Luuka 7:17-48

¹⁷Oo kabaaru saakii e leydi Yahuudiya e seraaji mum fuu.

¹⁸Ko waɗi koo fuu, Yaayaa narrii ɗum taalibaaɓe mum, noddi ɗiɗon maɓɓe,

¹⁹neli ɗum'en to Iisaa, ɓe lamndoo ɗum yalla kaɲum woni garoowo oo, naa ɓe ndooman goɗɗo?

²⁰Ɓeen worɓe ɗiɗon ngari e Iisaa, mbii ɗum: —Yaayaa mo lootogal batisima neli min e maa, min lamnde yalla aan woni kaanɗo warde oo, naa min ndooma goɗɗo?

²¹E oon wakkati, omo sellina yimɓe heewɓe ɲawuuji ɗi ngaldaa sii, omo ribba seyɗaani'en, omo wumtina wumɓe heewɓe.

²²O jaabii ɓe, o wii: —Njehee njantanoyee Yaayaa ko njii-ɗon e ko nan-ɗon: wumɓe ana mbumta, laƴannooɓe ana njaɓɓa faa gasa, seppaaɓe ana cellinee, faaɗuɓe ana paaɗita, maayɓe ana nguurta. Misikiina'en duu kaalanaama Kabaaru Lobbo oo.

²³Oon mo salaaki goonɗinde kam, welii hoore.

²⁴Nde nelaaɓe ɓee kooti ndee, Iisaa fuɗɗi haalande jamaa oo haala Yaayaa, o wii: —Koɗum ƴeewoyno-ɗon to ladde jeereende too? Kuɗol dimmbotoongol e henndu naa?

²⁵Koɗum ƴeewoyno-ɗon? Neɗɗo pariiɗo naa? Ɓoornotooɓe kaddule lobbe so nguura nguurndam lobbam ɓee, e cuuɗi kaanankooɓe tawetee.

²⁶Koɗum ƴeewoyno-ɗon ndennoo? Annabaajo naa? Goonga! Miɗo haalana on, omo ɓuri annabaajo.

²⁷Kanko woni mo Binndi ɗii mbii e mum: «Miin Laamɗo, mi ardinante nelaaɗo am moƴƴinanoowo ma laawol.»

²⁸Miɗo haalana on, bammbaade bammbaali ɓurɗo Yaayaa, tawee nee, ɓurɗo lo'ude e Laamu Laamɗo oo ɓuri mo teddude.

²⁹Yimɓe hettindiiɓe mo ɓee fuu, fay duwaaɲe'en ɓee, njaɓii konngol Laamɗo ngol ko Yaayaa looti ɗum'en lootogal batisima koo.

³⁰Kaa Farisa'en e jannginooɓe Sariya mberrike faandaa Laamɗo ko ɓe calii looteede e junngo Yaayaa koo.

³¹Ndennoo, koɗum nanndinan-mi e yimɓe oo jamaanu? Hoɓe ɓe nanndi?

³²Eɓe mba'i hono sukaaɓe jooɗiiɓe e luumo, ana noddondira, ana mbiya: «Min piyanii on cereeli, on mbamaali. Min mboyanii on woondu yurminiindu, on mboyaali.»

³³Sabi Yaayaa mo lootogal batisima warii, ɲaamataa ɓii jalo, yarataa doro, on mbii yo laddaaɗo.

³⁴Kaa Ɓii Neɗɗo oo warii, ana ɲaama ana yara, on mbii ɲaamde e yarde tan woni e hakkille mum, o giɗo duwaaɲe'en e luuttooɓe hono mum'en.

³⁵Kaa Laamɗo hakkilante oo, jaɓuɓe ɗum ɓee fuu njiyan goonga mum.

³⁶Gooto e Farisa'en ɓee noddi mo bottaari. O naati galle joomum, omo ɲaamda e mum.

³⁷Debbo pijoowo ana e ngeenndi ndii. Ko o nani Iisaa ana wottoo to galle Farisanke oo koo, o waddi faandu nebam uuroojam,

³⁸o heedi caggal mum sera koyɗe mum, omo woya, omo leefinira koyɗe mum ɗee gonɗi makko, omo soccira ɗe sukundu makko, omo uurnoo ɗe, omo wuja e majje nebam ɗam.

³⁹Nde Farisanke nodduɗo mo oo yii ɗum ndee, wii e ley becce mum: «Sinndo oo yo annabaajo, o anndan debbo memoowo mo oo, o annditan oon yo pijoowo.»

⁴⁰Iisaa haaldi e Simon Farisanke oo, wii: —Simon, miɗo haalane huunde wootere. O jaabii: —Haal, Moobbo!

⁴¹Iisaa wii: —Ɲamlotooɗo gooto ana rewannoo yimɓe ɗiɗon, gooto oo buuɗi cardi teemeɗe joy, goɗɗo oo buuɗi cardi capanɗe joy.

⁴²Kaa nde mo anndunoo ɓe ngalaa ko ɓe njoɓira mo ndee, o yaafii ɓe ɗiɗon fuu. Jooni, homo e maɓɓe ɓuri yiɗude mo?

⁴³Simon jaabii: —Miɗo miila mo o yaafii kaalisi keewɗo oo. Iisaa wii mo: —A haalii goonga!

⁴⁴Caggal ɗum, o yeeƴii debbo oo, o wii Simon: —A yii oo ɗoo debbo naa? Mi naatii galle maa, fay ndiyam ko mi semmbira koyɗe am a hokkaali kam. Kaa kanko, gonɗi makko o leefiniri koyɗe am, o socciri ɗe sukundu makko.

⁴⁵Aan, a ɓuuccaaki kam, kaa kanko, gila naatu-mi, o ŋoottaali ɓuuccaade koyɗe am.

⁴⁶A wujaali hoore am nebam, kaa kanko, o wujii e koyɗe am nebam uuroojam.

⁴⁷Ɗum saabii so miɗo wiye: luutti makko e heewde fuu njaafaama, ndennoo jilli makko ana mawni. Kaa jaafaaɗo seeɗa, jilli seeɗa hollata.

⁴⁸Caggal ɗum, o wii debbo oo: —Luutti maa njaafaama.