LUKA 7:17-48

¹⁷Bena una kara sivaraina na Iudea idoinai bona badina tanodia idoidiai eha piua rohoroho.

¹⁸Ioane ena hahediba ese ini hereva iboudiai ia e hamaorolaia.

¹⁹Bena Ioane ese ena hahediha rarua e boiridia, e siaidia, Lohiabada bae nanadaia, baeto “Be maimu tauna na oi, eiava idauna ta baita naria?”

²⁰Raruosi na ia dekenai e kau, eto, Ai na Ioane Bapatiso ese e siaimai, e tomu “Be maimu tauna na oi, eiava idauna ta baita naria?”

²¹Una negana ai Iesu ese hutuma e hamauridiava: gorere taudia, hisi-ani taudia, lauma dikadia ese e bolodia taudia. Bona mata-kepulu taudia hutuma danu matadia e hapapa.

²²Bena ia ese hari raruosi e haere henidia, eto, Vada aola, ome ita ome kamonai karadia Ioane ba hamaorolaia: matakepulu taudia matadia e papamu: ae-hedairike taudia e raka namonamomu, lepra taudia e ḡoevaḡoevamu, taia-kudima taudia e kamonaimu, mase taudia e tore isimu, bona ogoḡami taudia sivarai namo e kamonaiamu.

²³Hekwakwanai badina egu ai basine davaria tauna hari namo.

²⁴Ioane ena hesiai taudia e raka oho, bena Iesu ese aru taudia e hereva henidia matama, Ioane herevana e gwauraia, eto, Umui na dahaka itana tano ḡaḡaena ola? Siriho lai ese e haevaia a?

²⁵A dahaka itana ola? Dabua manada-manadana e dokilaia tauna a? Dabua mai hairaidia e dokilaimu bona aniani namodia e animu taudia na pavapava edia ruma ai e nohomu.

²⁶A dahaka itana ola? Peroveta tauna a? Oibe, na hamaoromuimu, peroveta taudia loḡora iboudiai ia ese e hereadiamu.

²⁷Ia bunai herevana e torelaia, eto, A itaia, lau ese egu gwaukau tauna oi vairamu ai name siaia, Emu dala ilailaina.

²⁸Na hamaoromuimu, hahine bogadia ai e vara taudia iboudiai na ta ese Ioane se hereaiamu; a Dirava ena basileia lalonai gabe tauna ese Ioane e hereaiamu.

²⁹Taunimanima iboudiai bona tax gogo taudia danu una hereva e kamonai ai, idia ese Dirava e imodaia, badina be Ioane ese e bapatisodia.

³⁰A Farisea taudia bona taravatu taudia ese ena bapatiso e dadaraia; unu amo Dirava ena lalo-iladai e lao ahu.

³¹Iesu ma eto, Ina uru taudia be dahaka ida baina haheḡereḡeredia?

³²Idia na edeheto? Idia na memero-memero na heheto, hanua ariarana ai hehelai, bamodia e boi henidiamu, e tomu, Ai be ivilikou a hatai, to umui asio mavaru; Ai be a rohe ahu, to umui asio taitai.

³³Badina be Ioane Bapatiso ema, se anianiva, vine ranuna se inuva, bena umui oto “Ia na mai lauma-dikana”.

³⁴A Taunimanima Natuna ema, e anianimu, e inuinumu, bena umui o tomu “Ina na ani-dae ani-dae tauna bona vine ranuna e inua momomu tauna, tax gogo taudia bona kara dika taudia turadia”.

³⁵A aonega ihamomokanina na natuna edia amo e hedinaraimu.

³⁶Farisea tauna ta ese Iesu e vavea, bae aniani hebou eto. Bena ia ese hari Farisea tauna ena ruma ai e raka vareai, aniani gabuna ai e ege diho.

³⁷Una hanua hahinena ta, ariara hahinena, dibana Iesu na Farisea tauna ena ruma ai e ege diho, bena nadi kavabuna ta e abia kau, lalonai na dehoro namo-hereana.

³⁸Ela, Iesu murinai e gini, aena badibadidiai e tai, bona iruru-matana amo aena e haparipari, bena huina amo e dahu kaukau. Bena aena e harahu, bona dehoro amo e dairi.

³⁹Farisea tauna, hari e vavea tauna, ese una kara e itaia, bena lalona e hadaia, eto, Ina tau bema peroveta tauna, ia na bema diba ina ienai e dau kau hahinena na ariara hahinena.

⁴⁰Bena Iesu ese e hereva henia, eto, Simona e, lau na mai egu hereva taina. Ia eto, Hahediba taumu e, mani a hereva.

⁴¹Iesu eto, Tau ta mai ena ima doa taudia rarua: ta ena abitorehai na dollar imahui, ma ta ena be dollar ima.

⁴²Asi edia ḡau, edia abi-torehai davadia ihaloudia; bena ia ese raruosi edia abi-torehai e gwau tao. Idia raruosi daika ese baine lalokau henia bada?

⁴³Simona e haere, eto, Reana ena abi-torehai badana e gwaua tao tauna. Iesu eto, Oibe, momokani.

⁴⁴Ia ese hari hahine e haḡerea, bena Simona e gwau henia, eto, Ina hahine o itaiamu a? Lau na emu ruma ai name dae kau, aegu ihurilaina ranuna so mailaia; a ia ese iruru-matana amo aegu eme haparipari bona huina amo eme dahu kaukau.

⁴⁵Oi ese so harahugu; a ia ese dae-kaugu ai ema hari aegu eme harahu.

⁴⁶Oi ese kwaragu so horoa; a ia ese aegu dehoro amo eme dairi.

⁴⁷Taunabunai, na hamaoromumu, ena dika, ena be babada, to vada eme hegwautao, badina be ena lalokau na bada. A ena dika maraḡina mo e hegwau tao tauna na ena lalokau danu maraḡi.

⁴⁸Bena ia ese hari hahine e hamaoroa, eto, Emu dika vada eme hegwau tao.