Luukaṉu 7:17-48

¹⁷Palunya ngurrara tjuṯangkuya mirri kanaṉutjangka tjakultjurinangi ngurra kutjupa kutjupawana, manta Tjuutiyalawanaṯarra.

¹⁸Tjaanaku walytja tjuṯangkuya tjakulpa palunya kulira Tjaananyaya tjakultjunu.

¹⁹Tjaanalu pulanya palumpa walytja kutjarra yaḻṯirra iyaṉu mayutju Yiitjulakutu yankula yalatji wangkanytjakurapula, “Tjaanalulinyatju ngalya wantirriyaṉu. Palurulinyatju watjalpayi mayutju Kurayitjanya ngalya yankunytjaku. Nyuntu tjinguru Kurayitja?, Katutjalu watjara wantirriyaṉutja. Tjinguru paluru ngula ngalya yankuku?”

²⁰Ngurra palula Yiitjulu tjananya kutu palyaṉingi, yaṉangu pikatjarra tjuṯa, kurutjarra tjuṯaṯarra. Mamutjarra tjuṯangka mamu tjuṯa payira wantirriyalpayi. Tjaanaku walytja paluru kutjarrangku yankula Yiitjunyapula tjapiṉu, “Tjaanalulinyatju iyaṉu kapingka papatatjimilalpayingku nyuntunya wangkarra kulintjaku yalatji, ‘Nyuntu tjinguru Kurayitjanya?, Katutjalu watjara wantirriyaṉutja. Tjinguru paluru ngula ngalya yankuku?’”

²²Palulanguru pulanya watjaṉu, “Tjaanalakutupula yankula watjala!, nyupalipulan kuwarri nyakula kuliṉutjangku. Yalatjipula yankula watjala! Pampa tjuṯangkuya kurungkulpi nyanganyi. Nyumpu tjuṯaya tjunta taayitilpiya yulytjayinanyi. Pangki pikatjarra tjuṯaya pangki palyalpiya yulytjayinanyi. Pinatjarra tjuṯangkuya pina alytjurangkulpiya kuliṉi. Mirri ngarringutja tjuṯaya kanalpi nyinanyi. Maralpa tjuṯangkuya tjakulpa palya kuliṉi.”

²³Yiitjulu pulanya piyuku watjaṉu, “Nyupali yankula Tjaananya watjala! ‘Ngayuluṉa yaṉangu tjuṯa palyalpayi Katutjakuṉu ngangkaritjarrangku. Tjaana nyuntu tjukarurru kutu kulintjaku, ngayulu Katutjakuṉu, ngangkari tiṉatjarra Kurayitjanya nyinanyingka.’”

²⁴Palulanguru Tjaanaku walytja kutjarrapula ngaṉṯikutu yanutjangka ngaṉṯi tjananya, Yiitjulu yaṉangu tjuṯa nintiṉingi yalatji, “Tjaananya paluru ngurra kapiwiyawana nyinapayi. Yirriṯi nyurrangarri waṉma yankupayi, palunya nyakula kulilkitja. Wiyanyurra waṉma yankupayi, wati mungutja kulilkitja, Katutjaku wangka watjalpayi kulilkitjanyurra yankupayi. Wiyanyurra waṉma yankupayi, yaṉangu mantarra palyatjarra nyakukitja, Tjaanaku wangka kulilkitjanyurra ankupayi. Mani puntutjarra, mantarra palyatjarra mayutju tiṉaku waaḻangka nyinapayi, kanya Tjaananya ngurra palulawana wiya nyinapayi mantarra palyatjarra. Yuwa, Katutjaku wangka watjalpayi kulilkitja nyurrangarri waṉma yankupayi. Katutjaku wangka watjalpayi palyalingku Tjaananya nyinanyi. Paluru wirriḻi nyinanyi, Katutjaku wangka watjalpayi kutjupa tjuṯangka.

²⁷Yirriṯi nyinapayingku wakaṉu, Tjaananya ngula utirringkula tiṉarrirra nyinanytjaku. Yirriṯi yalatjingku wakaṉu Katutjakuṉu wangka, ‘Ngayuluṉa wati kutju tjakultjunkupayinyaṉa yurrunpa paṉakutu wantirriyalku. Palunyatjanu ngayulu mayutju tiṉa kutjupa wantirriyalku. Palunyaṉa iyalku yankula tjananya yurrunpa nintintjaku, tjukarurrutjuya nyinanytjaku.’” Yiitjulu tjananya yaṉangu tjuṯa piyuku watjaṉu,

²⁸“Kulilaya! Yaṉangu kutjupa tjuṯangka wirriḻi Tjaananya nyinanyi, Katutjaku wangka watjalpayi tjuṯangkaṯarra. Wangka kutjupaya kulila! Katutjanya Tjaanaku yunypa nyinangu. Paluru kutjupa tjuṯakuṯarra yunypa nyinanyi, palumpa walytja tjuṯaku. Ngayuku wangka kulilpayi tjuṯakuṯarra Katutjanya yunypalingku nyinaku. Paluru tjananya ngulytjura yaṉṯayaṉṯalku.”

²⁹Yirriṯi yaṉangu yuwankarrangku Tjaanakuṉu wangka kulira papatatjirringkupayi, kuya palyalpayi tjuṯa, kamantaku mani mantjilpayi tjuṯaṯarra. Yalatji palyaya kulira papatatjirripayi,

³⁰kanya Paratji tjuṯangku, Muutjaku wangka nintilpayi tjuṯangkuṯarra Tjaanalu Katutjakuṉu wangka nintintjala, kuliraya wantipayi. Wiyaya tjapilpayi Tjaanalu tjananya papatatjimilantjaku.

³¹Yiitjulu tjananya yaṉangu tjuṯangka piyuku watjaṉu, “Yaṉangu tjuṯa kuwarri nyinanyi. Nyaa nguwanpaya nyinanyi?

³²Yalatji nguwanpaya nyinanyi. Pipirri tjuṯaya ngurrangka ngururrpa yinkangarapayi nguwanpa. Pipirri tjuṯangku tjananya kutjupa tjuṯangka watjalku yalatji, ‘Nganaṉatju kiitawu wangkatjingantjala nyurrampa, wiyanyurra taanytjirrikitja kulira ngalya yanu. Nganaṉatju yulanyingka, wiyanyurra kulira ngalya yanu, tjungu yulakitja. Nganaṉanya nyurrangarri kulira wantipayi.’”

³³Yiitjulu tjananya piyuku watjaṉu, “Tjaanalu tjananya kapingka papatatjimilalpayi, paluru waamaku ngurrpa nyinangi. Paluru mangarri wantipayi ngalkuwiyangku Katutjanya tjapilkitjangku. Tjaanaku wangkanyurra kulira wantipayi. Yalatjinyurra wiyawanangku watjalpayi, ‘Tjaananya kuya, mamutjarra.’

³⁴Ngayuluṉa yaṉanguku katja nyinanyi, yaṉangu kutjupa tjuṯa nguwanpa ngayulu ngalkura tjikiṉi palya. Yalatjinyurra wiyawanangku watjalpayi. ‘Yiitjunya kuya, yaṉangu kuya palyalpayi tjuṯaku tjanampa walytja nyinanyi, kamantaku mani mantjilpayi tjuṯakuṯarra.’

³⁵Yuwa, kuya palyalpayi tjuṯangku, kamantaku mani mantjilpayi tjuṯangkuṯarraṉi kulira yunyparripayi, kanya nyurrangarri ngayukuṉu wangka kulira wantinyi.”

³⁶Palulanguru Paratjingku Yiitjulakutu yankula tjapiṉu, tjungungku ngalkukitjangku. Yankulapula palumpa waaḻangka tjarrparra nyinangi ngalkukitja.

³⁷Ngurra palula Yiitjunya nyinangitjangka tjakulpa kungka kuya palyalpayingku kuliṉu. Waaḻa palulakutu ankula kungka paluru paatulatjarra tjira katingu Yiitjulakutu, paṉṯi palyatjarra.

³⁸Yiitjunya nyinanyingka, kungka paluru Yiitjula tjinangkara pupakatirra yulangi. Yularra tjirrmilypangku Yiitjunya tjina wiitanu. Paluru Yiitjunya tjina yuriṉu, mangka waṯawara palumpaṉungka. Yiitjunya tjina nyunytjura paatula alytjura tjira paṉṯi palyatjarrangku nyapaṉu tjina.

³⁹Wati paluru Paratjingku nyapaṉingka nyakula walytjangku kuliṉu, “Wati ngaatjanya Katutjaku wangka watjalpayi yilta nyinarra ninti nyinamara yalatjiku. Kungka ngaa paluru nyinanyi, wati tjuṯanya yaḻṯirra kanyilpayi, kutjuṯu kutjuṯu. Kungka palunya payira wantirriyanmara ngalya yankula pampuntjala tjina.”

⁴⁰Yiitjulu wati palunya watjaṉu, “Tjaamana, watjalkitjarringuṉanta.” Tjaamanalu tjapiṉu, “Nintilpayi, nyaaṉin watjalku?”

⁴¹Yiitjulu yara watjaṉu, “Wati kutjarra nyinarra mani yungkupayingka tjapilkupula ngula ngaparrtji yungkukitjangku. Paluru kutjungku tjapilku mani tiṉaku, ‘Yuwaṉi tala tuuntiyi payip tjawutjuna!’, kanya kutjupangku tjapilku, ‘Yuwaṉi tala tuu tjawutjuna!’ Yalatji mani kanyilpayingku pulampa yungku, ngula ngaparrtjingkupula yungkunytjaku.

⁴²Ngula paluru kutjarrangku puṯu kulilku ngaparrtji yungkukitjangku. Wati panyapa mani kanyilpayingku aḻṯururringkula pulanya watjalku, ‘Nyupali mani kanyintjawiyangka ngayuluṉantapula wantinyi. Wiyapulan mani palunya ngaparrtjingku ngayunyaṉipulan yungkunytjaku, wantipula!’ Paluru kutjarra pukuḻpa yanku ngurrakutu.” Yiitjulu Tjaamananya watjaṉu, “Tjaamana. Mani kanyilpayi aḻṯururringkula pulanya wantingu. Yaalytjin kuliṉi? Ngananya puntura yunyparrirra nyinaku mani yungkupayi palumpa?, tala tuu tjawutjuna mantjiṉutjanya?, tjinguru tala tuuntiyi payip tjawutjuna mantjiṉutjanya?”

⁴³Tjaamanalu watjaṉu, “Tala tuuntiyi payip tjawutjuna mantjiṉutjanya. Paluru puntura yunyparriku mani yungkupayiku.” Yiitjulu watjaṉu, “Nyuntu tjukarurru kuliṉi.”

⁴⁴Yiitjulu nguṉṯilangarala kungka palunya nyakula Tjaamanala watjaṉu, “Nyuntupa ngurrakutuṉa ngalya yankula nyinanyingka, wiyaṉin yungu kaṉilpa kapitjarra, tjinaṉatju paltjintjaku.” Yiitjulu piyuku watjaṉu, “Kanya kungka ngaatjanya nyawa! Yularra tjirrmilypa yintirra ngaangkuṉi tjina paltjiṉu. Tjirrmilypa yintirra ngayunya yuriṉu mangka palumpaṉungka.

⁴⁵Ngayuluṉa ngalya yankula nyinanyingka, wiyaṉin nyunytjuṉu.” Tjuwu tjuṯangkuya kututja kaṉilpa kapitjarra yungkupayi, yaṉangu kutjupa waaḻangka tjarrparra nyinanytjala. Tjuwu paluru tjana kututjaya nyunytjulpayi, yaṉangu kutjupa waaḻangka tjarrparra nyinanyingka. Yiitjulu piyuku watjaṉu, “Kanya kungka ngaatjanya puntura yunyparringu ngayuku, tala tuuntiyi payip tjawutjuna mantjiṉutjanya nguwanpa. Paluru tjina ngayunya tjuṯangara nyunytjuṉu.

⁴⁶Nyuntuṉin wiya katangka tjira paṉṯi palyatjarra yintiṉu, kanya kungka ngaangku kutjuṉi tjinangka yintiṉu, tjira paṉṯi palyatjarra.

⁴⁷Palulanguruṉanta watjaṉi, kungka palumpa kuya puntuṉara yurrun yurrunpa waṉingu. Palulanguru palurutju puntura yunyparringanyi. Yaṉangu kutjupaku kuya wiima ngayulu waṉinyingka, palurutju wiya puntura yunyparriku.”

⁴⁸Kungka palula Yiitjulu watjaṉu, “Yilta, nyuntupa kuyaṉanku yurrunpa waṉingu.”