̀ dikònnì dɑ bo kɛ̀ tí dɑ pɑ̃ mudiì kɑ̀ɑ di? Kɛ̀ sinɛ́yɛ̃ĩ ndɑ bo kɛ̀ tí dɑ pɑ̃ mɛniɛ nkɑ̀ɑ yɑ̃̀?

³⁸Kɑ̀ɑ ntú opɔ̀ɔ̀ kɛ̀ ti dɑ cɔutɛ́? Kɑ̀ɑ nkpɑ tiyɑ̀ɑ̀tì kɛ̀ ti dɑ dɑ́tínnɛ́?

³⁹Kɑ̀ɑ mmɔ nkɛ̀ tí ndɑkɛ ɑ kpɛ́í? Kɛ̀ bɛ̀ ndɑ kpetí kɛ̀ tí nkɔrì kɛ dɑ dɔú?

⁴⁰Kòo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: N di nɑ́ɑ́ mmɔ́mmuɔ nwe, di dɔɔri dɛ̀ɛ̀ kó dimɑ̀ɑ̀ n kɔbɛ sɑ́m̀pɔ́bɛ̀ biɛ, di dɛ̀ dɔ̀ɔ̀ri mínwe.

⁴¹Dɛ kó difɔ̃nkúò kɛ́nɑ́kɛ́ bɛ̀ɛ̀ bo o bɑkù cɑ̃̀nku kɛ dɔ̀: Fũtɛnɛ̀ m borɛ̀ díndi Kuyie ncɔ̃ɔ̃ bɛ̀, tɑnnɛ̀ muhɑ̃ɑ̃́ mmùù í kɔ̃ mmu miɛkɛ, Kuyie ndɔ̀ɔ̀ mù dibɔɔ̀ nɛ̀ di tɔ̃rɛ̀ dɛ kpɛ́í.

⁴²Kɛ yɛ̃́ dikònnì do m bomɛ̀ di í nni mpɑ̃ mudiì kɛ̀ n di, kɛ̀ sinɛ́yɛ̃ĩ nní mbo di í nni mpɑ̃ mɛniɛ kɛ̀ n yɑ̃̀.

⁴³Kɛ̀ nní nkpɑ tiyɑ̀ɑ̀tì di í n dɑ̀tínnɛ́, kɛ̀ nni ntú opɔ̀ɔ̀ di í nni ncɔutɛ́, kɛ̀ nní mmɔ ndi í ndɑkɛ n kpɛ́í, kɛ̀ bɛ̀ nní nkpetí di í nkɔrì kɛ n dɔú.

⁴⁴Kɛ̀ bɛ̀ɛ o bekɛ kɛ dɔ̀: Ti Yiɛ̀ ti dɑ yɑ̀ ɔ̃̀ndɑɑ̀ kɛ̀ dikònnì dɑ bo, kɛ̀ sinɛ́yɛ̃ĩ dɑ bo, kɑ̀ɑ tu opɔ̀ɔ̀, kɑ̀ɑ kpɑ tiyɑ̀ɑ̀tì, kɑ̀ɑ mɔ, kɛ̀ ti nɛ́ í ndɑ teennɛ̀ kɛ̀ bɛ̀ ndɑ kpetí kɛ̀ ti í kɔrì kɛ dɑ dɔú.

⁴⁵Dɛ mɔ̀nnì kòo kpɑ̀ɑ̀tì nɛ́ bɛ̀ tɛ̃̀ńnɛ́ kɛ dɔ̀: Di í dɔ̀ɔ̀ dìì mɔ̀nnì n kɔbɛ sɑ́m̀pɔ́bɛ̀ biɛ nkóò mɔù mɛsɑ̀ɑ̀, mínwe di í mɛ̀ dɔ̀ɔ̀ mɛ̀.

⁴⁶Kɛ̀ bɛmbɛɛ tɑ muhɑ̃ɑ̃́ mmùù í kɔ̃ mmu miɛkɛ, bɛ̀ɛ̀ dɔ̀ɔ̀ri Kuyie ndɔ́mɛ̀ kɛ̀ bɛ̀ mbo mufòmmu miɛkɛ sɑ̃́ɑ̃̀.