Mɑtie 28:1-17

¹Kɛ̀ Sifubɛ kó tɛom̀pùtɛ̀ɛ pɛ̃ɛ̃tɛ́ kɛ̀ Mɑɑri Mɑkitɑdɑɑ kou nɛ̀ Mɑɑri tɔù kɛ̀ bɛ̀ nkɔri dìmɑ́ɑ́sì yiè dikṹnweńnì Sifubɛ kóò tɔ̃nketɛ yiè kɛ bo síékɛ́ Yesu fɔ̃ti.

²Kɛ̀ bɛ̀ nyóó dɑɑtɛ kɛ̀ kɛtenkɛ̀ sɑ̃̀ntɛ̀ mɛdiɛ̀, kɛ̀ Kuyie ntɔ̃nnì cùtɛ́ní kɛ pòòtɛ ditɑ̃́rì kɛ kɑri di ĩ́nkɛ̀,

³kɛ pĩnti kɛ dò nfɛtɑɑfɛ̀ ɔ̃ɔ̃ míítɛ́ kɛ̀ dɛ̀ ndòmmɛ̀, kɛ̀ di yɑ̀ɑ̀tì pɛ́ì kɛ dònnɛ̀ tipɑ̀ɑ̀kóntì.

⁴Kɛ̀ kufɔ̃wɑɑ́ nhɑutɛ́ tihɑ̃ɑ̃pɔ̀ntì kɛ̀ tì ńkpeutí kɛ duò kɛ dò ntì ku.

⁵Kɛ̀ Kuyie ntɔ̃nnìi nɑ́kɛ́ bɛnitipòbɛ̀ kɛ dɔ̀: Díndi bɑ́ nyĩɛ̃̀kù n yɛ̃́mu kɛ dò ndi wɑnti Yesu nwe bɛ̀ sòò bɑɑkɛ́ wè,

⁶kɛ́ndònnɛ̀ ò sòò di nɑ̀kɛ́mɛ̀ kɛ dɔ̀ ò bo yɑ̃́ntɛ́, ò yɑ̃̀ńtɛ́mu, ò í bo diɛ, kɔtɛnní kɛ́yɑ̀ ò do duɔ́ dɛ̀,

⁷kɛ́kɔtɛ mɛcɑ̃ɑ̃ nkɛ́nɑ́kɛ́ o tɑncɔ́ùmbɛ̀ kɛ dɔ̀ ò yɑ̃̀ńtɛ́mu kɛ di niitɛ́nɛ̀ Kɑdidee di yóó kɛ nhò yɑ̀. N do mɔkɛ tìnti kɛ bo di nɑ́kɛ́.

⁸Kɛ̀ bɛ̀ɛ ítɛ́ mɛcɑ̃ɑ̃ nkufɔ̃ti borɛ̀ nɛ̀ kufɔ̃wɑɑ́, kɛ̀ kuyɛǹnɑɑtí diɛkù wɛ̃̀tɛ kɛ bɛ̀ bo. Kɛ̀ bɛ̀ɛ cokɛ́ kɛ́nkɔri kɛ bo nɑ́kɛ́ Yesu tɑncɔ́ùmbɛ̀ dɛ̀ɛ̀ dɔ̀ɔ̀,

⁹kɛ́ nyóó dɑɑtɛ kɛ́yɑ̀ Yesu kòò kèríní bɛ ììkɛ̀ kɛ́ bɛ̀ dɔu nkɛ dɔ̀: Di kpeńnɑ̀ɑ̀? Kɛ̀ bɛ̀ɛ nínkóo o ììkɛ̀ kóò dɔu.

¹⁰Kòo bɛ̀ nɑ̀kɛ́ kɛ dɔ̀: Kufɔ̃wɑɑ́ mbɑ́ ndi bo, kɔtɛnɛ̀ kɛ́nɑ́kɛ́ n tɑncɔ́ùmbɛ̀ kɛ̀ bɛ̀ɛ kɔtɛ Kɑdidee bɛ̀ yóó kɛ nni n yɑ̀.

¹¹Kɛ̀ bɛnitipòbɛ̀ɛ ítɛ́ kɛ́nkũnti, kɛ̀ tihɑ̃ɑ̃pɔ̀ntì tìì do bɑɑ kufɔ̃ti kɛ̀ ti kó tìmɑtìi kɔtɛ dihɛì miɛkɛ, kɛ́nɑ́kɛ́ ikuɔ́ nìùbɛ̀ kó bɛkótíbɛ̀ dɛ̀ɛ̀ dɔ̀ɔ̀.

¹²Kɛ̀ ikuɔ́ nìùbɛ̀ kó bɛkótíbɛ̀ nɛ̀ dihɛì kó bɛkótíbɛ̀ kɛ̀ bɛ̀ɛ tíí nkɛ́nɑ́kɛ́ kɛ́duɔ́ ntihɑ̃ɑ̃pɔ̀ntì idíítí mɛdiɛ̀,

¹³kɛ dɔ̀: Di yĩ́ o tɑncɔ́ùmbɛ̀ bɛɛ̀ kɔ̀tɛní kɛ sɔ̃́ ndi yɛ̃̀ nkɛ duɔ́ kɛ̀ bɛ̀ ò tùótɛ́.

¹⁴Kɛ̀ kùmɑ̀ndɑ́ɑ̀ tì kèè kɛ dɔ́ kɛ di pĩ́ nti bo ò bɑ̀ḿmú kòo di yóu.

¹⁵Kɛ̀ tihɑ̃ɑ̃pɔ̀ntìi yie mbɛ̀ yɛ̃ mmù, kɛ́cɔutɛ́ idíítí kɛ̀ dɛ kó tinɑ́ɑǹtìi pitɛ́ Sifubɛ cuokɛ̀ kɛ kpɑɑ́ bo nɛ̀ yíenní.

¹⁶Kɛ̀ Yesu tɑncɔ́ùmbɛ̀ tɛpíítɛ̀ nɛ̀ omɑ́ɑ̀ kɔtɛ Kɑdidee kó ditɑ̃rì ĩ́nkɛ̀, Yesu do yɛ̃ mbɛ̀ yóó mɑ́ɑ́ dɛ̀.

¹⁷Bɛ̀ ò yɑ̀ dìì mɔ̀nnì kɛ́nínkóo o ììkɛ̀ kóò dɔu, bɑ́ nɛ̀ mɛmmɛ bɛ̀mɑbɛ̀ í nyie kɛ dò nYesu nwe.